ក្រុមរដ្ឋមន្ត្រី​អារ៉ាប់​ បដិសេធ​សំណើ​លោក ត្រាំ ក្នុង​ការ​បញ្ជូន​ជនជាតិ​ប៉ាឡេស្ទីន​ចេញ​ពី​ហ្គាហ្សា

រដ្ឋមន្ត្រីការបរទេសអារ៉ាប់​ជា​ច្រើន កាលពីថ្ងៃ​​សៅរ៍​ទី​១​ខែ​កុម្ភៈ​ឆ្នាំ​២០២៥​បានច្រានចោលការផ្ទេរជនជាតិប៉ាឡេស្ទីនចេញពីទឹកដីរបស់ពួកគេ បើ​ទោះ​បី​ជា​នៅ​ក្នុងកាលៈទេសៈណាក៏ដោយ ដោយបង្ហាញពីជំហររួបរួមប្រឆាំងនឹងការអំពាវនាវរបស់ប្រធានាធិបតីសហរដ្ឋអាមេរិក លោក ដូណាល់ ត្រាំ ដែលឲ្យអេហ្ស៊ីប និងហ្ស៊កដានី ទទួលយកអ្នកស្រុកនៅតំបន់ហ្គាហ្សាស្ទ្រីប។

នៅក្នុងសេចក្តីថ្លែងការណ៍រួមមួយបន្ទាប់ពីកិច្ចប្រជុំនៅទីក្រុងគែរ រដ្ឋមន្ត្រីការបរទេស និងមន្ត្រីមកពីប្រទេសអេហ្ស៊ីប ហ្ស៊កដានី អារ៉ាប៊ីសាអូឌីត កាតា អេមីរ៉ាតអារ៉ាប់រួម អាជ្ញាធរប៉ាឡេស្ទីន និងសម្ព័ន្ធអារ៉ាប់ បាននិយាយថា ទង្វើបែបនេះនឹងគំរាមកំហែងដល់ស្ថិរភាពក្នុងតំបន់ ធ្វើ​ឲ្យ​រីករាលដាលជម្លោះ និងបំផ្លាញការរំពឹងទុកសម្រាប់សន្តិភាព។

សេចក្ដី​ថ្លែងការណ៍​រួម​ដដែល​នេះ បាន​ប​ន្ថែម​ថា៖ «យើងបញ្ជាក់ពីការបដិសេធរបស់យើងចំពោះ (ការប៉ុនប៉ងណាមួយ) ក្នុងការសម្របសម្រួលសិទ្ធិដែលមិនអាចកាត់ផ្តាច់បានរបស់ប៉ាឡេស្ទីន មិនថាតាមរយៈសកម្មភាពតាំងទីលំនៅ ឬការបណ្តេញចេញ ឬការបញ្ចូលដី ឬតាមរយៈការដកដីចេញពីម្ចាស់របស់ខ្លួន … ក្នុងទម្រង់ណាមួយ ឬក្នុងកាលៈទេសៈណាមួយ ឬយុត្តិកម្មណាមួយក៏​ដោយ»។

ពួកគេបានទន្ទឹងរង់ចាំធ្វើការជាមួយរដ្ឋបាលរបស់លោក ត្រាំ ដើម្បីសម្រេចបាននូវសន្តិភាពដ៏ត្រឹមត្រូវ និងទូលំទូលាយនៅមជ្ឈិមបូព៌ា ដោយផ្អែកលើដំណោះស្រាយរដ្ឋពីរ។

កិច្ចប្រជុំនេះ ធ្វើ​ឡើងបន្ទាប់ពី លោក ត្រាំ បាននិយាយកាលពីសប្តាហ៍មុនថា អេហ្ស៊ីប និងហ្ស៊កដានី គួរតែទទួលយកជនជាតិប៉ាឡេស្ទីនពីតំបន់ហ្គាហ្សា ហើយលោកបានហៅ​​ទីនោះ​ថាជា «កន្លែងកម្ទេច» បន្ទាប់ពីការទម្លាក់គ្រាប់បែករបស់អ៊ីស្រាអែលរយៈពេល ១៥​ខែ ដែលបានធ្វើឲ្យប្រជាជនភាគច្រើន​ក្នុង​ចំណោម​មនុស្ស ២,៣​លាននាក់គ្មានផ្ទះសម្បែងរស់នៅ។ ក្រុម​អ្នក​រិះគន់​បាន​ហៅ​ការ​លើក​ឡើង​របស់​លោក ត្រាំ ​ថា​មាន​ន័យ​ធៀប​នឹង​ការ​បោស​សម្អាត​ជាតិ​សាសន៍​ប៉ាឡេស្ទីន។

សូម​បញ្ជាក់​ថា រាល់ការលើកឡើងដែលប៉ាឡេស្ទីនចាកចេញពីតំបន់ហ្គាហ្សា ដែលជាទឹកដីដែលពួកគេចង់បង្កើត​ជា​រដ្ឋឯករាជ្យនោះ គឺជាការប្រមាថដល់ថ្នាក់ដឹកនាំប៉ាឡេស្ទីនជាច្រើនជំនាន់ ហើយត្រូវបានបដិសេធម្តងហើយម្តងទៀតដោយរដ្ឋអារ៉ាប់ចាប់តាំងពីសង្រ្គាមហ្គាហ្សាបានចាប់ផ្តើមនៅក្នុងខែតុលា​ឆ្នាំ​២០២៣។

ហ្ស៊កដានី បាន​ទទួល​យក​​ជនជាតិប៉ាឡេស្ទីនជាច្រើនលាននាក់រួចទៅហើយ ខណៈដែល​ជនជាតិ​ប៉ាឡេស្ទីន​រាប់ម៉ឺននាក់​ទៀត​កំពុង​រស់នៅក្នុងប្រទេសអេហ្ស៊ីប។ ក្រសួងការបរទេស​អេហ្ស៊ីប និងហ្ស៊កដានី បានច្រានចោលការលើកឡើងរបស់លោក ត្រាំ ក្នុងប៉ុន្មានថ្ងៃថ្មីៗនេះ។

ក្រុម​រដ្ឋមន្ត្រីអារ៉ាប់ក៏បានស្វាគមន៍ចំពោះផែនការរបស់អេហ្ស៊ីប ក្នុងការរៀបចំសន្និសីទអន្តរជាតិមួយជាមួយអង្គការសហប្រជាជាតិ ដែលនឹងផ្តោតលើការកសាងតំបន់ហ្គាហ្សាឡើងវិញ ដែលត្រូវ​បាន​កម្ទេច​ស្ទើរ​តែ​ទាំង​ស្រុង​ក្នុងអំឡុងពេលសង្គ្រាម ១៥​ខែរវាងអ៊ីស្រាអែល និងក្រុមហាម៉ាស។ មិនទាន់មានកាលបរិច្ឆេទកំណត់សម្រាប់សន្និសីទនៅឡើយទេ៕

ដោយ៖ ឈាង