មកស្គាល់មេទ័ពនិងមន្ត្រីកំពូលៗរបស់អ៊ីរ៉ង់ ដែលស្លាប់ក្រោមដៃ អ៊ីស្រាអែល ត្រឹមមួយប៉ប្រិចភ្នែក

អ៊ីស្រាអែល បាន​បើក​ប្រតិបត្តិការ «Rising Lion» វាយ​ប្រហារ​តាម​អាកាស​លើ​ប្រទេស​អ៊ីរ៉ង់ ខណៈ​លោក​នាយករដ្ឋមន្ត្រី​ បេនចាមីន ណេតាន់យ៉ាហ៊ូ ​អះអាង​​​ថា ចំណាត់ការ​​នេះ នឹង​បន្ត​ធ្វើ​ក្នុង​រយៈពេល​ជា​ច្រើន​ថ្ងៃ​ទៅ​មុខ​ទៀត ដរាបណា​លែង​មាន​ការ​គំរាមកំហែង​នុយក្លេអ៊ែរ និង​យោធា​ពី​ទីក្រុង​តេហេរ៉ង់។

ការវាយប្រហារនោះបានសម្លាប់មេទ័ពនិងមន្ត្រីអ៊ីរ៉ង់កំពូលៗជាច្រើននាក់ត្រឹមមួយប៉ប្រិចភ្នែក។ តើពួកគេជានរណាខ្លះ?

លោក Mohammad Bagheri

លោក Bagheri គឺជាមន្ត្រីយោធាឋានៈខ្ពស់បំផុតនៅអ៊ីរ៉ង់។ លោកគឺជាអគ្គសេនាធិការនៃកងកម្លាំងប្រដាប់អាវុធអ៊ីរ៉ង់ ដែលរួមបញ្ចូលគ្នាទាំងកងឆ្មាំបដិវត្តឥស្លាម (IRGC) និងកងទ័ពអ៊ីរ៉ង់។

លោក Bagheri បានចូលរួមជាមួយ IRGC នៅឆ្នាំ១៩៨០ ក្នុងអាយុ២០ឆ្នាំ ហើយដោយចាប់ដៃជាមួយបងប្រុសរបស់ខ្លួន លោកបានជួយបង្កើតអង្គភាពស៊ើបការណ៍សម្ងាត់របស់ IRGC អំឡុងសង្គ្រាមអ៊ីរ៉ាក់-អ៊ីរ៉ង់។ លោកត្រូវបានគេចាត់ទុកថាជាមេបញ្ជាការមិនសូវជ្រុលនិយមដូចមេបញ្ជាការដទៃទៀតទេ។

លោក Hossein Salami

លោក Hossein Salami គឺជាមេបញ្ជាការកំពូលនៃ IRGC។ ដំបូងលោក Salami បានចូលរួមជាមួយ IRGC នៅឆ្នាំ១៩៨០ អំឡុងសង្គ្រាមអ៊ីរ៉ាក់-អ៊ីរ៉ង់ ហើយក៏ក្លាយជាមេបញ្ជាការរងនៅឆ្នាំ២០០៩ មុនពេលឡើងឋានៈជាមេបញ្ជាការកំពូលនៅឆ្នាំ២០១៩។

លោកជាមនុស្សប្រកាន់ជំហរម៉ឺងម៉ាត់ចំពោះអ៊ីស្រាអែល ហើយកាលពីខែមុនលោកនិយាយថា ទីក្រុងតេហេរ៉ង់នឹង «បើកទ្វារឋាននរក» ប្រសិនបើអ៊ីស្រាអែលឬសហរដ្ឋអាមេរិក ហ៊ានវាយប្រហារអ៊ីរ៉ង់។

លោក Gholamali Rashid

លោក Gholamali Rashid គឺជាប្រធានទីបញ្ជាការកណ្តាល Khatam-al Anbiya របស់ IRGC ដែលសម្របសម្រួលប្រតិបត្តិការយោធារួមគ្នារបស់អ៊ីរ៉ង់។ លោកបានប្រយុទ្ធក្នុងសង្គ្រាមទសវត្សរ៍ឆ្នាំ១៩៨០ ជាមួយអ៊ីរ៉ាក់ ហើយធ្លាប់កាន់តំណែងជាអគ្គសេនាធិការរងនៃកងកម្លាំងប្រដាប់អាវុធអ៊ីរ៉ង់។

លោក Amir Ali Hajizadeh

លោក Hajizadeh ដែលជាមេបញ្ជាការកងកម្លាំងអវកាសរបស់ IRGC គឺជាឥស្សរជនដ៏លេចធ្លោម្នាក់ដែលទទួលបន្ទុកកម្មវិធីមីស៊ីលរបស់ប្រទេស។ កងកម្លាំងការពារអ៊ីស្រាអែល (IDF) និយាយថា បុរសម្នាក់នេះបានប្រមូលផ្តុំគ្នាជាមួយមេបញ្ជាការកងកម្លាំងអាកាស IRGC ជាច្រើនផ្សេងទៀតនៅមជ្ឈមណ្ឌលបញ្ជាការក្រោមដី ដើម្បីត្រៀមបើកការវាយប្រហារលើអ៊ីស្រាអែល។

IDF និយាយថា លោក Hajizadeh បានបញ្ជាឲ្យបើកការវាយប្រហារមីស៊ីលរបស់អ៊ីរ៉ង់លើអ៊ីស្រាអែលកាលពីខែតុលា និងខែមេសាឆ្នាំមុន។ យ៉ាងណា ប្រជាជនអ៊ីរ៉ង់ មិនសូវពេញចិត្តនឹងបុរសម្នាក់នេះប៉ុន្មានទេ ព្រោះលោកជាអ្នកទទួលខុសត្រូវចំពោះការបាញ់ទម្លាក់យន្តហោះដឹកអ្នកដំណើរអ៊ុយក្រែនដែលហោះចេញពីទីក្រុងតេហេរ៉ង់កាលពីឆ្នាំ ២០២០ ដែលបានសម្លាប់មនុស្សទាំង ១៧៦ នាក់ជិះនៅក្នុងនោះ។

លោក Fereydoon Abbasi

លោក Abbasi ដែលជាអ្នកវិទ្យាសាស្ត្រនុយក្លេអ៊ែរ បានបម្រើការជាប្រធានអង្គការថាមពលបរមាណូអ៊ីរ៉ង់ចន្លោះឆ្នាំ ២០១១ ដល់ ២០១៣។ លោកបានបន្តក្លាយជាសមាជិកសភាពីឆ្នាំ ២០២០ ដល់ ២០២៤។

លោកបានប្រកាន់ជំហរតឹងរ៉ឹងទាក់ទងនឹងសកម្មភាពនុយក្លេអ៊ែររបស់អ៊ីរ៉ង់។ ក្នុងខែឧសភា លោកបានថ្លែងនៅលើប៉ុស្តិ៍ទូរទស្សន៍អ៊ីរ៉ង់ SNN.ir អំពីលទ្ធភាពនៃការផលិតអាវុធនុយក្លេអ៊ែរ ហើយនិយាយថា លោកនឹងស្ម័គ្រចិត្តអនុវត្តបទបញ្ជាបាញ់នុយក្លេអ៊ែរ ពេលផលិតបានអាវុធបែបនេះ៕

អត្ថបទ៖ សុខ សុវណ្ណ

ចុចអាន៖ ស្លាប់​អ្នក​វិទ្យាសាស្ត្រ​នុយក្លេអ៊ែរ​៦នាក់ ក្រោយអ៊ីស្រាអែល​វាយ​អ៊ីរ៉ង់