អាមេរិក៖ អ៊ីស្រាអែល​មិន​បាន​បំពានច្បាប់​ជំនួយ​មនុស្សធម៌​នៅ​ហ្គាហ្សា​ទេ

សហរដ្ឋអាមេរិក បានឲ្យ​ដឹង​​កាល​ពី​ថ្ងៃ​ទី​១២​ខែ​វិច្ឆិកា​​ថា អ៊ីស្រាអែលមិនបំពានច្បាប់​​ស្តីពី​​ការ​​កម្រិត​ជំនួយចូល​ក្នុង​តំបន់ហ្គាហ្សានោះទេ ប៉ុន្តែបានអំពាវនាវឲ្យ​មាន​ដំណើរការ​​​​នេះ​កាន់​តែ​ច្រើន​ឡើង​​បន្ថែមទៀត។

ការ​លើក​ឡើង​នេះ ធ្វើ​ឡើង​​មួយខែបន្ទាប់ពីរដ្ឋបាលរបស់ប្រធានាធិបតី​ជិត​ផុតអាណត្តិ លោក ចូ បៃដិន (Joe Biden) បានគំរាមដកការគាំទ្រផ្នែកយោធាមួយចំនួន​​ឲ្យ​​អ៊ីស្រាអែល។

រដ្ឋមន្ត្រីការបរទេស​អាមេរិក លោក Antony Blinken និងរដ្ឋមន្ត្រីការពារជាតិ លោក Lloyd Austin បានផ្ញើលិខិតមួយច្បាប់កាលពីខែមុនទៅកាន់អ៊ីស្រាអែល ដើម្បី​ព្រមាន​​​អំពីស្ថានភាពមនុស្សធម៌នៅតំបន់ហ្គាហ្សា និង​​ដាក់​ថ្ងៃផុតកំណត់នៅថ្ងៃទី១៣​ខែវិច្ឆិកា ដើម្បីអនុវត្តតាមច្បាប់របស់សហរដ្ឋអាមេរិកស្តីពីការអនុញ្ញាតជំនួយមនុស្សធម៌។

នៅពេល​​​​​សួរថាតើអ៊ីស្រាអែលបានបំពេញតាមការទាមទារដែរឬទេ អ្នកនាំពាក្យក្រសួងការបរទេសលោក Vedant Patel បាននិយាយអំពីអ៊ីស្រាអែលថា៖ «យើង​បានធ្វើការវាយតម្លៃថា ពួកគេ​មិន​​បំពានច្បាប់សហរដ្ឋអាមេរិកទេ»។

លោក Patel បាន​បន្ថែម​​ថា៖ «ស្ថានភាពមនុស្សធម៌​ទាំងមូល​នៅហ្គាហ្សានៅតែ​មិន​ទាន់​ជា​ទី​ពេញ​ចិត្ត​នៅ​ឡើយ។ ប៉ុន្តែនៅក្នុងបរិបទនៃលិខិតនោះ វាមិនមែន​ផ្ដោត​លើ​ថាតើយើងរកឃើញអ្វីដែលពេញចិត្តឬអត់នោះទេ វាគឺ​អំពី​សកម្មភាពដែលយើងកំពុង​មើល​ឃើញ។ សកម្មភាព​​ដែល​យើង​បាន​ឃើញ យើង​គិត​ថា​ទាំង​នេះ​ជា​ជំហាន​ក្នុង​ទិសដៅ​ដ៏​​ត្រឹម​ត្រូវ»។

ការ​លើក​ឡើង​របស់​អាមេរិក​នេះ ត្រូវ​បាន​ធ្វើ​ឡើង បើទោះបីជាអ៊ីស្រាអែលមិនបាន​បំពេញ​តាម​តម្រូវការ​នៃរង្វាស់ដែលបានកំណត់យ៉ាងច្បាស់នៅក្នុងលិខិតនោះ រួមទាំង​ការ​អនុញ្ញាត​ឲ្យ​មានរថយន្តដឹកទំនិញយ៉ាងតិច ៣៥០​គ្រឿងក្នុងមួយថ្ងៃចូលទៅក្នុង​តំបន់​ហ្គាហ្សា។

លោក Patel បានប្រាប់​ថា សហរដ្ឋអាមេរិកបានមើលឃើញ «វឌ្ឍនភាពមួយចំនួន» លើការអនុញ្ញាតឲ្យផ្តល់ជំនួយ រួមទាំងការបើកច្រកថ្មីចូលទៅក្នុងហ្គាហ្សា។ លោកថា៖ «បន្ទាប់ពីរយៈពេល​៣០​ថ្ងៃ​នេះ យើងកំពុងធ្វើការ​ប៉ាន់ស្មាន និងវាយតម្លៃជានិច្ច ហើយប្រសិនបើយើងមិនឃើញមាន​ដំណើរការ​ជាប់លាប់ ប្រសិនបើយើងមិនឃើញលទ្ធផលនៅលើមូលដ្ឋានទេនោះ យើងនឹងធ្វើការវាយតម្លៃសមស្របអំពីការអនុលោម​របស់ពួកគេជាមួយ​នឹង​ច្បាប់​អន្តរជាតិ»៕

ដោយ៖ ឈាង