កូរ៉េខាងជើងភ័យខ្លាចមានមេរោគរីករាលដាលពីប៉េងប៉ោងកូរ៉េខាងត្បូង

អាជ្ញាធរ​កូរ៉េ​ខាង​ជើង​កំពុង​ព្រមាន​​ដល់​ប្រជាពលរដ្ឋ​របស់​ខ្លួន ឱ្យ​ជៀស​វាង​វត្ថុ​ពី​ប៉េងប៉ោង​របស់​កូរ៉េ​ខាង​ត្បូង ដោយ​អះអាង​ថា​ មាន​មេរោគឆ្លង។ នេះបើយោងតាមការចេញផ្សាយរបស់សារព័ត៌មាន ​NK កាលពីថ្ងៃទី៤ខែធ្នូនេះ។

យោងតាមប្រភពមួយនៅក្នុងខេត្ត South Pyongan នាពេលថ្មីៗនេះ អាជ្ញាធរកូរ៉េខាងជើងថា៖«ដោយសារអំណាចនយោបាយ និងយោធាដែលកំពុងកើនឡើងឥតឈប់ឈររបស់ប្រទេសយើង កូរ៉េខាងត្បូងកំពុងបញ្ជូនសំរាមរិះគន់នយោបាយដោយពាក្យអសុរោះនិងធ្វើឱ្យប៉ះពាល់ដល់សិទ្ធិអំណាចនៃការដឹកនាំកំពូលរបស់យើង។ ពួកគេថាកូរ៉េខាងត្បូងកំពុងអណ្តែតវត្ថុដែលប្រឡាក់ដោយមេរោគលើមេឃដែលគំរាមកំហែងដល់អាយុជីវិតប្រជាជនកូរ៉េខាងជើង»។

កូរ៉េខាងជើងកាលពីខែមុនក៏បានផ្សព្វផ្សាយពាក្យចចាមអារ៉ាមថា របស់របរក្នុងប៉េងប៉ោងអាចឆ្លងមេរោគ ខណៈកូរ៉េខាងត្បូងព្យាយាម​បំផ្លាញ​ប្រព័ន្ធ​សង្គម​និយម​របស់​យើង​ដោយ​ការ​សាយភាយ​មេរោគ​ទូទាំង​ប្រទេស ប៉ុន្តែពេលនេះ របបនេះ បានអះអាងយ៉ាងច្បាស់ថា ការផ្សាយពីមេរោគមានវត្តមានក្នុងគោលបំណងបំផុសការប្រុងប្រយ័ត្នជាសាធារណៈប៉ុណ្ណោះ។

ទោះជាយ៉ាងណាក៏ដោយ ការអះអាងរបស់របបនេះថា ប៉េងប៉ោងរបស់កូរ៉េខាងត្បូងផ្ទុកទៅដោយមេរោគបានកើតមានជារឿងកំប្លែងសម្រាប់ប្រជាជនកូរ៉េខាងជើងជាច្រើន។ គ្មាននរណាម្នាក់ជឿថាវត្ថុទាំងនោះមានមេរោគទេ។ ពួកគេ​​គិតថា​ខ្លួន​មានសំណាងទៅវិញទេប្រសិនបើពួគគេរកឃើញប៉េងប៉ោងទាំងនោះ​។

ប្រជាជនកូរ៉េខាងជើងបានដឹងរួចមកហើយថា ប៉េងប៉ោងមានរូបិយបណ្ណបរទេស អាហារសម្រន់ និងរបស់របរមានប្រយោជន៍ផ្សេងទៀត ខណៈដែលេពួកគេព្យាយាមស្វែករកប៉េងប៉ោងទាំងនោះមុនមានអ្នកផ្សេងរកឃើញទៀតផង។ពេលខ្លះ ជនជាតិកូរ៉េខាងជើងដុតវត្ថុមិនចាំបាច់ដែលរកឃើញនៅក្នុងប៉េងប៉ោង និងយករបស់ខ្លះដែលនៅសល់។ អ្នក​ខ្លះបាន​ញាំបាយ និង​អាហារ​សម្រន់​របស់​កូរ៉េ​ខាង​ត្បូង​ដែលមានក្នុងប៉េងប៉ោងទៀតផង៕

អត្ថបទ៖ ប៊ុន សុភាព