ព័ត៌មានអន្ដរជាតិ

UN៖ មានការវាយប្រហាររបស់អ៊ីស្រាអែល ៣៦លើកសម្លាប់សុទ្ធតែស្ត្រីនិងកុមារសុទ្ធតែម្តង

បានផុស

១ year មុន

នៅ

ថ្ងៃសៅរ៍ ១២ មេសា ២០២៥

ដោយ

អង្គការសហប្រជាជាតិបានឲ្យដឹងថា ជនរងគ្រោះស្លាប់ក្នុងការវាយប្រហាររបស់អ៊ីស្រាអែលនៅតំបន់ហ្គាហ្សា សុទ្ធតែជាស្ត្រី និងកុមារប៉ាឡេស្ទីន ក្នុងការវាយប្រហារយ៉ាងហោចណាស់៣៦លើកចាប់តាំងពីពាក់កណ្តាលខែមីនាមក។ នេះបើយោងតាមការចេញផ្សាយរបស់សារប័ត៌មាន Al Jazeera នៅថ្ងៃទី១២ខែមេសានេះ។

លោកស្រី Ravina Shamdasani អ្នកនាំពាក្យរបស់ឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សបាននិយាយកាលពីថ្ងៃសុក្រថា ការិយាល័យលោកស្រីបានកត់ត្រាការវាយប្រហាររបស់អ៊ីស្រាអែលចំនួន២២៤លើកលើអគារលំនៅដ្ឋាន និងតង់ជំរំជនភៀសខ្លួននៅតំបន់ហ្គាហ្សាចាប់ពីថ្ងៃទី១៨ខែមីនាដល់ថ្ងៃទី០៩ខែមេសា។ អ្នកស្រីបាននិយាយថា៖«នៅក្នុងចំណោមការវាយប្រហារទាំងអស់ មាន៣៦លើកមានអ្នកស្លាប់មានតែស្ត្រីនិងកុមារប៉ុណ្ណោះ»។

ការរកឃើញនេះកើតឡើងនៅពេលដែលការវាយប្រហាររបស់អ៊ីស្រាអែលលើតំបន់ហ្គាហ្សាបានសម្លាប់ជនជាតិប៉ាឡេស្ទីនជាង១៥០០នាក់ចាប់តាំងពីបទឈប់បាញ់ត្រូវបានបំពានជាថ្មីកាលពីខែមីនា។ នេះបើយោងតាមតួលេខពីក្រសួងសុខាភិបាលប៉ាឡេស្ទីន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្របពេលជាមួយគ្នានេះអ៊ីស្រាអែលក៏បិទផ្លូវផ្ដល់ជំនួយទាំងស្រុងដែលនាំឱ្យអង្គការសហប្រជាជាតិ និងក្រុមសិទ្ធិមនុស្សព្រមានថាស្បៀងអាហារ ទឹក ថ្នាំពេទ្យ និងការផ្គត់ផ្គង់សំខាន់ៗផ្សេងទៀតកំពុងអស់យ៉ាងឆាប់រហ័ស។ អគ្គលេខាធិការអង្គការសហប្រជាជាតិ លោក Antonio Guterres បានប្រាប់អ្នកយកព័ត៌មាននៅទីក្រុងញូវយ៉កកាលពីដើមសប្តាហ៍នេះថា «រយៈពេលជាងមួយខែនេះគ្មានជំនួយទៅកាន់តំបន់ហ្គាហ្សាទេ និងថាហ្កាហ្សាគឺជាវាលពិឃាដ ហើយជនស៊ីវិលស្ថិតក្នុងរង្វិលជុំស្លាប់គ្មានទីបញ្ចប់»។

ទោះយ៉ាងណាអ៊ីស្រាអែលបានប្តេជ្ញាថានឹងបន្តការវាយលុកដណ្តើមយកទឹកដីថ្មីនៅតំបន់ហ្គាហ្សាភាគខាងត្បូងថែមទៀត។ យោធាអ៊ីស្រាអែលក៏បានចេញបញ្ជាជម្លៀសជាបន្តបន្ទាប់ផងដែរ។ បើទីភ្នាក់ងារអង្គការសហប្រជាជាតិសម្រាប់ជនភៀសខ្លួនប៉ាឡេស្ទីន (UNRWA) ជនជាតិប៉ាឡេស្ទីនប្រហែល ៤០០០០នាក់ត្រូវបានផ្លាស់ទីលំនៅដោយបង្ខំនៅទូទាំងតំបន់ហ្គាហ្សា ចាប់តាំងពីបទឈប់បាញ់បានបញ្ចប់នៅថ្ងៃទី ១៨ខែមីនា៕