ព័ត៌មានអន្ដរជាតិ

ទឹកជំនន់ធ្ងន់ធ្ងរនៅភាគនិរតីប្រទេសចិន បង្ខំជម្លៀសមនុស្សជាង៨ម៉ឺននាក់

បានផុស

១ year មុន

នៅ

ថ្ងៃព្រហស្បតិ៍ ២៦ មិថុនា ២០២៥

ដោយ

យោងតាមការចេញផ្សាយរបស់សារព័ត៌មាន CNA កាលពីថ្ងៃទី២៥ខែមិថុនា មនុស្សជាង៨ម៉ឺននាក់ត្រូវបានជម្លៀសចេញពីលំនៅឋាន ដោយទឹកជំនន់យ៉ាងធ្ងន់ធ្ងរនៅក្នុងខេត្ត Guizhou ភាគនិរតីនៃប្រទេសចិន បន្ទាប់ពីមានភ្លៀងធ្លាក់ខ្លាំងជាបន្តបន្ទាប់បង្កជាទឹកជំនន់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តំបន់នេះត្រូវបានវាយប្រហារដោយភ្លៀងធ្លាក់ខ្លាំង ដោយក្រុមអ្នកជួយសង្គ្រោះហៅវាថាជាគ្រោះមហន្តរាយទឹកជំនន់កើតឡើងក្នុងពេល៥០ឆ្នាំម្ដង។ ទឹកជំនន់នេះបានជន់លិចសហគមន៍ទាំងមូល និងនាំទៅដល់ការជួយសង្គ្រោះពលរដ្ឋរងគ្រោះយ៉ាងទូលំទូលាយ។

ក្រុមអ្នកសង្គ្រោះបន្ទាន់បានប្រើប្រាស់ទូក និងយន្តហោះគ្មានមនុស្សបើក ដើម្បីជម្លៀសអ្នកស្រុក និងចែកចាយការផ្គត់ផ្គង់សំខាន់ៗដូចជាអង្ករជាដើម។ ទឹកជំនន់ក៏បានប៉ះពាល់ដល់ខេត្ត Guangxi និង Hunan ដែលនៅជិតខាងផងដែរ ដែលមនុស្សរាប់ម៉ឺននាក់ផ្សេងទៀតត្រូវបង្ខំចិត្តឲ្យជម្លៀសចេញ។ កាលពីដើមខែនេះ ក៏មានមនុស្សជិត ៧០,០០០ នាក់ត្រូវបង្ខំផ្លាស់ទីលំនៅនៅភាគខាងត្បូងប្រទេសចិន បន្ទាប់ពីព្យុះទីហ្វុង Wutip បានបង្កការខូចខាតស្រដៀងគ្នានេះ។

អ្នកជួយសង្គ្រោះម្នាក់ជួយជម្លៀសអ្នកស្រុកចេញពីតំបន់ដែលរងគ្រោះដោយទឹកជំនន់។ (រូបភាព៖ Xinhua)

ប្រទេសចិនបានចេញការប្រកាសអាសន្នពណ៌ក្រហមចំពោះជំនន់ទឹកពីភ្នំ ដែលជាកម្រិតព្រមានខ្ពស់បំផុតនៅក្នុងតំបន់ចំនួនប្រាំមួយ ខណៈផ្នែកខ្លះនៃប្រទេសនេះប្រឈមនឹងរលកកម្ដៅខ្លាំងទៅវិញ។ ព្រឹត្តិការណ៍ទាំងនេះគឺជាផ្នែកមួយនៃការប្រែប្រួលអាកាសធាតុ និងកាន់តែអាក្រក់ឡើងដោយការបំភាយឧស្ម័នផ្ទះកញ្ចក់។

ដើម្បីជួយដល់កិច្ចខិតខំប្រឹងប្រែងស្តារឡើងវិញ ស្ថាប័នរៀបចំផែនការសេដ្ឋកិច្ចកំពូលរបស់ប្រទេសចិនបានចែកប្រាក់ចំនួន ១០០លានយ័ន (ប្រហែល១៤លានដុល្លារ) សម្រាប់ជំនួយសង្គ្រោះគ្រោះមហន្តរាយនៅទីក្រុង Guizhou។

ទោះបីជាប្រទេសចិនផលិតឧស្ម័នផ្ទះកញ្ចក់ច្រើនជាងប្រទេសទាំងអស់ក្នុងពិភពលោកក៏ដោយ រដ្ឋាភិបាលចិនបានសន្យាថានឹងឈប់បញ្ចេញកាបូនបន្ថែមទៅក្នុងបរិយាកាសនៅឆ្នាំ២០៦០។ ក្នុងពេលជាមួយគ្នានេះ ប្រទេសចិនកំពុងធ្វើការដើម្បីក្លាយជាប្រទេសនាំមុខគេលើពិភពលោកខាងថាមពលស្អាត ដូចជាថាមពលពន្លឺព្រះអាទិត្យ និងថាមពលខ្យល់៕