ស្លាប់​អ្នក​វិទ្យាសាស្ត្រ​នុយក្លេអ៊ែរ​៦នាក់ ក្រោយអ៊ីស្រាអែល​វាយ​អ៊ីរ៉ង់

ទីភ្នាក់ងារព័ត៌មាន​រដ្ឋ Tasnim និងប្រភពសន្តិសុខរបស់អ៊ីរ៉ង់ បានបញ្ជាក់ថា អ្នកវិទ្យាសាស្ត្រនុយក្លេអ៊ែរចំនួន​៦​នាក់ ត្រូវបានសម្លាប់នៅក្នុង​​ប្រតិបត្តិការ​យោធាតាម​​អាកាសរបស់ប្រទេសអ៊ីស្រាអែល​នា​​ព្រឹក​​ថ្ងៃទី​១៣​ខែមិថុនា​នេះ។

អ្នក​វិទ្យាសាស្ត្រ ​ដែល​បាន​បាត់បង់​ជីវិត មាន​ដូចជា Abdulhamid Minouchehr, Ahmadreza Zolfaghari, Seyyed Amirhossein Faqhi, Motlabizadeh ព្រម​ទាំង​បុគ្គល​ដ៏​សំខាន់​២​រូបគឺ​លោក Mohammad Mehdi Tehranchi និង Fereydoun Abbasi។ ​លោក FereAbbasi គឺ​ជា​ប្រធានអង្គការថាមពលអាតូមិកនៃប្រទេសអ៊ីរ៉ង់ និងជា​សមាជិកសភា។ ចំណែក​ឯ​​លោក Tehranchi គឺ​ជាអ្នករូបវិទ្យាទ្រឹស្ដី​ដ៏​ល្បី​​នៅសាកលវិទ្យាល័យ Shahid Beheshti និង​ជា​អ្នក​វិទ្យាសាស្ត្រ​នុយក្លេអ៊ែរ​កំពូល​មួយ​រូប​របស់​អ៊ីរ៉ង់។

ទីភ្នាក់ងារព័ត៌មាន Tasnim បាន​សរសេរ​ថា «របប Zionist បង្ហាញថា ខ្លួន​​បាន​ធ្វើសង្រ្គាមប្រឆាំងនឹងអ្នកវិទ្យាសាស្ត្ររបស់យើងដោយប្រើឧបករណ៍នៃភេរវកម្ម»។

ក្រៅ​តែ​ពី​អ្នក​វិទ្យាសាស្ត្រ​នុយក្លេអ៊ែរ មេឆ្មាំបដិវត្តអ៊ីរ៉ង់និងមេទ័ពកំពូលៗច្រើននាក់ ក៏​​បាន​ស្លាប់ក្នុងការវាយប្រហាររបស់អ៊ីស្រាអែលផងដែរ។​ ប្រព័ន្ធផ្សព្វផ្សាយរដ្ឋអ៊ីរ៉ង់ បានបញ្ជាក់ពីការស្លាប់មេបញ្ជាការឆ្មាំបដិវត្តឥស្លាមលោក Hossein Salami និងមេទ័ពកំពូលៗច្រើននាក់ផ្សេងទៀត ជាពិសេសលោក Mohammad Bagheri។ យោងតាមសារព័ត៌មាន Times of Israel, ឆ្មាំបដិវត្តន៍អ៊ីរ៉ង់ គឺជាមជ្ឈមណ្ឌលថាមពលដ៏សំខាន់មួយនៅក្នុងប្រទេសនេះ ដែលពួកគេក៏គ្រប់គ្រងឃ្លាំងមីស៊ីលបាលិស្ទិករបស់ទីក្រុងតេហេរ៉ង់ផងដែរ។

ទោះ​បាត់បង់​វត្តមាន​របស់​មេញ្ជាការ​ខ្លួន​ក៏​ដោយ កងឆ្មាំបដិវត្តន៍ឥស្លាមរបស់អ៊ីរ៉ង់ បាន​និយាយ​ថា ពួក​គេ​ត្រៀម​ខ្លួន​រួច​រាល់​ហើយ​ដើម្បី​វាយ​បក​អ៊ីស្រាអែល ក៏​ដូចជា​សហរដ្ឋ​អាមេរិក​ដែលជា​សម្ព័ន្ធមិត្ត​យ៉ាង​ជិតស្និទ្ធ​​របស់​អ៊ីស្រាអែល។ ក្រសួង​ការបរទេស​អ៊ីរ៉ង់ បាន​​​បញ្ជាក់​ថា បើ​គ្មាន​ការ​​​បើក​ដៃ​ពី​អាមេរិក នោះ​អ៊ីស្រាអែល​​​ក៏​នឹង​មិន​ហ៊ាន​វាយ​ប្រហារ​​ឡើយ អ៊ីចឹង​ហើយ​ទីក្រុងតេហេរ៉ង់មានសិទ្ធិ «ស្រប​ច្បាប់ និងត្រឹមត្រូវ» សម្រាប់​ការឆ្លើយតបទៅនឹងការវាយប្រហារ​នេះ ក្រោមធម្មនុញ្ញអង្គការសហប្រជាជាតិ៕

ដោយ៖ ឈាង