លោក ត្រាំ៖ យុទ្ធនាការ​អាមេរិកសម្លាប់«ពួកភេរវករគ្រឿងញៀន»វ៉េណេស៊ុយអេឡា ១១នាក់

កាលពីថ្ងៃទី២​ខែកញ្ញា​ឆ្នាំ២០២៥ ប្រធានាធិបតីអាមេរិក លោក ដូណាល់ ត្រាំ បានប្រកាស​ថា កងកម្លាំងសហរដ្ឋអាមេរិកបានបំផ្លាញនាវាដឹកគ្រឿងញៀននៅភាគខាងត្បូង​តំបន់​ការ៉ាប៊ីន ដោយបានសម្លាប់សមាជិកសង្ស័យចំនួន ១១នាក់នៃក្រុមកឧក្រិដ្ឋជន​ Tren de Aragua របស់ប្រទេសវ៉េណេស៊ុយអេឡា។

លោក ត្រាំ បាននិយាយថា ការ​វាយ​ប្រហារ​នេះ សំដៅទៅលើអ្វីដែលលោកហៅថាជា«ពួកភេរវករ​គ្រឿង​ញៀន» ដែលកំពុងប្រតិបត្តិការនៅក្នុងដែនទឹកអន្តរជាតិ។ លោក​​អះអាង​ថា កប៉ាល់​នេះ​កំពុង​ដឹក​ជញ្ជូន​គ្រឿង​ញៀន​ទៅ​កាន់​សហរដ្ឋ​អាមេរិក។

មេ​ដឹក​នាំ​អាមេរិក​ បាន​រៀបរាប់​នៅ​លើ​បណ្ដាញ​សង្គម Truth Social ថា «កាលពីព្រឹកមិញ តាមបញ្ជារបស់ខ្ញុំ កងកម្លាំងយោធាសហរដ្ឋអាមេរិកបានធ្វើចលនា​វាយប្រហារ​ប្រឆាំងនឹងក្រុមភេរវករ​គ្រឿងញៀន Tren de Aragua ដែលត្រូវបានកំណត់អត្តសញ្ញាណជាក់លាក់​នៅក្នុងតំបន់ SOUTHCOM។ ការវាយប្រហារនេះបានបណ្តាល​ឲ្យ​ភេរវករ ១១​នាក់ត្រូវបានសម្លាប់នៅនឹង​កន្លែង។ គ្មានកងកម្លាំងសហរដ្ឋអាមេរិកណាម្នាក់រងគ្រោះថ្នាក់ចំពោះការវាយប្រហារនេះទេ។ សូម​ទុក​នេះ​​​ជា​សារ​​ជូន​ដំណឹង​ដល់​អ្នក​ណា​ដែល​គិត​អំពី​ការ​នាំ​គ្រឿង​ញៀន​ចូល​សហរដ្ឋ​អាមេរិក។ ចូរប្រយ័ត្នខ្លួន!»។

ការ​វាយ​ប្រហារ​លើក​នេះ គឺជាការកើនឡើង​ភាព​តានតឹង​​ចុងក្រោយបង្អស់នៅក្នុងយុទ្ធនាការរបស់ទីក្រុងវ៉ាស៊ីនតោនប្រឆាំងនឹងប្រធានាធិបតីវ៉េណេស៊ុយអេឡា នីកូឡាស ម៉ាឌូរ៉ូ ដែលរដ្ឋបាល​លោក ត្រាំ ចោទប្រកាន់ថាបានដឹកនាំសហគ្រាសឧក្រិដ្ឋកម្ម។ សហរដ្ឋអាមេរិកបានផ្តល់រង្វាន់ចំនួន ៥០​លានដុល្លារសម្រាប់ព័ត៌មានដែលនាំទៅដល់ការចាប់ខ្លួនលោក ម៉ាឌូរ៉ូ លើការចោទប្រកាន់ពីបទជួញដូរគ្រឿងញៀន។

កាល​ពី​ថ្ងៃ​ចន្ទ លោក ម៉ាឌូរ៉ូ បាន​ព្រមាន​ថា លោក​​​បាន​ត្រៀម​ខ្លួន​​ប្រយុទ្ធ​​រួច​រាល់​ហើយ ប្រសិន​បើ​កងកម្លាំងដែល​សហរដ្ឋអាមេរិកដាក់ពង្រាយនៅតំបន់ការ៉ាប៊ីន បើកការវាយប្រហារលើប្រទេសរបស់លោក។ លោក​បញ្ជាក់​ថា នាវាយោធាអាមេរិកចំនួន​៨​គ្រឿងដែលបំពាក់ដោយមីស៊ីល​ចំនួន​១ ២០០​គ្រាប់​ ឥឡូវនេះកំពុងតម្រង់គោលដៅលើប្រទេសវ៉េណេស៊ុយអេឡា។ លោក​បាន​​ហៅការដាក់ពង្រាយនេះថា «ជាការគំរាមកំហែងដ៏ធំបំផុតដែលត្រូវបានគេមើលឃើញនៅលើទ្វីបរបស់យើងក្នុងរយៈពេល ១០០​ឆ្នាំចុងក្រោយនេះ»៕

ដោយ៖ ឈាង

ចុចអាន៖ ម៉ាឌូរ៉ូ ប្រកាស​ត្រៀម​ខ្លួន​ប្រយុទ្ធ ខណៈកងទ័ពអាមេរិក​តម្រង់​មីស៊ីល ១ ២០០គ្រាប់​​លើវ៉េណេស៊ុយអេឡា