ព័ត៌មានអន្ដរជាតិ

ចិន៖ អាមេរិកបំផ្លាញភាពជឿជាក់របស់ខ្លួន ក្រោយវាយប្រហារលើរោងចក្រនុយក្លេអ៊ែរអ៊ីរ៉ង់

បានផុស

១ year មុន

នៅ

ថ្ងៃចន្ទ ២៣ មិថុនា ២០២៥

ដោយ

Chheang

ប្រទេសចិន បានរិះគន់យ៉ាងខ្លាំងចំពោះការវាយប្រហារតាមអាកាសនាពេលថ្មីៗនេះរបស់សហរដ្ឋអាមេរិកលើទីតាំងនុយក្លេអ៊ែរអ៊ីរ៉ង់ ដោយព្រមានថា នេះបានធ្វើឲ្យខូចដល់ភាពជឿជាក់របស់អាមេរិក និងបង្កើនភាពតានតឹងនៅទូទាំងមជ្ឈិមបូព៌ារហូតដល់ថ្នាក់ស្ថានការណ៍អាចនឹងទប់ស្កាត់លែងជាប់។

អគ្គលេខាធិការអង្គការសហប្រជាជាតិលោក Antonio Guterres ចាប់ដៃជាមួយតំណាងអចិន្ត្រៃយ៍របស់ចិនប្រចាំ UN លោក Fu Cong (រូបថត៖ Reuters)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងបន្ទាប់ពីសម័យប្រជុំក្រុមប្រឹក្សាសន្តិសុខអង្គការសហប្រជាជាតិកាលពីថ្ងៃទី២២មិថុនា ឯកអគ្គរដ្ឋទូតចិនរបស់អង្គការសហប្រជាជាតិ លោក Fu Cong បានជំរុញឲ្យភាគីទាំងអស់ «អនុវត្តការអត់ធ្មត់» ជាពិសេសអំពាវនាវឲ្យទាំងអាមេរិក និងអ៊ីស្រាអែល «បញ្ឈប់ការបាញ់ប្រហារជាបន្ទាន់ ដើម្បីការពារស្ថានភាពកុំឲ្យកើនឡើង»។

លោកបានបន្ថែមថា អ៊ីរ៉ង់អាចនឹងត្រូវរងការវាយប្រហារ ប៉ុន្តែ«ភាពទុកចិត្តរបស់សហរដ្ឋអាមេរិកក៏ត្រូវបានខូចខាត» ទាំងក្នុងនាមជាប្រទេសមួយ និងជាអ្នកចូលរួមក្នុងការទូតអន្តរជាតិ។

ប្រព័ន្ធផ្សព្វផ្សាយរដ្ឋចិន បានបន្ទរពីការព្រួយបារម្ភនេះយ៉ាងខ្លាំង។ វិចារណកថានៅក្នុងកាសែត Global Times បានថ្កោលទោសការវាយប្រហារថាជា «គ្រោះថ្នាក់ និងបង្កហេតុ» ដោយព្រមានថា ការជ្រៀតជ្រែករបស់យោធាបរទេស«នឹងមិននាំមកនូវសន្តិភាពទេ» ហើយអាចបង្កើនការស្អប់ខ្ពើម និងភាពច្របូកច្របល់ក្នុងតំបន់។

ដោយឡែក ស្ថានទូតចិនប្រចាំប្រទេសអ៊ីរ៉ង់ បាននិយាយកាលពីល្ងាចថ្ងៃអាទិត្យថា ពលរដ្ឋចិនភាគច្រើននៅក្នុងប្រទេសអ៊ីរ៉ង់ត្រូវបានជម្លៀសដោយសុវត្ថិភាព ហើយអ្នកដែលនៅសេសសល់មិនស្ថិតនៅក្នុងតំបន់ដែលមានហានិភ័យខ្ពស់នោះទេ។

ប្រធានាធិបតីអាមេរិក ដូណាល់ ត្រាំ បានប្រកាសថា សហរដ្ឋអាមេរិកបានបំផ្លាញទីតាំងនុយក្លេអ៊ែរសំខាន់ៗរបស់ទីក្រុងតេហេរ៉ង់ ដោយចូលរួមជាមួយអ៊ីស្រាអែលក្នុងសកម្មភាពយោធាលោកខាងលិចដ៏ធំបំផុតប្រឆាំងនឹងសាធារណរដ្ឋអ៊ីស្លាម គិតចាប់តាំងពីបដិវត្តន៍ឆ្នាំ១៩៧៩៕

ដោយ៖ ឈាង