ព័ត៌មានអន្ដរជាតិ

កូរ៉េខាងត្បូង ធ្វើសមយុទ្ធមីស៊ីល ឆ្លើយតបការបង្កហេតុពីកូរ៉េខាងជើង

បានផុស

៨ ខែ មុន

នៅ

ថ្ងៃសុក្រ ៨ វិច្ឆិកា ២០២៤

ដោយ

Chheang

បញ្ជាការយោធាកូរ៉េខាងត្បូង បានប្រកាសនៅថ្ងៃទី៨ខែវិច្ឆិកានេះថា ខ្លួនបានធ្វើសមយុទ្ធបាញ់មីស៊ីលប៉ាលិស្ទិកមួយគ្រាប់ចូលទៅក្នុងសមុទ្រ ដើម្បីបង្ហាញពីសមត្ថភាពកងកម្លាំងរបស់ខ្លួន និងជាសារព្រមានដល់កូរ៉េខាងជើង។

យោធាកូរ៉េខាងត្បូង បានប្រាប់ថា សមយុទ្ធបាញ់គ្រាប់ពិតនេះ មានគោលបំណងបង្ហាញពីដំណោះស្រាយដ៏ខ្លាំងក្លា ដើម្បីឆ្លើយតបយ៉ាងម៉ឺងម៉ាត់ទៅនឹងការបង្កហេតុណាមួយពីកូរ៉េខាងជើង ដោយបន្ថែមថា វាក៏គូសបញ្ជាក់ផងដែរនូវ «សមត្ថភាព និងការត្រៀមខ្លួនសម្រាប់ការវាយប្រហារជាក់លាក់ប្រឆាំងនឹងប្រភពនៃការបង្ករឿងរបស់សត្រូវ»។

មីស៊ីលនៅក្នុងសមយុទ្ធលើកនេះរបស់កូរ៉េខាងត្បូង ជាប្រភេទមីស៊ីលរយៈចម្ងាយខ្លី Hyunmoo ហើយត្រូវបាញ់ចូលទៅក្នុងសមុទ្រខាងលិចប្រទេស។

សមយុទ្ធនេះ ធ្វើឡើងបន្ទាប់ពីការបាញ់សាកល្បងមីស៊ីលចំនួន២លើករបស់កូរ៉េខាងជើង ក្នុងអំឡុងពេល២សប្ដាហ៍កន្លងទៅនេះ។

កូរ៉េខាងត្បូង បានចាប់ផ្ដើមផលិតមីស៊ីលរយៈចម្ងាយខ្លីតាំងតែពីទសវត្សរ៍ឆ្នាំ១៩៧០មកម៉្លេះ ដើម្បីរារាំងការគំរាមកំហែងពីកូរ៉េខាងជើង។ កាលពីខែដើមខែតុលា កូរ៉េខាងត្បូង បានដាក់តាំងបង្ហាញជាលើកដំបូងនូវមីស៊ីលប៉ាលិស្ទិកជំនាន់ថ្មី Hyunmoo-5 របស់ខ្លួន ដែលមានសមត្ថភាពអាចបាញ់កម្ទេចលេណដ្ឋានក្រោមដីបាន៕

ដោយ៖ ឈាង