ព័ត៌មានអន្ដរជាតិ

លោក Blinken៖ ចិនទំនងឃាត់ ពូទីន មិនឲ្យប្រើអាវុធនុយក្លេអ៊ែរ

បានផុស

១ year មុន

នៅ

ថ្ងៃអាទិត្យ ៥ មករា ២០២៥

ដោយ

Chheang

រដ្ឋមន្ត្រីការបរទេសអាមេរិក លោក Antony Blinken បាននិយាយនៅក្នុងបទសម្ភាសន៍មួយជាមួយកាសែត Financial Times ថា ប្រទេសចិនប្រហែលជាបានពិភាក្សាជាមួយលោកប្រធានាធិបតី វ្ល៉ាឌីមៀរ ពូទីន ពីការពង្រាយអាវុធនុយក្លេអ៊ែរចំពេលមានសង្រ្គាមរបស់រុស្ស៊ីប្រឆាំងនឹងអ៊ុយក្រែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីក្រុងប៉េកាំង បានក្លាយជាសម្ព័ន្ធមិត្តឈានមុខគេ និងជាអ្នកគាំទ្រផ្នែកហិរញ្ញវត្ថុរបស់ទីក្រុងមូស្គូ ចាប់តាំងពីការលុកលុយអ៊ុយក្រែនកាលពីខែកុម្ភៈឆ្នាំ២០២២ ទោះបីជាចិនបានបដិសេធការចោទប្រកាន់ថាបានគាំទ្រកិច្ចខិតខំប្រឹងប្រែងយោធារបស់រុស្ស៊ីក៏ដោយ។

លោក Blinken បានប្រាប់ថា ចិនប្រហែលជាបានបញ្ចេញឥទ្ធិពលរបស់ខ្លួន ដើម្បីឃាត់លោក ពូទីន មិនឲ្យប្រើប្រាស់អាវុធនុយក្លេអ៊ែរ។

លោក Blinken បានបន្តថា ការដែលរុស្ស៊ីពិចារណាលើការប្រើប្រាស់អាវុធនុយក្លេអ៊ែរ គឺជារឿងដែលធ្វើឲ្យសហរដ្ឋអាមេរិកមានការព្រួយបារម្ភយ៉ាងខ្លាំង។

លោកក៏បានអះអាងដែរថា ចិនប្រហែលជាបានធ្វើអន្តរាគមន៍ក្នុងលក្ខណៈស្រដៀងគ្នានេះ បន្ទាប់ពីសហរដ្ឋអាមេរិកបានព្រមានទីក្រុងប៉េកាំងថា លោក ពូទីន គ្រោងនឹងបាញ់បង្ហោះអាវុធនុយក្លេអ៊ែរទៅកាន់ទីអវកាស។

រដ្ឋមន្ត្រីការបរទេសអាមេរិក បានរៀបរាប់ទៀតថា លោក ពូទីន បានទទួលរង «ការបរាជ័យជាយុទ្ធសាស្ត្រ» ជាមួយអង្គការណាតូ ខ្លាំងជាងពេលណាណាទាំងអស់ ចាប់តាំងពីការលុកលុយរបស់ខ្លួន ខណៈសមាជិកណាតូបានចំណាយថវិកាពួកគេកាន់តែច្រើនលើការជួយអ៊ុយក្រែន។

សូមបញ្ជាក់ថា កាលពីខែវិច្ឆិកាឆ្នាំ២០២៤ លោក ពូទីន បានចុះហត្ថលេខាលើក្រឹត្យមួយ ដែលបានផ្លាស់ប្តូរគោលនយោបាយនុយក្លេអ៊ែររបស់រុស្ស៊ី បន្ទាប់ពីលោក បៃដិន បានបើកដៃឲ្យអ៊ុយក្រែនវាយប្រហារគោលដៅមួយចំនួនរបស់រុស្ស៊ី ជាមួយនឹងអាវុធរយៈចម្ងាយឆ្ងាយដែលផលិតដោយសហរដ្ឋអាមេរិក៕

ដោយ៖ ឈាង