ប៉ាគីស្ថាន ប្រកាសជោគជ័យធំធេងលើឥណ្ឌា ហើយយកថ្ងៃ១០ឧសភា ធ្វើជាទិវាអបអររាល់ឆ្នាំ

នាយករដ្ឋមន្ត្រីប៉ាគីស្ថាន Muhammad Shehbaz Sharif ប្រកាសថា ប្រទេសរបស់លោក ទទួលបានជោគជ័យធំធេងណាស់លើឥណ្ឌា ហើយសម្រេចយកថ្ងៃទី១០ខែឧសភារាល់ឆ្នាំ ធ្វើជា «ទិវាតស៊ូដើម្បីការពិត» ដែលសម្គាល់ជាថ្ងៃអបអរនៃការសម្រេចបានជ័យជម្នះដ៏ត្រចះត្រចង់នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ CNA នៅថ្ងៃអង្គារទី១៣ខែឧសភាឆ្នាំ២០២៥ លោក Sharif និយាយថា ប៉ាគីស្ថានសម្រេចបានជ័យជម្នះធំណាស់ក្នុងប្រតិបត្តិការវាយលុកប្រឆាំងឥណ្ឌា ហើយបទឈប់បាញ់នៅថ្ងៃទី១០ខែឧសភា ដែលជាថ្ងៃទីក្រុងអ៊ីស្លាម៉ាបាដ កំណត់គោលដៅលើឃ្លាំងមីស៊ីលនិងមូលដ្ឋានទ័ពអាកាសឥណ្ឌា គឺនឹងត្រូវយកទៅអបអរ ជាទិវាដែលខ្លួនទទួលបានជោគជ័យនេះ។

សេចក្តីប្រកាសនេះ កើតឡើងមិនបានប៉ុន្មានម៉ោងផង បន្ទាប់ពីនាយករដ្ឋមន្ត្រីឥណ្ឌា ប្តេជ្ញាសងសឹកចាស់ដៃចំពោះការវាយប្រហារភេរកម្មនាពេលអនាគត និងប្រកាសក្តែងៗថា ប្រទេសរបស់លោកមិនញញើតនឹងការគំរាមបាញ់នុយក្លេអ៊ែររបស់ប៉ាគីស្ថានសូម្បីបន្តិច។

លោក Modi ព្រមានថា ឥណ្ឌានឹងឆ្លើយតបចាស់ដៃទៅវិញចំពោះអំពើភេរវកម្ម។ រាល់ការគំរាមបាញ់នុយក្លេអ៊ែរ មិនធ្វើឲ្យឥណ្ឌាព្រឺឡើយ ហើយការសម្លុតគំរាមនុយក្លេអ៊ែរទាំងនោះ នឹងបកក្លាយទៅជាគោលដៅរបស់ឥណ្ឌាវិញ។

ម្យ៉ាងវិញទៀត លោកបញ្ជាក់យ៉ាងច្បាស់ថា ឥណ្ឌាគ្រាន់តែផ្អាកធ្វើប្រតិបត្តិការលើទីតាំងយោធានិងជំរំភេរវករប៉ាគីស្ថានសិនប៉ុណ្ណោះមិនមែនបញ្ឈប់ទាំងស្រុងទេ ព្រោះទីក្រុងញូវដែលី មិនអត់ឱនដាច់ខាត ចំពោះអំពើភេរវកម្មគ្រប់ទម្រង់ ហើយនឹងសងសឹកទៅវិញដោយមិនប្រណីដៃឡើយ។

សូមជម្រាបជាថ្មី ជម្លោះយ៉ាងក្តៅគគុករវាងអ្នកជិតខាងប្រដាប់ដោយអាវុធនុយក្លេអ៊ែរទាំងពីរ បានផ្តើមឡើងក្រោយការវាយប្រហារភេរវកម្មកាលពីថ្ងៃទី២២ខែមេសា លើទេសចរមួយក្រុមនៅតំបន់កាស្មៀរដែលបណ្តាលឲ្យជនស៊ីវិល២៦នាក់បាត់បង់ជីវិត។

ទីក្រុងញូវដែលីបានចោទទីក្រុងអ៊ីស្លាម៉ាបាដ ជាអ្នកគាំទ្រអំពើភេរវកម្មឆ្លងដែន ហើយក៏បើកប្រតិបត្តិការ Sindoor សងសឹក សម្លាប់ជនស៊ីល៣១នាក់នៅទឹកដីកាស្មៀរខាងប៉ាគីស្ថាន។

មិនត្រឹមប៉ុណ្ណឹង ភាគីទាំងពីរឈានដល់ការគំរាមបាញ់នុយក្លេអ៊ែរដាក់គ្នាថែមទៀតផង ប៉ុន្តែក្រោយមានបទឈប់បាញ់ដែលសម្របសម្រួលដោយអាមេរិក ស្ថានការណ៍ក៏ចុះថមថយបន្តិចវិញ៕

អត្ថបទ៖ សុខ សុវណ្ណ

ចុចអាន៖ ប៉ាគីស្ថាន​ប្រាប់​ថា មនុស្ស​៥១​នាក់​បាន​ស្លាប់​ក្នុង​ការ​ប៉ះ​ទង្គិច​គ្នា​ជាមួយ​​​ឥណ្ឌា​