ព័ត៌មានអន្ដរជាតិ

ម៉ាឡេស៊ីនឹងហាមប្រាមការប្រើថង់ប្លាស្ទិកនៅតាមឧទ្យាន និងហាងទំនិញទូទាំងប្រទេស

បានផុស

១ នាទីute មុន

នៅ

ថ្ងៃចន្ទ ២១ មេសា ២០២៥

ដោយ

ប្រទេសម៉ាឡេស៊ីប្រកាសហាមប្រាមការប្រើប្រាស់តថង់ប្លាស្ទិកប្រើតែមួយដង (single use) នៅសួនឧទ្យាន តំបន់ការពារធម្មជាតិ និងកន្លែងលក់រាយ នៅក្នុងការជំរុញប្រទេសប្រយុទ្ធប្រឆាំងនឹងការបំពុលបរិស្ថាន។ នេះបើយោងតាមការចេញផ្សាយរបស់សារព័ត៌មាន VN Express នៅថ្ងៃទី២១ខែមេសានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមរដ្ឋមន្ត្រីក្រសួងធនធានធម្មជាតិ និងនិរន្តរភាពបរិស្ថាន លោក Nik Nazmi Nik Ahmad ការហាមឃាត់នេះនឹងចូលជាធរមាននៅតំបន់ព្រៃធម្មជាតិ ឧទ្យានជាតិនិងរដ្ឋ ឧទ្យានសមុទ្រ និងតំបន់បេតិកភណ្ឌភូមិសាស្ត្រ។ ការហាមប្រាមនេះ ក៏នឹងពង្រីកដល់កន្លែងពាណិជ្ជកម្មអចិន្ត្រៃយ៍ផ្សេងទៀត ដូចជាផ្សារទំនើប ហាងលក់ទំនិញ ស្ថានីយប្រេងឥន្ធនៈ ភោជនីយដ្ឋានអាហារសម្រាន់ និងឱសថស្ថាន។

សេចក្តីប្រកាសនេះធ្វើឡើង បន្ទាប់ពីលោក Nik Nazmi ធ្វើជាប្រធានកិច្ចប្រជុំលើកដំបូងក្នុងឆ្នាំនេះជាមួយរដ្ឋមន្ត្រីបរិស្ថាន និងក្រុមប្រឹក្សាប្រតិបត្តិរដ្ឋ។ លោកសង្កត់ធ្ងន់ថា ការអនុវត្តការហាមប្រាមនេះនឹងមានភាពខុសគ្នានៅទូទាំងរដ្ឋអាស្រ័យលើការត្រៀមខ្លួននិងសមត្ថភាពរបស់ពួកគេ ដោយភាពបត់បែនគឺជាគន្លឹះដើម្បីធានាឱ្យមានការអនុវត្តដោយរលូន។

លោកក៏បានសន្យាថានឹងមានការសម្របសម្រួលកាន់តែជិតស្និទ្ធរវាងអាជ្ញាធរសហព័ន្ធ និងរដ្ឋដើម្បីបង្ក្រាបប្រតិបត្តិការកែច្នៃសំណល់អេឡិកត្រូនិកខុសច្បាប់ ដែលនៅតែបន្តបង្កការគំរាមកំហែងដល់បរិស្ថានយ៉ាងធ្ងន់ធ្ងរ។

គួរបញ្ជាក់ថាថង់ប្លាស្ទិកមានផលប៉ះពាល់អវិជ្ជមានខ្លាំងទៅលើបរិស្ថាន។ ពួកវាត្រូវចំណាយពេលរាប់រយឆ្នាំដើម្បីបំបែកឬរលាយ ហើយការផលិតប្លាស្ទិករួមចំណែកដល់ការបំភាយឧស្ម័នផ្ទះកញ្ចក់ និងការប្រែប្រួលអាកាសធាតុ។ លើសពីនេះ ពួកវាបំពុលដី ផ្លូវទឹក និងជម្រកសត្វព្រៃ ដែលបង្កគ្រោះថ្នាក់ដល់ទាំងប្រព័ន្ធអេកូឡូស៊ី និងសត្វព្រៃ។ ប្រទេសជាច្រើនជាច្រើននៅលើពិភពលោក ក៏កំពុងប្រឈមនិងការកើនឡើងនៃសំណល់ប្លាស្ទិកនេះផងដែរ ដោយប្រទេសនីមួយៗចាត់វិធានការកាត់បន្ថយការប្រើប្រាស់ថង់បំពុលបរិស្ថាននេះរៀងខ្លួនៗ៕