​អតី​តរដ្ឋមន្ត្រី​ការពារជាតិ​កូរ៉េ​ប៉ង​ធ្វើ​អត្តឃាត​នៅ​មន្ទីរ​ឃុំ​ឃាំង​​

ទីភ្នាក់ងារ​សារ​ព័ត៌មាន​កូរ៉េ​ខាងត្បូង​ បាន​ផ្សាយ​នៅ​មុន​នេះ​ថា ​អតីតរដ្ឋមន្ត្រីក្រសួងការពារជាតិកូរ៉េ​ខាងត្បូង លោក Kim Yong-hyun ​ប៉ុនប៉ង​ធ្វើ​អត្ត​ឃាត​​នៅ​ក្នុង​មន្ទីរ​ឃុំឃាំង​។​

លោក Kim Yong-hyun ​ត្រូវ​បាន​ចាប់​ខ្លួន​​​​​​ក្នុង​បទ​ចោទ​ប្រកាន់​​​​ចូលរួម​​អនុវត្ត​​​ច្បាប់​អាជ្ញាសឹក​​ដែល​ប្រកាស​ដោយ​ប្រធានាធិបតី​ Yoon Suk Yeol កាលយប់​​ថ្ងៃ​អង្គារ​​ទី​​៣​ខែ​​ធ្នូ​ ​ដោយ​នាំ​ទៅ​ដល់​ភាព​វឹក​វរ​​ ចលាចល​ពេញ​ប្រទេស​កូរ៉េខាង​ត្បូង​ មុន​​​​រដ្ឋសភា​​ប្រជុំ​អនុ​ម័ត​ច្រាន​ចោល​​ច្បាប់​អាជ្ញា​សឹក​ប្រកាស​ដោយ​ប្រធានាធិបតី​​​​ប្រមាណ​៦​ម៉ោង​ក្រោយ​មក។

​សា​រព័ត៌មាន Yonhap បាន​រាយការណ៍​ថា​ មន្ត្រី​នៃ​មណ្ឌល​​កែប្រែ​ បាននិយាយកាលពីថ្ងៃពុធថា​ លោក Kim Yong-hyun បានព្យាយាម​ធ្វើ​អត្ត​ឃាត​នៅឯមន្ទីរឃុំឃាំងនៅភាគខាងកើតទីក្រុងសេអ៊ូល ជាកន្លែងដែលគាត់កំពុងត្រូវបានឃុំខ្លួនពីបទបះបោរទាក់ទងនឹងការស៊ើបអង្កេតច្បាប់អាជ្ញាសឹក។

​​សេចក្តី​រាយការណ៍​ បាន​បន្តថា បន្ទាប់ពីការប៉ុនប៉ងមិនបានសម្រេច លោក Kim ត្រូវបានឃុំខ្លួនក្នុងបន្ទប់ការពារ ហើយសុខភាពរបស់គាត់នៅតែមានស្ថិរភាព លោក Shin Yong-hae ប្រធានមជ្ឈមណ្ឌលកែប្រែ​បានប្រាប់សមាជិកសភាក្នុងអំឡុងពេលសវនាការសភា។

អតីត​រដ្ឋមន្ត្រី​ការពារ​ជាតិ Kim Yong-hyun រួម​ទាំង​ថ្នាក់​ដឹកនាំ​កំពូល​ៗ​ជា​ច្រើន​ទៀតរបស់​កូរ៉េខាងត្បូង ប្រឈមការ​ស៊ើបអង្កេត​​របស់​ក្រុម​ប្រឹក្សា​​ពិសេស​មួយ​ដែល​បង្កើត​ឡើង​ដោយ​រដ្ឋសភា។

​ក្រុមប្រឹក្សា​ពិសេស​​​ដែល​នឹង​ពិនិត្យ​លើ​ទិដ្ឋភាព​ច្បាប់​ និង​ការ​សម្រេច​ទោស​​​ នឹង​ស៊ើប​អង្កេត​​មេដឹកនាំកំពូល​ៗ​របស់​កួរ៉េខាងត្បូង រាប់​ចាប់​តាំងពីប្រធានាធិបតី Yoon Suk Yeol ​នាយសេនាធិការកងទ័ព លោក Park An-su ដែលត្រូវបានតែងតាំងជាមេបញ្ជាការច្បាប់អាជ្ញាសឹក, នាយករដ្ឋមន្ត្រី Han Duck-soo, មេបញ្ជាការប្រឆាំងចារកម្ម Yeo In-hyung និង​តំណាង​រាស្រ្តគណបក្ស​អំណាច​ប្រជាជន​លោក Choo Kyung-ho ដែល​ទើប​ចុះ​ចេញ​ពី​តំណែង​ជា​ប្រធាន​ជាន់​ខ្ពស់​នៃ​គណបក្ស​កាន់​អំណាចផងដែរ។ អ្នកទាំងអស់ សុទ្ធតែ​ត្រូវរងការចោទ​ប្រកាន់​ថា ​ជំរុញឲ្យមាន​ការ​បះបោរ​ដោយ​ផ្ទាល់​ឬ​ចូលដៃចូលជើង​ឃុបឃិត​គ្នា​ក្នុង​អំពើ​បះបោរ។

​សារ​​ព័ត៌មាន Korea Herald ​បាន​ផ្សាយ​​កាល​ពីថ្ងៃ​​អង្គារ​ឲ្យដឹង​ថា រដ្ខសភា​កូរ៉េ​អនុសេចក្តីព្រាងច្បាប់នេះដោយសំឡេង២១០ទល់នឹង៦៣ ខណៈអនុបវាទ១៤សំឡេង៕​