ព័ត៌មានអន្ដរជាតិ

រដ្ឋបាលលោក បៃដិន ត្រៀមឲ្យសព្វាវុធតម្លៃ ៧២៥លានដុល្លារ ទៅអ៊ុយក្រែន មុនចាកចេញពីតំណែង

បានផុស

២ years មុន

នៅ

ថ្ងៃអង្គារ ៣ ធ្នូ ២០២៤

ដោយ

Chheang

ដើម្បីគាំទ្រក្រុងកៀវប្រឆាំងនឹងការឈ្លានពានពីរុស្សី រដ្ឋបាលជិតផុតអាណត្តិរបស់លោក ចូ បៃដិន បានសម្រេចនឹងបញ្ជូនសព្វាវុធតម្លៃ ៧២៥លានដុល្លារដល់ប្រទេសអ៊ុយក្រែនបន្ថែមទៀត។ នេះបើយោងតាមការលើកឡើងរបស់លោក Antony Blinken រដ្ឋមន្ត្រីការបរទេសអាមេរិក កាលពីថ្ងៃទី២ខែធ្នូឆ្នាំ២០២៤។

លោក ហ្សេនលេនស្គី មេដឹកនាំអ៊ុយក្រែន និងលោក បៃដិន ប្រធានាធិបតីអាមេរិក (រូបភាព៖ Getty)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Blinken បាននិយាយនៅក្នុងសេចក្ដីថ្លែងការណ៍មួយថា ជំនួយរបស់លោក បៃដិន ដល់អ៊ុយក្រែន មុនចាកចេញពីតំណែងជាប្រធានាធិបតីអាមេរិកនាខែមករាខាងមុខ មានដូចជា មីស៊ីល Stinger រំសេវសម្រាប់ប្រព័ន្ធបាញ់រ៉ុកកែត HIMARS ដ្រូន និងគ្រាប់មីន។

លោក Blinken បានរៀបរាប់ថា៖ «សហរដ្ឋអាមេរិក និងប្រជាជាតិជាង៥០ ឈររួមគ្នា ដើម្បីធានាថា អ៊ុយក្រែនមានសមត្ថភាពដែលត្រូវការក្នុងការការពារខ្លួនប្រឆាំងនឹងការលុកលុយពីរុស្ស៊ី»។

សេចក្តីប្រកាសនេះ បានបង្ហាញពីការកើនឡើងយ៉ាងខ្លាំងនៃទំហំប្រើប្រាស់ច្បាប់ជំនួយ Presidential Drawdown Authority (PDA) របស់លោក បៃដិន ដែលអនុញ្ញាតឲ្យសហរដ្ឋអាមេរិកទាញយកពីស្តុកអាវុធបច្ចុប្បន្នរបស់ខ្លួន ដើម្បីជួយសម្ព័ន្ធមិត្តក្នុងគ្រាអាសន្ន។

ច្បាប់ជំនួយ PDA ជាធម្មតាមានចាប់ពី ១២៥លានដុល្លារដល់ ២៥០លានដុល្លារ។ លោក បៃដិន មានទឹកប្រាក់ប៉ាន់ស្មានពី ៤ទៅ៥ពាន់លានដុល្លារនៅក្នុងច្បាប់ PDA ដែលត្រូវបានអនុញ្ញាតរួចហើយដោយសភាអាមេរិក។ លោក បៃដិន ត្រូវបានគេរំពឹងថានឹងប្រើប្រាស់ថវិកាទាំងនោះសម្រាប់អ៊ុយក្រែន មុនពេលប្រធានាធិបតីទើបជាប់ឆ្នោតរបស់គណបក្សសាធារណរដ្ឋលោក ដូណាល់ ត្រាំ ចូលកាន់តំណែងនៅថ្ងៃទី២០ខែមករាឆ្នាំ២០២៥៕

ដោយ៖ ឈាង