ព័ត៌មានអន្ដរជាតិ

មន្ទីរបញ្ចកោណ៖ អាមេរិកកាត់បន្ថយសមត្ថភាពនុយក្លេអ៊ែរអ៊ីរ៉ង់បាន២ឆ្នាំ

បានផុស

១ year មុន

នៅ

ថ្ងៃព្រហស្បតិ៍ ៣ កក្កដា ២០២៥

ដោយ

Chheang

ក្រសួងការពារជាតិអាមេរិក បានប្រកាសកាលពីថ្ងៃពុធទី២ខែកក្កដាថា ការវាយប្រហារតាមអាកាសទៅលើទីតាំងនុយក្លេអ៊ែរសំខាន់ៗរបស់អ៊ីរ៉ង់ បានធ្វើឲ្យកម្មវិធីនុយក្លេអ៊ែររបស់ប្រទេសនេះធ្លាក់ចុះពី១ឆ្នាំទៅ២ឆ្នាំ។ នេះបើយោងតាមការលើកឡើងរបស់អ្នកនាំពាក្យមន្ទីរបញ្ចកោណ លោក Sean Parnell។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Parnell បានពណ៌នាអំពីបេសកកម្មនេះថាជា«ប្រតិបត្តិការដ៏ក្លាហាន» សំដៅលើការទម្លាក់គ្រាប់បែកនៅទីតាំងចម្រាញ់សារធាតុនុយរ៉ាញ៉ូមក្រោមដីក្នុង Fordow , Natanz និង Isfahan។ លោក Parnell បានកត់សម្គាល់ថា ការវាយប្រហារបានបំផ្លាញហេដ្ឋារចនាសម្ព័ន្ធសំខាន់ៗដែលចាំបាច់សម្រាប់ការចម្រាញ់សារធាតុអ៊ុយរ៉ាញ៉ូម។

ការលើកឡើងនេះ គឺខុសពីការអត្ថាធិប្បាយនាពេលកន្លងមករបស់លោកប្រធានាធិបតី ដូណាល់ ត្រាំ ដែលធ្លាប់អះអាងថា គ្រឿងបរិក្ខារនុយក្លេអ៊ែរអ៊ីរ៉ង់គឺត្រូវបាន«បំផ្លាញខ្ទេចទាំងស្រុង»។

ប្រធានអង្គការឃ្លាំមើលនុយក្លេអ៊ែររបស់អង្គការសហប្រជាជាតិ លោក Rafael Grossi បានព្រមានថា អ៊ីរ៉ង់អាចនៅតែអាចចាប់ផ្តើមការចម្រាញ់់នុយរ៉ាញ៉ូមឡើងវិញក្នុងរយៈពេលប៉ុន្មានខែខាងមុខទៀត ដោយលើកឡើងពីឃ្លាំងស្តុកទុក និងឧបករណ៍ចម្រាញ់ centrifuge ដែលមិនមានការខូចខាត។

ចំណែកឯមេដឹកនាំកំពូលអ៊ីរ៉ង់ លោក Ali Khamenei បាននិយាយកាលពីសប្តាហ៍មុនថា លោក ត្រាំ បាន«បំផ្លើស»ពីផលប៉ះពាល់នៃការវាយប្រហាររបស់អាមេរិកលើទីតាំងនុយក្លេអ៊ែរ។

បច្ចុប្បន្ន មិនទាន់មានការវាយតម្លៃដោយឯករាជ្យណាមួយនៅឡើយទេអំពីលទ្ធផលនៃការវាយប្រហាររបស់អាមេរិកដែលបានធ្វើឡើងជាផ្នែកមួយនៃសង្គ្រាមរយៈពេល ១២ថ្ងៃរវាងអ៊ីស្រាអែល និងអ៊ីរ៉ង់។ ការវិភាគដែលមើលឃើញតាមរយៈរូបភាពផ្កាយរណប មិនអាចចាប់យកបានពេញលេញនូវវិសាលភាពនៃការខូចខាតនៅកន្លែងក្រោមដីនោះទេ ជាពិសេសនៅ Fordow ដែលជារោងចក្រចម្រាញ់នុយរ៉ាញ៉ូមដ៏ធំបំផុតរបស់ប្រទេសអ៊ីរ៉ង់៕