មន្ទីរបញ្ចកោណ៖ ការវាយប្រហាររបស់អាមេរិក មិនបានបំផ្លាញកម្មវិធីនុយក្លេអ៊ែរអ៊ីរ៉ង់ទេ

យោងតាមរបាយការណ៍ចារកម្មមន្ទីរបញ្ចកោណបានឲ្យដឹងថា ការវាយប្រហាររបស់អាមេរិក លើរោងចក្រនុយក្លេអែរអ៊ីរ៉ង់កាលពីចុងសប្តាហ៍ គឺមិនបានបំផ្លាញកម្មវិធីនុយក្លេអ៊ែររបស់ប្រទេសនេះទេ ផ្ទុយពីការអះអាងរបស់ប្រមុខសេតវិមានដូណាល់ ត្រាំ ដែលថា ការវាយប្រហារនោះគឺទទួលបានជោគជ័យទាំងស្រុង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងរបាយការណ៍ដែលយកមកចុះផ្សាយបន្តដោយសារព័ត៌មាន BBC, ឥទ្ធិពលនៃការទម្លាក់គ្រាប់បែករបស់អាមេរិក គ្រាន់តែបង្អាក់ដំណើរការផលិត​នុយក្លេអ៊ែរនៅអ៊ីរ៉ង់ច្រើនខែប៉ុណ្ណោះ ពោលគឺមិនបានបំផ្លាញឃ្លាំងស្តុកសារធាតុអ៊ុយរ៉ាញ៉ូមដែលចម្រាញ់រួចរបស់សាធារណរដ្ឋឥស្លាមមួយនេះទេ។

កាលពីថ្ងៃសៅរ៍ទី២១ខែមិថុនាឆ្នាំ២០២៥ អាមេរិកបានបើកប្រតិបត្តិការ Midnight Hammer វាយប្រហាររោងចក្រនុយក្លេរអ៊ែរអ៊ីរ៉ង់៣កន្លែងដូចជា Fordo, Natanz និង Isfahan ហើយក្រោយមកលោកត្រាំប្រកាសថា ទីតាំងទាំងនោះត្រូវបានកម្ទេចចោល។

ទោះយ៉ាងណា ការវាយតម្លៃចារកម្មរបស់មន្ទីរបញ្ចកោណបង្ហាញថា ម៉ាស៊ីន Centrifuge សម្រាប់ចម្រាញ់អ៊ុយរ៉ាញូមគឺនៅដដែល មានតែរចនាសម្ព័ន្ធលើដីប៉ុណ្ណោះ ដែលត្រូវប៉ះពាល់ខ្លាំង ប៉ុន្តែរចនាសម្ព័ន្ធភាគច្រើននៅក្រោមដីជ្រៅគឺ មិនរងគ្រោះឡើយ។

ទន្ទឹមនោះមានប្រភពជាច្រើនក៏បានប្រាប់ទៅសារព័ត៌មាន CBS ផងដែរថា សារធាតុអ៊ុយរ៉ាញ៉ូមមួយចំនួន ក៏ត្រូវបានអ៊ីរ៉ង់យកចេញពីរោងចក្ររួចទៅហើយដែរ មុនការវាយប្រហាររបស់អាមេរិក។

របាយការណ៍ខាងលើ ក៏ផ្ទុយពីការអះអាងរបស់អនុប្រធានាធិបតី​អាមេរិក JD Vance ផងដែរ ដែលនិយាយថា ពេលនេះអ៊ីរ៉ង់​មិនអាចផលិតអាវុធនុយក្លេអ៊ែរបាន​ទេ ព្រោះការវាយប្រហារនាពេលថ្មីៗនេះរបស់ក្រុង​វ៉ាស៊ីនតោន​បានបំផ្លាញហេដ្ឋារចនាសម្ព័ន្ធនុយក្លេអ៊ែរដ៏សំខាន់​របស់​ទីក្រុង​តេហេរ៉ង់ បាត់ទៅហើយ។

ក្នុងបទសម្ភាសន៍មួយ​ជាមួយ Fox News កាល​ពី​ថ្ងៃ​ទី​២៣​ខែមិថុនា​ លោក Vance ​លើក​ឡើង​ថា «អ៊ីរ៉ង់​គឺ​ជិត​មាន​អាវុធ​នុយក្លេអ៊ែរ​ហើយ។​ ឥឡូវ​នេះ អ៊ីរ៉ង់​មិន​មាន​សមត្ថភាព​ក្នុង​ការ​បង្កើត​អាវុធ​នុយក្លេអ៊ែរ​ជាមួយ​ឧបករណ៍​ដែល​ពួកគេ​មាន​ទៀតទេ ព្រោះ​យើង​បាន​បំផ្លាញ​វា»៕

អត្ថបទ៖ សុខ សុវណ្ណ

ចុចអាន៖ អនុប្រធានាធិបតីអាមេរិក ប្រកាសថា អ៊ីរ៉ង់អស់សមត្ថភាព​ផលិត​អាវុធនុយក្លេអ៊ែរ​ហើយ