ទាហាន​ស៊ីរី​៦​នាក់ ស្លាប់ក្នុង​ការ​វាយ​ប្រហារ​របស់​អ៊ីស្រាអែល​​ជិត​ទីក្រុង Damascus

យោងតាមការចេញផ្សាយរបស់សារព័ត៌មានAl Jazeera ដែលដកស្រង់ចេញពីប្រព័ន្ធផ្សព្វផ្សាយរដ្ឋស៊ីរី កងទ័ពស៊ីរី ៦ នាក់ត្រូវបានសម្លាប់នៅក្នុងការវាយប្រហារដោយយន្តហោះគ្មានមនុស្សបើករបស់អ៊ីស្រាអែលនៅភាគខាងត្បូងនៃទីក្រុង Damascus នៅព្រឹកថ្ងៃពុធនេះ។

ការវាយប្រហារនេះបានកើតឡើងភ្លាមៗបន្ទាប់ពីស៊ីរីបានចោទប្រកាន់យោធាអ៊ីស្រាអែលពីការលុកលុយនៅជិតភ្នំ Hermon ដែលមានទាហានអ៊ីស្រាអែលប្រហែល ៦០នាក់ឆ្លងចូលទៅក្នុងទឹកដីស៊ីរី។

គួរបញ្ជាក់ថាបន្ទាប់ពីការដួលរលំនៃរបបលោក Assad កាលពីខែធ្នូឆ្នាំមុន អ៊ីស្រាអែលបានបង្កើនការវាយប្រហារតាមអាកាសនៅទូទាំងប្រទេសស៊ីរី ដោយដណ្តើមយកផ្នែកខ្លះនៃតំបន់គ្មានយោធា រំលោភលើកិច្ចព្រមព្រៀងឆ្នាំ ១៩៧៤ ។ កស៊ីរីបាន​ចោទ​ប្រកាន់​អ៊ីស្រាអែល​ពី​ការ​បង្កើត​ប៉ុស្តិ៍​យោធា និង​កន្លែង​ស៊ើបការណ៍​សម្ងាត់​ដើម្បី​ជំរុញ​«ផែនការ​ពង្រីកទឹកដី»។

ការកើនឡើងនេះក៏ស្របពេលដែលនាយករដ្ឋមន្ត្រីអ៊ីស្រាអែលលោក បេនចាមីន ណេតាន់យ៉ាហ៊ូ ផ្សព្វផ្សាយទស្សនវិស័យ «មហាអំណាចអ៊ីស្រាអែល» ដែលទាមទារទឹកដីនៅទូទាំងរដ្ឋអារ៉ាប់ជិតខាង។ សម្ព័ន្ធអារ៉ាប់ និងប្រទេសចំនួន ៣១ បានថ្កោលទោសជំហរនេះថាជាការបំពានយ៉ាងធ្ងន់ធ្ងរលើច្បាប់អន្តរជាតិ៕

អត្ថបទ៖ ប៊ុន សុភាព