ព័ត៌មានអន្ដរជាតិ

អាមេរិក ដាក់ទណ្ឌកម្មអ៊ីរ៉ង់ និងចិន ពាក់ព័ន្ធនឹងការផលិតមីស៊ីលបាលិស្ទិករបស់ក្រុងតេហេរ៉ង់

បានផុស

១ year មុន

នៅ

ថ្ងៃពុធ ៣០ មេសា ២០២៥

ដោយ

Chheang

កាលពីថ្ងៃទី២៩ខែមេសាឆ្នាំ២០២៥ សហរដ្ឋអាមេរិក បានដាក់ទណ្ឌកម្មលើបណ្តាញអង្គភាពចំនួន ៦ និងបុគ្គលចំនួន ៦ ដែលមានមូលដ្ឋាននៅប្រទេសអ៊ីរ៉ង់ និងប្រទេសចិន ដោយចោទប្រកាន់ពួកគេថាបានទិញធាតុផ្សំសម្រាប់ផលិតមីស៊ីលបាលិស្ទិកជំនួសមុខឲ្យកងឆ្មាំបដិវត្តន៍អ៊ីស្លាមអ៊ីរ៉ង់ (IRGC)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អង្គភាពដែលរងទណ្ឌកម្ម មានក្រុមហ៊ុនចំនួន៥ ដែលមានមូលដ្ឋាននៅក្នុងប្រទេសចិន និងក្រុមហ៊ុនចំនួន១ នៅក្នុងប្រទេសអ៊ីរ៉ង់ ខណៈដែលបុគ្គលទាំង៦នាក់សុទ្ធតែមានមូលដ្ឋាននៅអ៊ីរ៉ង់។

ក្រសួងរតនាគារអាមេរិក បានបញ្ជាក់ថា បណ្តាញក្រុមខាងលើ បានជួយសម្រួលដល់ការទិញសម្ភារដែលចាំបាច់សម្រាប់ការអភិវឌ្ឍមីស៊ីលបាលិស្ទិករបស់អ៊ីរ៉ង់។ ទណ្ឌកម្មទាំងនេះ មានគោលបំណងរំខានដល់ខ្សែសង្វាក់ផ្គត់ផ្គង់ដែលគាំទ្រសមត្ថភាពមីស៊ីលរបស់អ៊ីរ៉ង់ ដែលអាមេរិកចាត់ទុកថាជាការគំរាមកំហែងយ៉ាងខ្លាំងចំពោះសន្តិសុខក្នុងតំបន់ និងពិភពលោក។

រដ្ឋមន្ត្រីក្រសួងរតនាគារលោក Scott Bessent បាននិយាយថា៖ «ការអភិវឌ្ឍយ៉ាងខ្លាំងក្លារបស់អ៊ីរ៉ង់លើមីស៊ីល និងសមត្ថភាពអាវុធផ្សេងទៀត ធ្វើឲ្យប៉ះពាល់ដល់សុវត្ថិភាពរបស់សហរដ្ឋអាមេរិក និងដៃគូរបស់យើង»។ លោកបន្ថែមថា៖ «វាក៏ធ្វើឲ្យមជ្ឈិមបូព៌ាអស្ថិរភាព និងរំលោភលើកិច្ចព្រមព្រៀងសកលដែលមានបំណងទប់ស្កាត់ការរីកសាយភាយនៃបច្ចេកវិទ្យាទាំងនេះ។ ដើម្បីសម្រេចបាននូវសន្តិភាព រតនាគារនឹងបន្តចាត់វិធានការដែលមានទាំងអស់ ដើម្បីដកហូតសិទ្ធិចូលប្រើរបស់អ៊ីរ៉ង់ចំពោះធនធានដែលចាំបាច់សម្រាប់ជំរុញកម្មវិធីមីស៊ីលរបស់ខ្លួន»។

ការដាក់ទណ្ឌកម្មនេះ កើតឡើងចំពេលដែលកិច្ចចរចានុយក្លេអ៊ែរកំពុងបន្តរវាងអាមេរិក និងអ៊ីរ៉ង់ ដោយការអភិវឌ្ឍមីស៊ីលនៅតែជាបញ្ហាចម្រូងចម្រាស។ អ៊ីរ៉ង់បានបញ្ជាក់ថា កម្មវិធីមីស៊ីលរបស់ខ្លួនជាចំណុចជាប់គាំងចម្បងក្នុងកិច្ចពិភាក្សាដោយអះអាងពីសិទ្ធិនៅក្នុងការការពារខ្លួន។

អាមេរិកបន្តអនុវត្តទណ្ឌកម្មដើម្បីកម្រិតសមត្ថភាពមីស៊ីល និងយន្តហោះគ្មានមនុស្សបើករបស់អ៊ីរ៉ង់ ក្នុងគោលបំណងទប់ស្កាត់ឥទ្ធិពលរបស់ក្រុងតេហេរ៉ង់នៅមជ្ឈិមបូព៌ា និងការគាំទ្រក្រុមសកម្មប្រយុទ្ធដែលជាដៃជាជើងរបស់អ៊ីរ៉ង់៕

ដោយ៖ ឈាង