ឆ្នាំក្រោយ អាល្លឺម៉ង់ នឹងកែនទ័ពថ្មី ចំពេលស្ថានការណ៍ពិភពលោក កាន់តែមិនស្រួល

រដ្ឋមន្ត្រីការពារជាតិអាល្លឺម៉ង់ Boris Pistorius បានបង្ហើបថា ដើមឆ្នាំក្រោយ ប្រទេសនេះអាចនឹងយកច្បាប់កាតព្វកិច្ចយោធាដែលបោះបង់ចោលតាំងពីឆ្នាំ២០១១មកហើយនោះ មកប្រើវិញ ប្រសិនបើគ្មានអ្នកស្ម័គ្រចិត្តគ្រប់គ្រាន់ចូលបម្រើក្នុងជួរកងទ័ពទេ ចំពេលស្ថានការណ៍ពិភពលោក កាន់តែមិនស្រួល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុផលនៅពីក្រោយរឿងនេះ ត្រូវបានលោក Pistorius បញ្ជាក់ថា គឺដើម្បីបំពេញតាមកាតព្វកិច្ចរបស់ទីក្រុងបែរឡាំងក្នុងអង្គការណាតូ និងចំពេលមានការគំរាមកំហែងនិងភាពតានតឹងកាន់តែខ្លាំងពីមួយថ្ងៃទៅមួយថ្ងៃជាមួយរុស្ស៊ី។

ក្នុងបទសម្ភាសជាមួយកាសែត Frankfurter Allgemeine Sonntagszeitung កាលពីថ្ងៃសៅរ៍ទី២៤ខែឧសភាឆ្នាំ២០២៥ លោក Pistorius និយាយថា៖ «ប្រសិនបើពេលវេលាមកដល់ នៅពេលយើងខ្វះអ្នកចុះឈ្មោះដោយស្ម័គ្រចិត្ត នោះនឹងមានការសម្រេចចិត្តកែនទាហានថ្មី វាជាគោលការណ៍។ រដ្ឋាភិបាលរបស់អធិការបតី Friedrich Merz កំពុងធ្វើការលើច្បាប់កាតព្វកិច្ចយោធាថ្មី ហើយសង្ឃឹមថាវានឹងចូលជាធរមាននៅដើមខែមករាឆ្នាំ២០២៦តែម្តង»។

យោងតាមគេហទំព័រ Global Firepower, អាល្លឺម៉ង់ ឈរនៅចំណាត់ថ្នាក់លេខ១៤ក្នុងនាមជាប្រទេ​សមហាអំណាចយោធា ដោយមានកងទ័ពសកម្ម ១៨០ ០០០នាក់ និងទាហានបម្រុង ៣០ ០០០នាក់។

យ៉ាងណា លោក Pistorius សង្កត់ធ្ងន់ថា អាល្លឺម៉ង់ ត្រូវតែមានសមត្ថភាពក្នុងការប្រមូលផ្តុំកម្លាំងសរុបឲ្យបានទាហាននិងទ័ពបម្រុង ៤៦០ ០០០នាក់ ក្នុងនោះត្រូវមានទាំងទ័ពសកម្មយ៉ាងតិច ២០០ ០០០នាក់ផងដែរ ដើម្បីប្រឈមមុខជាមួយនឹងស្ថានការណ៍ពិភពលោក ដែលកំពុងតានតឹងខ្លាំង៕

អត្ថបទ៖ សុខ សុវណ្ណ

ចុចអាន៖ អាល្លឺម៉ង់ ប្រកាសលែង​បង្ហើប​ដំណឹង​អំពី​ជំនួយ​យោធា​ដែល​ផ្ដល់​ឲ្យ​អ៊ុយក្រែន​ទៀត​ហើយ