ព័ត៌មានអន្ដរជាតិ

កងទ័ព Karen មីយ៉ាន់ម៉ា បញ្ជូនជនបរទេស២៧៧នាក់ទៅពិនិត្យសញ្ជាតិ ត្រៀមធ្វើមាតុភូមិនិវត្តន៍

បានផុស

១១ វិនាទី មុន

នៅ

ថ្ងៃសៅរ៍ ១៩ មេសា ២០២៥

ដោយ

កងទ័ពពុទ្ធសាសនាការ៉ែនប្រជាធិបតេយ្យ (DKBA) បានដឹកជញ្ជូនជនបរទេសចំនួន ២៧៧នាក់ ដែលពាក់ព័ន្ធនឹងការការឆបោកតាមអ៉ីនធឺណិត (Call-Center) ទៅកាន់កីឡដ្ឋានក្នុងទីក្រុង Myawaddy ប្រទេសមីយ៉ាន់ម៉ាកាលពីថ្ងៃសុក្រដើម្បីផ្ទៀងផ្ទាត់បញ្ជាក់សញ្ជាតិ មុនពេលធ្វើមាតុភូមិនិវត្តន៍។ នេះបើយោងតាមការចេញផ្សាយរបស់ការសែត Bangkok Post នៅថ្ងៃទី១៩ខែមេសានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការបញ្ជូននេះដោយប្រើរថយន្តចំនួនបួន របស់ទាហាន DKBA ដោយបានផ្លាស់ទីអ្នកជាប់ឃុំជាជនជាតិបរទេសទាំងនោះពីតំបន់គម្រោង Tai Chang 1 ក្បែរភូមិ Chong Kaeb ស្រុក Phop Phra ខេត្ត Tak ទៅកីឡដ្ឋានក្នុងរដ្ឋ Karen។

សកម្មភាពនេះធ្វើឡើងបន្ទាប់ពីមានការតវ៉ាពីសំណាក់អ្នកជាប់ឃុំកាលពីថ្ងៃទី១៣ខែមេសា ដែលបានឈានដល់ការប្រឈមមុខដាក់គ្នាយ៉ាងហិង្សារវាងទាហាន DKBA និងជនបរទេសទាំងនោះ ខណៈដែលពួកគេប៉ុនប៉ងឆ្លងទន្លេ Moei ចូលប្រទេសថៃ។ បើយោងតាមប្រព័ន្ធផ្សព្វផ្សាយនៅ Mae Sot មន្ត្រីមីយ៉ាន់ម៉ានឹងចាប់ផ្ដើមផ្ទៀងផ្ទាត់សញ្ជាតិរបស់អ្នកជាប់ឃុំទាំងនោះមុនពេលនិរទេសទៅកាន់ប្រទេសរៀងៗខ្លួន។

មានការកត់សម្គាល់ថា ប្រតិបត្តិការឆបោកតាមអ៊ីនធឺណិត (Call-Center) បានរីកដុះដាលនៅក្នុងតំបន់ព្រំដែនគ្មានច្បាប់របស់ប្រទេសមីយ៉ាន់ម៉ាអស់រយៈពេលជាច្រើនឆ្នាំ បានទាក់ទាញពលករបរទេសដោយសន្យាថានឹងធ្វើការងារដែលមានប្រាក់ខែខ្ពស់ ប៉ុន្តែចាប់ពួកគេធ្វើជាចំណាប់ខ្មាំង ហើយបង្ខំពួកគេឱ្យធ្វើការបោកប្រាស់តាមអ៊ីនធឺណិត។

អាជ្ញាធរក្នុងប្រទេសមីយ៉ាន់ម៉ាដែលស្ថិតក្រោមសម្ពាធពីប្រទេសចិនជាសម្ព័ន្ធមិត្តដ៏ជិតស្និទ្ធនោះ បានបង្ក្រាបលើប្រតិបត្តិការឆបោកក្នុងប៉ុន្មានខែចុងក្រោយនេះ ជនបរទេសសរុបចំនួន៦១៦៣នាក់ដែលភាគច្រើនមកពីប្រទេសចិនត្រូវបានផ្ទេរទៅកាន់ប្រទេសថៃចាប់តាំងពីថ្ងៃទី ២០ខែកុម្ភៈ មុនការធ្វើមាតុភូមិនិវត្តន៍ទៅកាន់ប្រទេសពួកគេវិញ។

អង្គការសហប្រជាជាតិ បានប៉ាន់ប្រមាណថា មនុស្សរហូតដល់ ១២០ ០០០នាក់ ដែលភាគច្រើនជាបុរសជនជាតិចិន ប្រហែលជាកំពុងធ្វើការនៅក្នុង Call-Center នៅមីយ៉ាន់ម៉ាទាំងបង្ខំ៕