ព័ត៌មានអន្ដរជាតិ

ចារកម្មអាមេរិក៖ ការវាយប្រហារនុយក្លេអ៊ែរទំនងជាមិនកើតឡើង ទោះមានការព្រមានពី ពូទីន

បានផុស

២ years មុន

នៅ

ថ្ងៃព្រហស្បតិ៍ ២៨ វិច្ឆិកា ២០២៤

ដោយ

Chheang

ការអនុញ្ញាតឲ្យអ៊ុយក្រែនបាញ់អាវុធអាមេរិកចូលកាន់តែជ្រៅទៅក្នុងប្រទេសរុស្ស៊ី ទំនងមិនបង្កើនហានិភ័យនៃការវាយប្រហារនុយក្លេអ៊ែរនោះទេ បើទោះជាប្រធានាធិបតីរុស្ស៊ី លោក វ្ល៉ាឌីមៀរ ពូទីន បានធ្វើការព្រមានក៏ដោយ។ នេះបើយោងតាមការចុះផ្សាយរបស់ទីភ្នាក់ងារព័ត៌មាន Reuters នៅថ្ងៃទី២៨ខែវិច្ឆិកាឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មន្ត្រីជាន់ខ្ពស់ពីររូប សមាជិកសភាមួយរូប និងជំនួយការសភាពីររូប បានប្រាប់ Reuters អំពីបញ្ហានេះថា យ៉ាងណា រុស្ស៊ីទំនងជានឹងពង្រីកយុទ្ធនាការនៃការបំផ្លិចបំផ្លាញប្រឆាំងនឹងគោលដៅនៅអឺរ៉ុប ដើម្បីបង្កើនសម្ពាធលើលោកខាងលិចជុំវិញការគាំទ្ររបស់ខ្លួនសម្រាប់ទីក្រុងកៀវ។

ការវាយតម្លៃជាបន្តបន្ទាប់នៃការស៊ើបការណ៍សម្ងាត់ក្នុងរយៈពេលប្រាំពីរខែកន្លងមកនេះ បានសន្និដ្ឋានថា ការកើនឡើងជម្លោះនុយក្លេអ៊ែរ ទំនងជាមិនកើតឡើងបណ្ដាលមកពីការសម្រេចចិត្តបន្ធូរបន្ថយការរឹតបន្តឹងលើការប្រើប្រាស់អាវុធអាមេរិករបស់អ៊ុយក្រែននោះទេ។

ជំនួយការសភាម្នាក់ បានប្រាប់ថា៖ «ការវាយតម្លៃនៅតែដូចគ្នាដដែល។ មីស៊ីល ATACM នឹងមិនផ្លាស់ប្ដូរវិធីសាស្ត្រប្រើប្រាស់នុយក្លេអ៊ែររបស់រុស្ស៊ីឡើយ»។

ការបាញ់មីស៊ីលបាលិស្ទិកថ្មីរបស់រុស្ស៊ីកាលពីសប្តាហ៍មុន ត្រូវអ្នកវិភាគនិយាយថា ជាការព្រមានដល់ទីក្រុងវ៉ាស៊ីនតោន និងសម្ព័ន្ធមិត្តអឺរ៉ុប។

ប្រភពពីមន្ត្រីអាមេរិកម្នាក់ បានរៀបរាប់ថា ទោះមិនប្រើនុយក្លេអ៊ែរ តែរុស្ស៊ីនឹងព្យាយាមវាយបកប៉ះប៉ូវនូវអ្វីដែលខ្លួនយល់ឃើញថាជាការកើនឡើងភាពតានតឹងរបស់សហរដ្ឋអាមេរិក។

សូមបញ្ជាក់ថា រដ្ឋមន្ត្រីការបរទេសរុស្ស៊ី លោក Sergey Lavrov បានប្រាប់ថា អ៊ុយក្រែន បានយកមីស៊ីល ATACMS អាមេរិក បាញ់ចូលរុស្ស៊ីជាថ្មី ចាប់ពីថ្ងៃទី២៣ខែវិច្ឆិកាមក ដោយវាយប្រហារតំបន់ Kursk បណ្តាលឲ្យខូចខាតសំណង់ហេដ្ឋារចនាសម្ព័ន្ធ និងបង្ករបួសស្នាមដល់កងកម្លាំងក៏ដូចជាជនស៊ីវិល។

ជាការឆ្លើយតប លោក Lavrov បញ្ជាក់កាលពីថ្ងៃទី២៦ខែវិច្ឆិកាថា រុស្ស៊ី បានរៀបចំវិធានការសងសឹករួចជាស្រេចហើយ។ ទោះបីជាយ៉ាងណាក៏ដោយ រដ្ឋមន្ត្រីរូបនេះ មិនបានពន្យល់លម្អិតទេថាតើ រុស្ស៊ីនឹងចាត់វិធានការអ្វីខ្លះដើម្បីសងសឹកទៅលើអ៊ុយក្រែនវិញ៕

ដោយ៖ ឈាង

ចុចអាន៖ រុស្ស៊ី រៀបផែនការរួចហើយ ដើម្បីសងសឹកអ៊ុយក្រែន ក្រោយយកមីស៊ីលអាមេរិក បាញ់ចូលដីខ្លួន ឥតឈប់