ប្រមុខ​មន្ទីរ​បញ្ចកោណ៖ លោក ត្រាំ នៅ​តែ​ចង់​ធ្វើ​កិច្ចព្រមព្រៀង​ជាមួយ​អ៊ីរ៉ង់ដដែល

រដ្ឋមន្ត្រីការពារជាតិ លោក Pete Hegseth បានបញ្ជាក់​ថា ប្រធានាធិបតី​អាមេរិក​ ដូណាល់ ត្រាំ នៅតែប្តេជ្ញាធានា​ឲ្យ​បាននូវកិច្ចព្រមព្រៀងនុយក្លេអ៊ែរថ្មីជាមួយអ៊ីរ៉ង់ ទោះបីជាភាពតានតឹងនៅមជ្ឈិមបូព៌ាឈានដល់កម្រិតធ្ងន់ធ្ងរក៏ដោយ។

ថ្លែងក្នុងកម្មវិធី Fox News Prime Time កាល​ពី​ថ្ងៃ​ចន្ទ​ទី​១៦​ខែ​មិថុនា​ឆ្នាំ​២០២៥ លោក Hegseth បាននិយាយថា «ជាការពិតណាស់ លោក ត្រាំ នៅតែមានបំណងសម្រាប់កិច្ចព្រមព្រៀងនុយក្លេអ៊ែរជាមួយអ៊ីរ៉ង់»។ ប្រមុខ​មន្ទីរ​បញ្ចកោណ​រូប​នេះ បាន​សង្កត់​ធ្ងន់​ថា​ រដ្ឋបាល​លោក ត្រាំ ​ស្វែងរក​ដំណោះស្រាយ​ដោយ​សន្តិវិធី មិនមែន​មាន​ជម្លោះ​បន្ត​ទៀត​ទេ។

ការ​លើក​ឡើង​របស់​លោក Hegseth ធ្វើ​ឡើង​ខណៈ​​ជម្លោះ​ដ៏​ក្ដៅ​គគុក​រវាង​អ៊ីស្រាអែល និង​អ៊ីរ៉ង់​​ដែល​ផ្ទុះ​ឡើង​កាល​ពី​ថ្ងៃ​ទី​១៣​មិថុនា​​បានកើន​ឡើង​ខ្លាំង ដោយ​មាន​ការ​​បាញ់​ស្រោច​​​គ្រាប់​ដាក់​គ្នា​ទៅ​វិញ​ទៅ​មក និង​បណ្ដាល​ឲ្យ​មាន​មនុស្ស​ស្លាប់​​​របួស​ជា​ច្រើន។

ទន្ទឹម​នឹង​ស្ថានការណ៍​ដ៏​តានតឹង​នេះ លោក ត្រាំ បានព្រមានឲ្យគ្រប់គ្នា ត្រូវចាកចេញពីរដ្ឋធានីតេហេរ៉ង់ នៃប្រទេសអ៊ីរ៉ង់ជាបន្ទាន់ ធ្វើឲ្យគេបារម្ភថា អាចនឹងមានរឿងធំកើតឡើង។ លោក ត្រាំ បាន​រៀបរាប់​​នៅ​លើ​បណ្ដាញ​សង្គម Truth Social ថា «អ៊ីរ៉ង់ គួរតែចុះហត្ថលេខាលើកិច្ចព្រមព្រៀង ដែលខ្ញុំបានប្រាប់ពួកគេ។ ពិតជាគួរឲ្យខ្មាសអៀន និងខ្ជះខ្ជាយអាយុជីវិតមនុស្សណាស់។ និយាយឲ្យសាមញ្ញគឺ អ៊ីរ៉ង់មិនអាចមានអាវុធនុយក្លេអ៊ែរបានទេ។ ខ្ញុំនិយាយម្តងហើយម្តងទៀត! គ្រប់គ្នាត្រូវជម្លៀសចេញពីទីក្រុងតេហេរ៉ង់ជាបន្ទាន់!»៕

ដោយ៖ ឈាង

ចុចអាន៖ ត្រាំ ព្រមានឲ្យគ្រប់គ្នាចេញពីទីក្រុងតេហេរ៉ង់ ជាបន្ទាន់ ទំនងជិតកើតរឿងធំ