ព្រឹត្តិការណ៍ពាក់ព័ន្ធនយោបាយចំនួន៣ ដែលបណ្តាលឲ្យមានមនុស្សស្លាប់ច្រើនបំផុត ក្នុងប្រវត្តិសាស្រ្តថៃ

ថៃជាប្រទេសប្រទេសមួយដែលមានបញ្ហានយោបាយដ៏ស្មុគស្មាញ ហើយពេលខ្លះឈានដល់កើតព្រឹត្តិការណ៍ដែលបណ្ដាលឲ្យមានការបាត់បង់ជីវិតមនុស្សថែមទៀតផង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បញ្ហាដែលពាក់ព័ន្ធនឹងនយោបាយបានបង្កឲ្យមានបាតុកម្ម ឈានដល់ការបង្រ្កាបឬការប៉ះទង្គិចប្រដាប់អាវុធរវាងក្រុមនយោបាយផ្សេងគ្នានិងកងកម្លាំងរដ្ឋ។

ថ្ងៃនេះ កម្ពុជាថ្មី សូមលើកយកព្រឹត្តិការណ៍នយោបាយដ៏បង្ហូរឈាមបំផុតមួយចំនួននៅក្នុងប្រវត្តិសាស្រ្តរបស់ប្រទេសថៃ៖

១. ការសម្លាប់រង្គាលថ្ងៃទី ៦ តុលា ឆ្នាំ ១៩៧៦

វាគឺជាការបង្រ្កាបដោយហិង្សាទៅលើក្រុមនិស្សិតនិងអ្នកតវ៉ាឆ្វេងនិយម ដែលកំពុងប្រមូលផ្តុំគ្នានៅសាកលវិទ្យាល័យ Thammasat និងតំបន់ជុំវិញ Sanam Luang ក្នុងទីក្រុងបាងកក។ ការបង្រ្កាបនោះគឺជាស្នាដៃរបស់កងកម្លាំងប៉ូលិស ក្រុមប្រដាប់អាវុធស្តាំនិយម និងកងទ័ព។

របាយការណ៍ផ្លូវការបញ្ជាក់ថា មានមនុស្សស្លាប់ចំនួន៤៦នាក់។ ទោះយ៉ាងណា របាយការណ៍មិនផ្លូវការ និងការប៉ាន់ស្មានពីអង្គការសិទ្ធិមនុស្សបានបង្ហាញថា ចំនួនមនុស្សស្លាប់ពិតប្រាកដគឺខ្ពស់ជាងនេះឆ្ងាយណាស់ ដោយខ្លះប៉ាន់ប្រមាណថា ឈានដល់ជាង១០០នាក់ ហើយខ្លះទៀតថាអាចដល់ ៥០០ នាក់ ឬច្រើនជាងនេះឯណោះ។

២. ការបង្ក្រាប Bloody May ឬ Black May ឆ្នាំ ១៩៩២

វាគឺជាការបង្រ្កាបយ៉ាងសាហាវឃោរឃៅទៅលើបាតុកម្មទ្រង់ទ្រាយធំដើម្បីលទ្ធិប្រជាធិបតេយ្យនៅទីក្រុងបាងកក។ បាតុករទាមទារឲ្យមានការលាលែងពីតំណែងរបស់នាយករដ្ឋមន្ត្រីលោក Suchinda Kraprayoon ដែលជាអតីតមេទ័ព ឡើងកាន់អំណាចក្រោយរដ្ឋប្រហារឆ្នាំ១៩៩១ ទាំងមិនឆ្លងកាត់ការបោះឆ្នោត។

មនុស្ស៥២នាក់ ត្រូវគេបញ្ជាក់ថាស្លាប់ ខណៈរាប់រយនាក់ទៀតរងរបួស និងមានមនុស្សរាប់រយនាក់បានបាត់ខ្លួន។

៣. ការបង្រ្កាបក្រុមអាវក្រហមឆ្នាំ ២០១០

ការប្រឈមមុខដាក់គ្នាដ៏ហិង្សារវាងកងកម្លាំងសន្តិសុខនិងក្រុមបាតុករ «អាវក្រហម» ដែលជាអ្នកគាំទ្រអតីតនាយករដ្ឋមន្ត្រី ថាក់ស៊ីន ស៊ីណាវ៉ាត្រ ក្នុងទីក្រុងបាងកកបានបណ្តាលឲ្យមនុស្ស៩៩នាក់ស្លាប់ និងជាង ២ ០០០ នាក់រងរបួស៕

អត្ថបទ៖ សុខ សុវណ្ណ

ចុចអាន៖ ព្រះ​​​មហាក្សត្រ​ថៃ​​​​​ផ្តែផ្តាំ​ឲ្យគណៈរដ្ឋមន្ត្រី​ទើប​ចូលស្បថ​បំពេញ​ការងារ​ដោយ​ការ​ទទួលខុសត្រូវ​