ព័ត៌មានអន្ដរជាតិ

ជនជាតិចិនពីរនាក់ រងការចោទប្រកាន់ ពីបទចារកម្មនៅសហរដ្ឋអាមេរិក

បានផុស

១២ ខែ មុន

នៅ

ថ្ងៃពុធ ២ កក្កដា ២០២៥

ដោយ

ក្រសួងយុត្តិធម៌អាមេរិក បានឱ្យដឹងថា ជនជាតិចិនពីរនាក់ត្រូវបានចោទប្រកាន់ពីបទធ្វើចារកម្មឲ្យរដ្ឋាភិបាលក្រុងប៉េកាំង តាមរយៈការព្យាយាមបញ្ចុះបញ្ចូលសមាជិកកងទ័ពជើងទឹកអាមេរិកឱ្យបម្រើការងារជូនទីភ្នាក់ងារស៊ើបការណ៍សម្ងាត់របស់ប្រទេសចិន(MSS)។ នេះបើយោងតាមការចេញផ្សាយរបស់ទីភ្នាក់ងារព័ត៌មានAP នៅថ្ងៃទី០២ខែកក្កដា។

ត្រាក្រសួងយុត្តិធម៌អាកេរិក (រូបភាព៖ Getty)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជនសង្ស័យជាជនជាតិចិនទាំងពីរមានឈ្មោះ Yuance Chen អាយុ ៣៨ ឆ្នាំ និង Liren «Ryan» Lai អាយុ ៣៩ ឆ្នាំ ត្រូវបានគេចោទប្រកាន់ថាបានថតរូបមូលដ្ឋានទ័ពជើងទឹកសហរដ្ឋអាមេរិក។ លើសពីនេះ អ្នកទាំងពីរត្រូវបានចោទប្រកាន់ពីបទធ្វើចារកម្ម ដោយបានព្យាយាមបញ្ចុះបញ្ចូល និងរៀបចំសាច់ប្រាក់យ៉ាងតិច ១ម៉ឺនដុល្លារដល់សមាជិកកងទ័ពជើងទឹកអាមេរិករូបណា ដែលយល់ព្រមធ្វើតាមបញ្ជារបស់ MSS។

សំណុំរឿងនេះត្រូវបានបញ្ជូនទៅតុលាការនៅទីក្រុង San Francisco ហើយវាជាករណីថ្មីចុងក្រោយមួយ ពាក់ព័ន្ធនឹងការព្យាយាមរបស់ចិនដើម្បីប្រមូលព័ត៌មានសម្ងាត់អំពីយោធាអាមេរិក។ Lai ដែលរស់នៅក្នុងប្រទេសចិន ត្រូវបានសន្និដ្ឋានថាបានចាប់ផ្តើមធ្វើការជាមួយ Chen តាំងពីឆ្នាំ២០២១ ហើយបានទៅរដ្ឋ Texas ដើម្បីជួយដឹកនាំសកម្មភាពចារកម្ម។

អគ្គមេធាវី Pam Bondi ថ្លែងទៅកាន់អ្នកសារព័ត៌មាន នៅក្នុងបន្ទប់សង្ខេបនៃសេតវិមាន ក្នុងទីក្រុងវ៉ាស៊ីនតោន។ (រូបភាព៖ AP)

FBI និយាយថា បុរសទាំងពីរនាក់បានថតរូប និងមើលទីតាំងយោធាក្នុងរដ្ឋ California និង Washington ហើយបន្ទាប់មកបានចែករំលែកព័ត៌មាននោះជាមួយមន្ត្រីចិន។ ពួកគេក៏បានប្រមូលព័ត៌មានលម្អិតឯកជនអំពីការជ្រើសរើសទាហានជើងទឹក ជាពិសេសអ្នកដែលមានប្រវត្តិជាជនជាតិចិន ដើម្បីមើលថាតើពួកគេអាចត្រូវបានគេជ្រើសរើសជាអ្នកស៊ើបការណ៍ដែរឬទេ។

កាលពីឆ្នាំ២០២៣ មានករណីស្រដៀងគ្នានេះដែរ គឺនាវិកកងទ័ពជើងទឹកអាមេរិកពីរនាក់ត្រូវបានចាប់ខ្លួនផងដែរក្នុងការចែករំលែកអាថ៌កំបាំងជាមួយប្រទេសចិន។ មន្ត្រីអាមេរិកព្រមានថា ចិនកំពុងព្យាយាមដាក់អ្នកស៊ើបការណ៍នៅខាងក្នុងសហរដ្ឋអាមេរិក ដែលជាផ្នែកនៃផែនការរយៈពេលវែងដើម្បីធ្វើឱ្យសន្តិសុខអាមេរិកចុះខ្សោយ៕