សុខភាព

ចំណុចទាំងនេះ បញ្ជាក់ថា កូនរបស់អ្នកអាចកើតជំងឺកង្វះអ័រម៉ូនទីរ៉ូអ៊ីតពីកំណើត

បានផុស

៥ years មុន

នៅ

ថ្ងៃសុក្រ ១០ កញ្ញា ២០២១

ដោយ

១)ក្រពេញទីរ៉ូអ៊ីតជាអ្វី ហើយក្រពេញនេះមានមុខងារ អ្វីខ្លះ?

ក្រពេញទីរ៉ូអ៊ីត ជាក្រពេញមួយស្ថិតនៅផ្នែកខាងមុខនៃ បំពង់ក។ វាមានតួនាទីផលិតអ័រម៉ូនទីរ៉ូអ៊ីតពីរសំខាន់គឺ អ័រម៉ូនទីរ៉ុកស៊ីន (T4) និងអ័រម៉ូនទ្រីអ៊ីយូដូទីរូនីន(T3)។ អ័រម៉ូនទីរ៉ូអ៊ីតនេះ មានសារៈសំខាន់ជាពិសេសទៅលើការលូតលាស់ខួរក្បាល និងរាងកាយរបស់ទារក និងកុមារ។

Congenital Hypothyroidism: Effects on Linear Growth, Catch- Up Growth, GH-IGF-I Axis and Bones | IntechOpen

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

២) តើអ្វីទៅជាជំងឺកង្វះអ័រម៉ូនទីរ៉ូអ៊ីតពីកំណើត?

ជំងឺកង្វះអ័រម៉ូនទីរ៉ូអ៊ីតពីកំណើត គឺជាកង្វះការផលិតឬគ្មានការផលិតអ័រម៉ូនទីរ៉ូអ៊ីតដោយសារការ

គ្មានក្រពេញទីរ៉ូអ៊ីត ឬមានដែរតែក្រពេញទីរ៉ូអ៊ីតតូចជាងធម្មតា។ ចំពោះទារកដែលមានជំងឺនេះ ក្រពេញទីរ៉ូអ៊ីតពុំអាចផលិតអ័រម៉ូនទីរ៉ូអ៊ីតគ្រប់គ្រាន់សម្រាប់ បំពេញតម្រូវការលូតលាស់សារពាង្គកាយនោះឡើយ។ អត្រាកើតជំងឺនេះមាន១នាក់ ក្នុងចំណោមមទារក ៣៥០០ ទៅ៤០០០នាក់។

៣) តើអ្វីទៅជាមូលហេតុ នៃជំងឺកង្វះអ័រម៉ូនទីរ៉ូអ៊ីតពីកំណើត?

មូលហេតុនៃជំងឺនេះចែកជាពីរផ្នែក៖

– ទារកគា្មនក្រពេញទីរ៉ូអ៊ីត ឬក្រពេញទីរ៉ូអ៊ីតនៅខុសកនែ្លង (85%ករណី)។ ករណីមិនធម្មតាពីកំណើតនេះពុំមានមូលហេតុច្បាស់លាស់ហើយក៏មិនមែនជាតំណពូជដែរ។

– ទារកមានក្រពេញទីរ៉ូអ៊ីត តែការផលិតអ័រម៉ូនមានវិបត្តិ ការផលិតពុំគ្រប់គ្រាន់ (15%ករណី) ដែលជាទូទៅអាចជាតំណពូជ។

5 Surprising Facts about “Low Thyroid” in Children and Teens - What parents should know about hypothyroidism

៤) តើជំងឺកង្វះអ័រម៉ូនទីរ៉ូអ៊ីតពីកំណើតមានរោគសញ្ញាអី្វខ្លះ?

លើសពី៩០%នៃទារក ដែលមានជំងឺកង្វះអ័រម៉ូនទីរ៉ូអ៊ីតពីកំណើតពុំមានលេចចេញនូវរោគសញ្ញា អ្វីឡើយ ទារកមានសភាពទូទៅដូចទារកធម្មតា តែបើមិនមានការព្យាបាលទាន់ពេលវេលាទារក អាចចេញសញ្ញាប៉ះពាល់ដល់ការលូតលាស់រាងកាយ និងបញ្ញាស្មារតីដែលបណ្តាលពីការកង្វះរ៉ាំរ៉ៃ។ ប្រហែលជា៥%នៃទារកដែលមានជំងឺនេះ ដែលអាចបង្ហាញរោគសញ្ញាមួយចំនួនដូចជា៖

– អណា្តតធំហើយធ្លាក់

– ទល់លាមកញឹកញាប់

– សភាពទន់ខ្លាំងខុសពីធម្មតា

– ខាន់លឿងយូរខុសពីធម្មតា

– ពិបាកក្នុងការបៅ ឬបៅយូរជាងកេ្មងធម្មតា

– ទារកមានសភាពស្ងប់ស្ងាត់ ឬគេងច្រើនខុសពីក្មេងធម្មតា

– ផ្ចិតលៀន និងពោះប៉ោង

Hypothyroidism in Children: Knowing the Signs and Symptoms

ចំពោះរោគសញ្ញា ដែលរៀបរាប់ខាងលើភាគច្រើនស្តែងចេញនៅពេលទារកមានអាយុ១ខែនោះការព្យាបាល នឹងពុំមានប្រសិទ្ធភាពឡើយ។

៥)តើធ្វើដូចម្ដេច ដើម្បីដឹងថាកូនលោកអ្នកមានជំងឺកង្វះអ័រម៉ូនទីរ៉ូអ៊ីតពីកំណើត?

តាមរយៈការធ្វើតេស្តឈាមពីកែងជើងទារក ដោយផ្តិតលើក្រដាសស្ងួត ចាប់ពីអាយុ៤៨ ទៅ៧២ម៉ោង ក្រោយសម្រាល ដើម្បីធ្វើការវិភាគលើកម្រិតអ័រម៉ូន TSH (thyroid stimulating hormone) ។ TSH ជាអ័រម៉ូនដែលផលិតពីក្រពេញមួយក្នុងខួរក្បាលសម្រាប់បញ្ជាការផលិតអ័រម៉ូនទីរ៉ូអ៊ីតពីក្រពេញទីរ៉ូអ៊ីត។ ប្រសិនបើកម្រិតអ័រម៉ូនTSH កើនលើសពីតម្លៃធម្មតា អាចបង្ហាញពីករណីសង្ស័យកង្វះអ័រម៉ូនទីរ៉ូអ៊ីត។ ទារកនឹងត្រូវបានហៅត្រលប់មកធ្វើតេស្តឈាមជាលើកទីពីរដើម្បីបញ្ជាក់រោគវិនិច្ឆ័យរបស់ជំងឺនេះ។

៦)តើហេតុអ្វីបានជាទារកគួរតែចាំបាច់ធ្វើតស្ត ដើម្បីស្វែងរកជំងឺកង្វះអ័រម៉ូនទីរ៉ូអ៊ីតពីកំណើត?

ការស្វែងរកជំងឺកង្វះអ័រម៉ូនទីរ៉ូអ៊ីតពីកំណើត តាមរយៈការធ្វើតេស្តឈាមនៅប៉ុន្មានថ្ងៃដំបូងនៃជីវិតមានសារៈសំខាន់ណាស់ ដោយសារការរកឃើញជំងឺនេះ និងការព្យាបាលមុនការលេចចេញនូវរោគសញ្ញា អាចជួយទារកឲ្យមានការ លូតលាស់ផ្នែកបញ្ញា និងរាងកាយបានប្រក្រតី។ ការយឺតយ៉ាវក្នុងការព្យាបាល ឬពុំបានទទួលការព្យាបាលត្រឹមត្រូវ អាចបណ្តាលឲ្យទារកវិវត្តន៍ទៅរកការខ្សោយបញ្ញា ឬបើធ្ងន់ធ្ងរទារកអាចមានពិការភាពផ្នែកកាយសម្បទា។

Understanding Congenital Hypothyroidism in Your Baby

៧) តើធ្វើដូចម្ដេចប្រសិនបើលទ្ធផលនៃតេស្តឈាមទារកវិជ្ជមាន ដែលជាជំងឺកង្វះអ័រម៉ូនទីរ៉ូអ៊ីតពីកំណើត?

ប្រសិនបើ ទារកមានតេស្តឈាមវិជ្ជមានបញ្ជាក់ពីរោគវិនិច្ឆ័យកង្វះអ័រម៉ូនទីរ៉ូអ៊ីតពីកំណើត ទារកនឹងទទួលការព្យាបាល និងតាមដានដោយគ្រូពេទ្យឯកទេសកុមារ។ ការព្យាបាលមានភាពសាមញ្ញនិងងាយស្រួល ពុំមានផ្តល់ផលលំបាកអ្វីឡើយ។ ការប្រើប្រាស់ថ្នាំ Levothyroxin សម្រាប់ជំនួសអ័រម៉ូន ដើម្បីរក្សាលំនឹងនិងសកម្មភាពធម្មតារបស់អ័រម៉ូនក្នុងឈាម។ ការព្យាបាលដោយថ្នាំ ក្នុងរយៈពេលទារកក្រោមអាយុមួយខែនៃជីវិត មានប្រសិទ្ធភាពខ្ពស់ក្នុងការវិវត្តរាងកាយនិង បញ្ញារបស់ទារក។ ទារកនឹងត្រូវបានតាមដានការវិវត្តន៍រាងកាយនិងបញ្ញា ព្រមទាំងតាមដានកម្រិតអ័រម៉ូនតាមរយៈការធ្វើតេស្តឈាមទៀងទាត់ ដើម្បីសម្របសម្រួលកម្រិតនៃការប្រើប្រាស់ថ្នាំ៕

អត្ថបទ៖ រស្មី

Related Topics:សុខភាពកុមារ