ព័ត៌មានអន្ដរជាតិ

ត្រាំ ប្រាប់ថានឹងហៅទូរសព្ទទៅ ហ្សេលេនស្គី និងអង្គការណាតូ ស្ដីជំនួបជាមួយ ពូទីន

បានផុស

៨ ខែ មុន

នៅ

ថ្ងៃសៅរ៍ ១៦ សីហា ២០២៥

ដោយ

Chheang

ប្រធានាធិបតីអាមេរិកលោក ដូណាល់ ត្រាំ នៅក្នុងសន្និសីទសារព័ត៌មានកាលពីថ្ងៃសុក្រទី១៥ខែសីហាឆ្នាំ២០២៥បន្ទាប់ពីកិច្ចប្រជុំកំពូលជាមួយសមភាគីរុស្ស៊ីលោក វ៉្លាឌីមៀរ ពូទីន បាននិយាយថា លោកនឹងសង្ខេបជំនួបលើកនេះទៅកាន់សម្ព័ន្ធមិត្តណាតូ និងមេដឹកនាំអ៊ុយក្រែនលោក វ៉ូឡូឌីមៀរ ហ្សេលេនស្គី អំពីលទ្ធផលដែលទទួលបាន។

លោក ពូទីន និងលោក ត្រាំ នៅរដ្ឋអាឡាស្កាថ្ងៃទី១៥សីហា២០២៥ (រូបថត៖ Reuters)

លោក ត្រាំ បានរៀបរាប់ថា «ខ្ញុំគិតថា យើងមានកិច្ចប្រជុំប្រកបដោយផលិតភាព។ មានរឿងជាច្រើនដែលយើងបានព្រមព្រៀងគ្នា…តែគ្មានកិច្ចព្រមព្រៀងនៅឡើយទេ។ ខ្ញុំនឹងហៅទូរសព្ទទៅអង្គការណាតូ… ជាការពិតណាស់ ខ្ញុំនឹងទូរសព្ទទៅប្រធានាធិបតី ហ្សេលេនស្គី ហើយឲ្យគាត់ដឹងពីកិច្ចប្រជុំថ្ងៃនេះ… យើងពិតជាមានការរីកចម្រើនជាច្រើន»។

ទោះលោក ត្រាំ ប្រាប់ថា កិច្ចចរចាជាមួយ ពូទីន ដំណើរការល្អ មានផ្លែផ្កាល្អ ប៉ុន្តែបើយោងតាមការវាយតម្លៃបឋមដោយក្រុមការងាររបស់ប្រធានាធិបតីអ៊ុយក្រែន ជំនួបលើកនេះមិនមានការរីកចម្រើនគួរឲ្យកត់សម្គាល់ណាមួយទេ។ ទីប្រឹក្សាម្នាក់របស់លោក ហ្សេលេនស្គី បានពណ៌នាការប្រជុំនេះថា «មិនមានអ្វីពិសេសទាល់តែសោះ»។

សូមជម្រាបថា នៅក្នុងសន្និសីទដដែលនេះ មេដឹកនាំអាមេរិក បានបញ្ជាក់ថា លោកនឹងអាចជួប ពូទីន ម្ដងទៀតនាពេលឆាប់ៗខាងមុខ ដែលក្រោយមកប្រធានាធិបតីរុស្ស៊ី បានឆ្លើយតបវិញថា «លើកក្រោយនៅទីក្រុងមូស្គូ»៕