កូរ៉េខាងត្បូង ជំរុញឲ្យចិនជួយបញ្ឈប់មហិច្ឆតានុយក្លេអ៊ែររបស់កូរ៉េខាងជើង

កូរ៉េខាងត្បូងបានសម្តែងក្តីសង្ឃឹមថា ទំនាក់ទំនងដែលកំពុងរីកចម្រើនរវាងកូរ៉េខាងជើង និងចិននឹងគាំទ្រដល់កិច្ចខិតខំប្រឹងប្រែងឆ្ពោះទៅរកការរំសាយអាវុធនុយក្លេអ៊ែរ និងសន្តិភាពយូរអង្វែងនៅលើឧបទ្វីបកូរ៉េ។ នេះបើយោងតាមការចេញផ្សាយរបស់ទីភ្នាក់ងារព័ត៌ Reuters នៅថ្ងៃទី០៧ខែតុលា។

យោងតាមសេចក្តីថ្លែងការណ៍របស់ក្រសួងការបរទេសកូរ៉េខាងត្បូងរដ្ឋមន្ត្រីការបរទេសលោក Cho Hyun បានធ្វើការកត់សម្គាល់ ក្នុងអំឡុងពេលសន្ទនាតាមទូរស័ព្ទជាមួយសមភាគីចិន លោក Wang Yi ដោយសង្កត់ធ្ងន់លើចេតនារបស់ទីក្រុងសេអ៊ូលក្នុងការរក្សាទំនាក់ទំនងជិតស្និទ្ធជាមួយទីក្រុងប៉េកាំងលើបញ្ហាសន្តិសុខក្នុងតំបន់។

ទំនាក់ទំនងរវាងចិន និងកូរ៉េខាងជើងត្រូវបានចាក់ឫសយ៉ាងយូរនៅក្នុងទំនាក់ទំនងជាប្រវត្តិសាស្ត្រ និងនយោបាយរួមគ្នា ដែលមានតាំងពីអំឡុងសង្គ្រាមកូរ៉េក្នុងទសវត្សរ៍ឆ្នាំ ១៩៥០។ ក្នុងប៉ុន្មានឆ្នាំថ្មីៗនេះ ទីក្រុងប៉េកាំងនៅតែជាដៃគូពាណិជ្ជកម្មដ៏សំខាន់ និងជាសម្ព័ន្ធមិត្តការទូតរបស់ទីក្រុងព្យុងយ៉ាង បើទោះបីជាទណ្ឌកម្មអន្តរជាតិបានធ្វើឱ្យកូរ៉េខាងជើងផ្ដាច់ខ្លួនពីគេដោយសារកម្មវិធីអាវុធនុយក្លេអ៊ែររបស់ខ្លួនក៏ដោយ។

ទីក្រុងសេអ៊ូលបានស្វែងរកតុល្យភាពសម្ព័ន្ធភាពរបស់ខ្លួនជាមួយសហរដ្ឋអាមេរិក និងទំនាក់ទំនងសេដ្ឋកិច្ចជាមួយប្រទេសចិន ដោយជំរុញឱ្យមហាអំណាចទាំងពីរដើរតួនាទីក្នុងការបន្ធូរបន្ថយភាពតានតឹងនៅឧបទ្វីប។ ការអំពាវនាវរវាងលោក Cho និងលោក Wang កើតឡើងចំពេលមានការរំពឹងទុកជាថ្មីអំពីសកម្មភាពអាវុធ និងការខិតខំប្រឹងប្រែងរបស់មហាអំណាចក្នុងតំបន់ ដើម្បីចាប់ផ្តើមកិច្ចចរចាការទូតដែលជាប់គាំងឡើងវិញ។ លើសពីនេះ កូរ៉េ​ខាង​ត្បូង​បាន​បញ្ជាក់​ជា​ថ្មី​ថា កិច្ច​សហប្រតិបត្តិការ​ក្នុង​ចំណោម​ប្រទេស​ជិត​ខាង​ជា​ពិសេស​ប្រទេស​ចិន​នៅ​តែ​មាន​សារៈ​សំខាន់​ក្នុង​ការ​លើក​កម្ពស់​សន្តិភាព និង​ស្ថិរភាព​ក្នុង​តំបន់។

គួរបញ្ជាក់ដែរថាការជំរុញនេះ ក៏កើតឡើងបន្ទាប់ ​រដ្ឋមន្ត្រី​ការបរទេស​កូរ៉េ​ខាង​ជើងលោកស្រី Choe Son Hui និង​សមភាគី​ចិន​របស់​លោកWang Yi ជួបប្រជុំគ្នានៅទីក្រុងប៉េកាំងពី កាលពីថ្ងៃ២៩ខែកញ្ញា ដោយបានសន្យាពង្រឹងទំនាក់ទំនងឱ្យកាន់តែស៊ីជម្រៅ និងប្រឆាំងនឹងឯកតោភាគីនិយម ដែលជាសញ្ញានៃការរួបរួមប្រឆាំងនឹងឥទ្ធិពលរបស់សហរដ្ឋអាមេរិក៕

អត្ថបទ៖ ប៊ុន សុភាព