​ទោះបី​ថ្ងៃឈប់សម្រាក ប្រតិបត្តិការ​ស្វែង​រក​អ្នក​បាត់ខ្លួន​​​កំពុងបន្ត​ និង​គ្រោងបញ្ចប់ថ្ងៃ​១៦មេសា​​

​ទោះបី​ប្រទេស​ថៃ​​​​​​កំពុងឈប់សម្រាក​​​ថ្ងៃ​​បុណ្យចូលឆ្នាំ​ថ្មី​​ក្នុងរយៈពេលវែង ប៉ុន្តែ​​ក្រុមស្វែងរកអ្នកបាត់ខ្លួន​ក្នុង​​ហេតុការ​ណ៍​រលំបាក់​​អគារ​កម្ពស់​៣៣​ជាន់​ដោយសារ​ការ​ទទួល​​រង​ឥទ្ធិពល​​​ពីគ្រោះ​រញ្ជួយ​ដី​​​​កើត​ឡើង​​នៅ​ប្រទេស​មីយ៉ាន់ម៉ា កំពុង​ប្រតិបត្តិការ​យ៉ាងមមាញឹក ដោយរំពឹង​បញ្ចប់​នៅ​ថ្ងៃ​១៦ខែមេសា​ខាងមុខ​នេះ។​

ក្រុម​អ្នក​ជួយ​សង្គ្រោះ​​​និង​ស្វែងរក​​​អ្នក​​​បាត់​​​ខ្លួន​ បាន​បន្ត​ប្រតិបត្តិការ​​ការងារ​របស់​ពួកគេ​​​ក្នុងអំឡុង​ពេលនៃ​ការ​ឈប់សម្រាក​ពិធី​បុណ្យ​ចូលឆ្នាំ និង​​សង្ក្រាន្ត​ប្រចាំ​​ឆ្នាំ។ សារព័ត៌មាន Khaosod បាន​រាយការណ៍​​​​នៅ​យប់ថ្ងៃទី​​១៣ខែ​​មេសា​ថា​ ក្រុមការងារ​​​ស្វែងរកកំពុងប្រើគ្រឿងចក្រធុនធ្ងន់ ដើម្បីជីក និងយកឧបសគ្គនៅក្នុងកម្ទេចកម្ទី​ដ៏​ធំដែលបាន​ដួល​រលំ​ក្នុង​អំឡុងពេលរញ្ជួយដីនៅមីយ៉ាន់ម៉ាកាលពីថ្ងៃទី២៨​ខែមីនា។

​រហូត​ដល់​​វេលា​ព្រឹក​ថ្ងៃទី​១៣ខែ​មេសា​ ​ចំនួនអ្នកស្លាប់ដែលបាន​រកឃើញ​ពីទីតាំង​ខាង​លើ មាន​ចំនួន​​៣៧​នាក់ ខណៈចំនួន​​អ្នក​បាត់ខ្លួន​ត្រូវ​បាន​រាយការណ៍​ថា​ មាន​ចំនួន​៥៧​នាក់។

ជាមួយគ្នានេះ មន្ត្រីនាយកដ្ឋានស៊ើបអង្កេតពិសេស (DSI) ទូរស័ព្ទទៅ China Railway, Italian-Thai, និង​ក្រុមហ៊ុន​ដៃគូដេញថ្លៃដើម្បីសាកសួរបន្ទាប់ពី​មាន​តម្រុយ​​នៃ​ការ​ផ្ទេរ​លុយនាំឱ្យ​​​ទំនាក់​ទំនង​​​ដល់​នាយកប្រតិបត្តិជនជាតិចិនពីរនាក់។

នាយកដ្ឋានកោសល្យវិច្ច័យមជ្ឈិម មន្ទីរសាធារណការ និងផែនការក្រុង ប៉ូលីស និងរដ្ឋបាលក្រុងបាងកក បានប្រមូលភស្តុតាង រួមមានគំរូដែក និង​សំណាក​ស៊ីម៉ងត៍ សម្រាប់​ការ​ស៊ើបអង្កេត​បន្ថែម​ទៀត។

តាមសេចក្តី​​​​រាយការណ៍​ដដែល​ លោក Anyawut Pho-ampai មកពីមូលនិធិ Ruamkatanyu បាននិយាយថា «ថ្ងៃនេះជាថ្ងៃទី១៦​នៃប្រតិបត្តិការស្វែងរក។ កំដៅខ្លាំងធ្វើឱ្យអស់កម្លាំងយ៉ាងឆាប់រហ័ស ទាមទារឱ្យមានការប្តូរវេន​ក្រុមញឹកញាប់ជាងមុន។ ទោះបីជាមានបុណ្យសង្រ្កាន្តក៏ដោយ យើងបន្តធ្វើការដូចដែលយើងប្តេជ្ញាស្វែងរកអ្នកបាត់ខ្លួនឱ្យបានឆាប់តាមដែលអាចធ្វើទៅបាន។ ខណៈពេលដែលយើងសង្ឃឹមថានឹងបញ្ចប់ការស្វែងរកត្រឹមថ្ងៃទី១៦​ខែមេសា»​។

លោកវរសេនីយ៍ទោ Surawut Rangsai អគ្គនាយករងនៃ DSI បានបង្ហាញថា ប្រតិបត្តិការរបស់ DSI ចែកចេញជាពីរផ្នែក គឺការប្រមូលភស្តុតាង និងការស៊ើបអង្កេត។ ការស៊ើបអង្កេតបានធ្វើឱ្យមានការវិវឌ្ឍយ៉ាងសំខាន់ ដោយមានការ​កំណត់​អ្នកពាក់ព័ន្ធក្នុងសំណុំរឿងប្រតិបត្តិការអាជីវកម្មបរទេស ឬករណីតែងតាំង ដើម្បីផ្តល់ព័ត៌មាននៅចន្លោះថ្ងៃទី១៨ ខែមេសាដល់ថ្ងៃទី១៥ខែឧសភា។

នេះរួមបញ្ចូលទាំងក្រុមហ៊ុន China Railway No. 10 Company Limited ក្រុមហ៊ុន Italian-Thai Development Public Limited និងក្រុមហ៊ុនផ្សេងទៀតដែលបានចូលរួមក្នុងការដេញថ្លៃសម្រាប់ការសាងសង់អគារការិយាល័យសវនកម្មរដ្ឋ។ ការស៊ើបអង្កេតលើផ្លូវហិរញ្ញវត្ថុដំបូងបង្ហាញពីការផ្ទេរប្រាក់ទៅឱ្យបុគ្គលជនជាតិចិនពីរនាក់ ដែលជាព័ត៌មានដែល DSI មាននាពេលបច្ចុប្បន្ន ប៉ុន្តែមិនអាចបង្ហាញព័ត៌មានលម្អិតបន្ថែមបានទេ៕​

ដោយ​​ រ៉ាន់ រើយ​