ព័ត៌មានអន្ដរជាតិ

មីយ៉ាន់ម៉ាផ្តល់អំណោយដំរី៦ក្បាលដល់រុស្ស៊ីរឹតចំណងមិត្តភាពក្នុងទំនាក់ទំនងការទូត៧៥ឆ្នាំ

បានផុស

២ ខែ មុន

នៅ

ថ្ងៃព្រហស្បតិ៍ ១៦ មករា ២០២៥

ដោយ

រដ្ឋាភិបាលយោធាមីយ៉ាន់ម៉ាដែលរក្សាទំនាក់ទំនងល្អជាមួយមហាអំណាចរុស្ស៊ីយ៉ាងល្អូកល្អើនចាប់តាំងពីខ្លួនធ្វើរដ្ឋប្រហារឡើងកាន់អំណាចជិត៤ឆ្នាំនេះ បានប្រើប្រាស់សត្វដំរីជាទូតសុឆន្ទៈក្នុងការពង្រឹងទំនាក់ទំនងប្រទេសទាំងពីរ ដោយបានប្រគល់ដំរីញីចំនួន៥ក្បាលនិងដំរីឈ្មោលចំនួន១ក្បាលទៅឱ្យប្រទេសរុស្ស៊ី។

មន្ត្រីរុស្ស៊ីស្ទាបអង្អែលសត្វដំរីដែលកំពុងស៊ីចំណី ពេលត្រូវបានបញ្ជូនទៅដល់រុស្ស៊ី។ kaluga news

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សារព័ត៌មានរុស្ស៊ី TASS បានរាយការណ៍ក្នុងពេលថ្មីៗនេះ ឲ្យដឹងថា អំណោយសត្វដំរីទាំងនេះ ត្រូវបានធ្វើឡើងដើម្បីអបអរសាទរខួបលើកទី៧៥នៃទំនាក់ទំនងការទូតរវាងប្រទេសរុស្ស៊ីនិងមីយ៉ាន់ម៉ា ដែលរុស្ស៊ីពណ៌នាថា មីយ៉ាន់ម៉ាជាដៃគូរឹងមាំនិងគួរទុកចិត្តនៅអាស៊ីអាគ្នេយ៍។

ប្រទេសមីយ៉ាន់ម៉ាជាដៃគូយូរអង្វែងនិងគួរជាទីទុកចិត្តបានរបស់រុស្ស៊ីនៅអាស៊ីអាគ្នេយ៍។ កិច្ចប្រជុំរវាងមេដឹកនាំប្រទេសទាំងពីរនៅវេទិកាសេដ្ឋកិច្ចចុងបូព៌ា (Eastern Economic Forum) ក្នុងឆ្នាំ២០២២ បានផ្តល់នូវថាមពលដ៏ខ្លាំងចំពោះការអភិវឌ្ឍទំនាក់ទំនងទ្វេភាគី។

នាយកក្រុមបង្វឹកសត្វបាននិយាយថា ដំរីចំនួន៦ក្បាលជាមួយនឹងគ្រូបង្វឹក៣នាក់និងពេទ្យសត្វម្នាក់បានធ្វើដំណើរតាមយន្តហោះចំណាយពេលជាងមួយថ្ងៃ និងបានឈប់ចាក់សាំងចំនួន២ដងមុននឹងមកដល់គោលដៅ (រុស្ស៊ី)។

ប្រភពបន្តថា ឯកអគ្គរដ្ឋទូតមីយ៉ាន់ម៉ាប្រចាំនៅរុស្ស៊ីបាននិយាយថា ការជ្រើសរើសសត្វដំរីទាំងនេះត្រូវបានអនុវត្តន៍ក្រោមការត្រួតពិនិត្យយ៉ាងយកចិត្តទុកដាក់របស់ប្រមុខដឹកនាំមីយ៉ាន់ម៉ា លោក មីន អ៊ុងឡាំង។

អ្នកនាំពាក្យក្រសួងការបរទេសរុស្ស៊ីបានថ្លែងអំណរគុណចំពោះប្រទេសមីយ៉ាន់ម៉ានិងបានថតរូប ខណៈពេលកំពុងឱ្យចំណីដល់សត្វដំរីទាំងនោះ។

សត្វដំរីត្រូវបានគេលើកតម្កើងក្នុងប្រទេសមីយ៉ាន់ម៉ាថា ជានិមិត្តរូបនៃអំណាចនិងសំណាងល្អ។ ដោយជំហរការទូតរបស់មីយ៉ាន់ម៉ានេះ គឺជាការលើកតម្កើងពីតួនាទីរបស់សត្វដំរីក្នុងកិច្ចខិតខំប្រឹងប្រែងលើកកម្ពស់ទូតសុច្ឆន្ទៈ និងកិច្ចសហប្រតិបត្តិការអន្តរជាតិ ដែលបន្តពីការផ្តួចផ្តើមឡើងស្រដៀងគ្នាក្នុងការបញ្ជូនសត្វដំរីទៅប្រទេសជប៉ុននៅឆ្នាំ២០២៤៕

ដោយ រ៉ាន់ រើយ