ត្រាំ ព្រមានថា អ៊ុយក្រែន នឹងខ្ទេចឆាប់ៗ បើមិនព្រមចរចាជាមួយ រុស្ស៊ី

ក្នុងបទសម្ភាសជាមួយកាសែត The Atlantic កាលពីដើមសប្តាហ៍នេះ ប្រធានាធិបតីអាមេរិក ដូណាល់ ត្រាំ បានព្រមានថា ប្រទេសអ៊ុយក្រែននឹងខ្ទេចក្នុងពេលឆាប់ៗ បើសិនជាមិនព្រមចូលតុចរចាជាមួយរុស្ស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឆ្លើយតបទៅសំណួរថាតើលោកអាណិតអ៊ុយក្រែនទេ? ប្រមុខរដ្ឋាភិបាលទីក្រុងវ៉ាស៊ីនតោន និយាយថា វាជាការពិត! គោលនយោបាយរបស់លោកគឺជួយទីក្រុងកៀវ ប៉ុន្តែអ៊ុយក្រែនអាចប្រឈមនឹងបរាជ័យនាពេលអនាគដ៏ខ្លីខាងមុខ បើមិនព្រមចូលមកកាន់តុចរចាជាមួយរុស្ស៊ីទេនោះ។ រុស្ស៊ីគឺជាម៉ាស៊ីនសង្គ្រាមដ៏ធំ បើមិនអ៊ីចឹងសាកមើលទៅ។

ស្របពេលជាមួយគ្នានោះដែរ លោកព្រមានថា ការអូសបន្លាយពេលសង្គ្រាមជាបន្តទៀត មិនបាននាំផលល្អអ្វីដល់ប្រទេសនេះនោះទេ។ 

នេះមិនមែនជាលើកដំបូងឡើយដែលលោកត្រាំ ព្រមានអំពីបរាជ័យរបស់អ៊ុយក្រែនក្នុងសង្គ្រាម។ ជាក់ស្តែងកាលពីសប្តាហ៍មុន ប្រធានាធិបតីអាមេរិក ក៏ព្រមានដែរថា អ៊ុយក្រែន អាចបាត់ប្រទេសទាំងមូលតែម្តង បើលោក វ៉ូឡូឌីមៀរ ហ្សេលេនស្គី នៅតែរឹងទទឹងមិនព្រមចូលតុចរចាជាមួយទីក្រុងមូស្គូ។ 

កាលនោះ លោកត្រាំ បានបង្ហាញសារបែបនេះលើបណ្តាញសង្គម Truth Social ហើយថែមទាំងចោទប្រធានាធិបតីអ៊ុយក្រែនជាសាធារណៈថា បានធ្វើឲ្យខូចដល់កិច្ចចរចាសន្តិភាព ព្រោះតែការបដិសេធទទួលស្គាល់តំបន់គ្រីមៀថាជារបស់រុស្ស៊ីផងដែរ។

ក្រោយការព្រមានរបស់លោកត្រាំមិនបានប៉ុន្មានផង មេដឹកនាំវិមានក្រឹមឡាំង វ្ល៉ាឌីមៀរ ពូទីន ស្រាប់តែប្រកាសបើកចិត្តជានិច្ចចំពោះការចរចាសន្តិភាពដោយផ្ទាល់ជាមួយអ៊ុយក្រែន ហើយរំពឹងថា ទីក្រុងកៀវ ក៏បើកចិត្តដូចគ្នាដែរ។

យ៉ាងណា លោកពូទីនព្រមានថា ទីក្រុងមូស្គូ នឹងនៅតែកំណត់គោលដៅលើហេដ្ឋារចនាសម្ព័ន្ធស៊ីវិល ព្រោះកងទ័ពអ៊ុយក្រែននិងបរទេស បានប្រើទីតាំងទាំងនេះជាកន្លែងលាក់ខ្លួន និងធ្វើជាខែល ហើយយកទីតាំងទាំងនោះដើម្បីប្រព្រឹត្តអំពើឧក្រិដ្ឋកម្ម៕

អត្ថបទ៖ សុខ សុវណ្ណ

ចុចអាន៖ ចូលកាន់តំណែងបាន១០០ថ្ងៃ ត្រាំ ធ្វើរឿង​៦យ៉ាង ផ្អើលពិភពលោក