​នាយករដ្ឋមន្ត្រីថៃ​​និង​ប្រធានាធិបតីបារាំង​ ត្រៀម​សន្ទនាតាមទូរស័ព្ទ ចំពេលមានភាពតាន​​ជាមួយ​កម្ពុជា

យោងតាមការចេញផ្សាយរបស់សារព័ត៌មាន The Nation នាយករដ្ឋមន្ត្រីថៃលោកស្រី ផែថងថាន ស៊ីណាវ៉ាត្រ (Paetongtarn Shinawatra) គ្រោងនឹងជួបសន្ទនាតាមទូរស័ព្ទជាមួយប្រធានាធិបតីបារាំង លោក Emmanuel Macron នៅល្ងាចនេះ ខណៈដែលភាពតានតឹងកើនឡើងរវាងប្រទេសថៃ និងកម្ពុជា។

ការ​ពិភាក្សា​តាម​ទូរស័ព្ទ​នេះ​ធ្វើ​ឡើង​ស្រប​ពេល​ដែលសម្ដេចតេជោ ហ៊ុន សែន ប្រធាន ព្រឹទ្ធសភាកម្ពុជា ថានឹងលាតត្រដាង​ពី​គម្រោង​សម្ងាត់​ដែល​ពាក់ព័ន្ធ​នឹង​អតីត​នាយករដ្ឋមន្ត្រី​ថៃ លោក ថាក់ស៊ីន ស៊ីណាវ៉ាត្រ ដែលជាឪពុកលោកស្រី ផែថងថាន។

អ្នកយកព័ត៌មានបានសង្កេតឃើញលោកស្រី ផែថងថាន មកដល់អគារ​​ Thai Khu Fah នៃវិមានរដ្ឋាភិបាលនៅម៉ោង ០៩:១៥ ព្រឹកថ្ងៃនេះ ដើម្បីចាប់ផ្តើមបំពេញមុខងារផ្លូវការរបស់លោកស្រី ដោយមានជំនួបជាមួយ​រដ្ឋមន្ត្រី​ការបរទេស លោក Maris Sangiampongsa ជួប​ជាមួយ​នឹង​ការ​រំពឹង​ទុកថា​​ពិភាក្សា​ទាក់ទង​នឹង​ស្ថានភាព​ព្រំដែន​កម្ពុជា។

ការិយាល័យនាយករដ្ឋមន្ត្រី នៅជាន់ទី២ នៃអគារ Thai Khu Fah គឺជាកន្លែងសម្រាប់ការហៅទូរស័ព្ទតាមកាលវិភាគនៅម៉ោង ៤:០០ ល្ងាច ជាមួយប្រធានាធិបតីបារាំងលោក Macron ។

ការ​កើន​ឡើង​នៃ​ការ​ប៉ះ​ទង្គិច​គ្នា​រវាង​ប្រទេស​ថៃ និង​កម្ពុជា បាន​ក្លាយ​ជា​ចំណុច​សំខាន់​មួយ​នៃ​ការ​ចាប់​អារម្មណ៍​របស់​ប្រព័ន្ធ​ផ្សព្វផ្សាយ។ ក្រោយការប្រកាសរបស់សម្ដេចតេជោ ហ៊ុន សែន នៅព្រឹកមិញនេះ សម្ដេចតេជោ ទម្លាយថា លោក ថាក់ស៊ីន សម្ដែងធ្វើឈឺ បន្លំ ភ្នែកតុលាការ​ដើម្បីគេចផុតពីដំណើរការក្ដីនៅតុលាការលើសំណុំរឿងជាច្រើន។

សម្ដេចតេជោ ទម្លាយថា នៅពេលសម្ដេចទៅសួរសុខទុក្ខថាក់ស៊ីន កាលពីថ្ងៃទី២១ ខែកុម្ភៈ ឆ្នាំ២០២៤ លោក ថាក់ស៊ីន គ្មានឈឺជំងឺអ្វីឡើយ ប៉ុន្តែពេលថតរូបជាមួយសម្ដេច បែជាយកសម្ភារៈអ្នកជំងឺមកពាក់បំភាន់ភ្នែកពលរដ្ឋ និងសមត្ថកិច្ចថៃ។

សម្ដេចថា ពេលដែលសម្ដេចទៅសួរសុខទុក្ខថាក់ស៊ីន សម្ដេចមិនដឹងទាល់តែសោះថាបុគ្គលនេះ សម្ដែងធ្វើជាឈឺ។ សម្ដេចតេជោ ទម្លាយថា មូលហេតុដែលសម្ដេចទើបទម្លាយនៅពេលនេះ គឺព្រោះតែពេលសម្ដេចដឹងភ្លាមៗ សម្ដេចគោរពគុណធម៌ ទើបមិនទម្លាយ ហើយមូលហេតុដែលទម្លាយនៅពេលនេះ គឺដោយសារតែកូនស្រីរបស់ថាក់ស៊ីន ជានាយករដ្ឋមន្ត្រីខ្វះគុណធម៌៕

អត្ថបទ៖ ប៊ុន សុភាព