រដ្ឋបាលត្រាំ សុំពេល១០០ថ្ងៃទៀត ដើម្បីពន្លត់ភ្លើងសង្គ្រាម រុស្ស៊ី-អ៊ុយក្រែន ឲ្យបាន

បន្ទាប់ពីចាយពេលអស់ច្រើនខែ ក្នុងការដោះស្រាយជម្លោះរវាងរុស្ស៊ីនិងអ៊ុយក្រែន ហើយមើលមិនឃើញសញ្ញានៃការទទួលបានផ្លែផ្កាអ្វីខុសពីការអួតអាងរបស់លោក ដូណាល់ ត្រាំ ដែលថា នឹងពន្លត់ភ្លើងសង្គ្រាមត្រឹម២៤ម៉ោងនោះ ពេលនេះរដ្ឋាភិបាលទីក្រុងវ៉ាស៊ីនតោន បានប្រកាសសុំពេល១០០ថ្ងៃទៀត ដើម្បីសម្របសម្រួលនិងនាំយកសន្តិភាពមកជូនទីក្រុងកៀវនិងមូស្គូ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការបញ្ជាក់នេះគឺចេញពីមាត់អនុប្រធានាធិបតីអាមេរិក J.D. Vance ក្នុងបទសម្ភាសជាមួយ Fox News ដែលចេញផ្សាយកាលពីថ្ងៃព្រហស្បតិ៍ទី១ខែឧសភាឆ្នាំ២០២៥។

ទោះបីជាយ៉ាងណាក៏ដោយ ក្នុងបទសម្ភាសនោះ លោក Vance បានអួតអាងពីវឌ្ឍនភាពមួយចំនួនក្នុងអំឡុងពេល១០០ថ្ងៃដំបូងនៃការកាន់តំណែងរបស់លោក ត្រាំ ដូច្នេះហើយទើបលោកអះអាងថា សំណើសន្តិភាពកំពុងស្ថិតក្នុងដៃ។ សហរដ្ឋអាមេរិក នឹងខិតខំឲ្យអស់ពីសមត្ថភាព នៅ១០០ថ្ងៃបន្ទាប់នេះ ដើម្បីនាំភាគីទាំងពីរ ឲ្យចូលមកកាន់តុចរចាចាមួយគ្នា ឈានឆ្ពោះទៅរកការពន្លត់ភ្លើងសង្គ្រាមជាស្ថាពរ។

លោក Vance អួតថា​ ពេលរដ្ឋបាលលោកត្រាំ មិនទាន់លូកដៃ រុស្ស៊ី-អ៊ុយក្រែន មិននិយាយអ្វីសោះ។ កុំថាឡើយនិយាយរកគ្នា សូម្បីអ្នកផ្សេងក៏ភាគីទាំងពីរនេះ មិនទាំងនិយាយរកផង! ទើបតែពេលរដ្ឋបាលនេះចូលមកទេ ទើបប្រទេសទាំងពីរ ហាក់ចូលរួមជាមួយគ្នាបន្តិច។

រម្លឹកទៅពេលធ្វើយុទ្ធនាការឃោសនាបោះឆ្នោតប្រធានាធិបតីអាមេរិកឆ្នាំ២០២៤, លោក ត្រាំ នៃគណបក្សសាធារណរដ្ឋ បានប្រកាសក្តែងៗថា ពេលលោកឈ្នះតំណែងសេតវិមាន លោកនឹងបញ្ចប់សង្គ្រាមនេះ ក្នុងរយៈពេលត្រឹម២៤ម៉ោងប៉ុណ្ណោះ ទាំងដែលមិនបង្ហាញផែនការអ្វីឡើយ។

ទោះបីជាយ៉ាងណាក៏ដោយ ផែនការសន្តិភាព៧ចំណុចនោះត្រូវបានប្រេសិតពិសេស Keith Kellogg យកទៅបង្ហាញក្នុងកិច្ចប្រជុំកំពូលស្តីពីវិបត្តិអ៊ុយក្រែន នៅទីក្រុងឡុងដ៍ នៃចក្រភពអង់គ្លេស កាលពីសប្តាហ៍មុន។

៧ចំណុចក្នុងផែនការនោះមានដូចជា៖

1. ការទទួលស្គាល់តំបន់គ្រីមៀ ជាទឹកដីរុស្ស៊ី៖ សំណើរបស់សហរដ្ឋអាមេរិក រួមមានការទទួលស្គាល់ជាផ្លូវការនៃឧបទ្វីបគ្រីមៀរបស់រុស្ស៊ី ដែលផ្ទុយពីគោលនយោបាយមុនរបស់អាមេរិក។
2. ផ្អាកការវាយលុកនៅខ្សែបន្ទាត់ជួរមុខបច្ចុប្បន្ន៖ ផែនការនេះស្នើឲ្យរក្សាខ្សែទឹកដីបច្ចុប្បន្ន ដោយទទួលស្គាល់ការគ្រប់គ្រងរបស់រុស្ស៊ីប្រកបដោយប្រសិទ្ធភាព លើតំបន់ដែលរុស្ស៊ីកាន់កាប់ចាប់តាំងពីការវាយលុកឆ្នាំ២០២២មក។
3. សមាជិកភាណអង្គការ ណាតូ របស់អ៊ុយក្រែន៖ សំណើនេះតម្រូវឲ្យអ៊ុយក្រែន បោះបង់ចោលឈប់ចង់ចូលជាសមាជិកអង្គការណាតូទៀត ទោះនេះជាគោលដៅរបស់អ៊ុយក្រែន ជាយូរមកហើយក៏ដោយ
4. បន្ថយទណ្ឌកម្មលើរុស្ស៊ី៖ ជាថ្នូរឲ្យរុស្ស៊ីទន់ចិត្ត ផែនការនេះស្នើឲ្យមានការបន្ធូរបន្ថយបន្តិចម្តងៗនូវទណ្ឌកម្មសេដ្ឋកិច្ចដែលដាក់លើរុស្ស៊ី។
5. ការធានាសុវត្ថិភាពសម្រាប់អ៊ុយក្រែន៖ ផែនការនេះបាននិយាយអំពីការផ្តល់ការធានាសន្តិសុខជាក់លាក់ដល់អ៊ុយក្រែន ហើយក៏មានលទ្ធភាពនៃការដាក់កងរក្សាសន្តិភាពផងដែរ។
6. កិច្ចខិតខំប្រឹងប្រែងរួមគ្នាក្នុងការកសាងឡើងវិញ៖ សហរដ្ឋអាមេរិកបានស្នើឲ្យប្រមូលមូលនិធិរួមគ្នាសម្រាប់ការកសាងអ៊ុយក្រែនឡើងវិញ ហើយនោះគឺពាក់ព័ន្ធនឹងការទទួលបានធនធានរ៉ែកម្ររបស់អ៊ុយក្រែន។
7. ពេលវេលាសម្រាប់ការឆ្លើយតប៖ អ៊ុយក្រែនត្រូវគេកំណត់ពេល ក្នុងការឆ្លើយតបទៅនឹងសំណើទាំងប៉ុន្មានខាងលើ ហើយសហរដ្ឋអាមេរិកអាចនឹងដកខ្លួនចេញពីការចរចា ប្រសិនអ្វីៗមិនទទួលបានផល៕

អត្ថបទ៖ សុខ សុវណ្ណ

ចុចអាន៖ JD Vance៖ សង្គ្រាម​រុស្ស៊ី-អ៊ុយក្រែន នឹង​មិន​ចប់​ឆាប់ៗ​ទេ