៣ឆ្នាំទៀត វ៉ាក់សាំងមហារីករបស់រុស្ស៊ី នឹងមានលក់លើទីផ្សារ

តាមការបញ្ជាក់ពីមន្ត្រីជាន់ខ្ពស់នៅទីភ្នាក់ងារវេជ្ជសាស្ត្រ-ជីវសាស្ត្រសហព័ន្ធ (FMBA) កាលពីថ្ងៃព្រហស្បតិ៍ទី២១ខែមីនា, ក្រុមអ្នកស្រាវជ្រាវផ្នែកវេជ្ជសាស្ត្ររុស្ស៊ី នឹងផលិតបានវ៉ាក់សាំងមហារីក ហើយអាចដាក់លក់នៅលើទីផ្សារ ក្នុងរយៈពេលពីរទៅបីឆ្នាំខាងមុខ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Vasily Lazarev នាយករងនៃមជ្ឈមណ្ឌលវិទ្យាសាស្ត្រនិងគ្លីនិកសហព័ន្ធ Lopukhin បានប្រាប់សារព័ត៌មាន RTVI ថា “ប្រសិនបើមានការគាំទ្រផ្នែកហិរញ្ញវត្ថុគ្រប់គ្រាន់ ខ្ញុំគិតថា ក្នុងរយៈពេល២ឬ៣ឆ្នាំទៀត អ្នកវិទ្យាសាស្រ្តនឹងផលិតបានវ៉ាក់សាំងពេញលេញ រួចដាក់ឲ្យចរាចរណ៍លើទីផ្សារតែម្តង ហើយវិនិយោគិនឯកជនក្នុងស្រុក ក៏នឹងទទួលបានការចែករំលែកចំពោះបច្ចេកវិទ្យានេះផងដែរ បន្ទាប់ពីមានការបន្ធូរបន្ថយសម្ពាធបទប្បញ្ញត្តិ”។

ទោះបែបនេះក្តី លោក Lazarev បង្ហាញកង្វល់ថា បច្ចុប្បន្ននេះ ការអភិវឌ្ឍវ៉ាក់សាំងមហារីក កំពុងជួបប្រទះបញ្ហាប្រឈមផ្នែកផ្លូវច្បាប់ ព្រោះត្រូវឆ្លងកាត់នីតិវិធីសាំញ៉ាំច្រើនដំណាក់កាល។

យ៉ាងណាក៏ដោយ ក្រុមអ្នកវិទ្យាសាស្រ្តរុស្ស៊ី ក៏មិនបញ្ជាក់ច្បាស់ដែរថាតើ វ៉ាក់សាំងនេះ នឹងត្រូវដាក់លក់លើទីផ្សារក្នុងស្រុក ឬពិភពលោក?

កាលពីខែកុម្ភៈ លោកប្រធានាធិបតី វ្ល៉ាឌីមៀរ ពូទីន ក៏ប្រកាសដែរថា ក្រុមអ្នកវិទ្យាសាស្ត្រ កំពុងធ្វើការលើវ៉ាក់សាំងប្រឆាំងជំងឺមហារីក និងថ្នាំលេបជំនាន់ថ្មី។

ថ្លែងនៅឯវេទិកាបច្ចេកវិទ្យាអនាគតក្នុងទីក្រុងមូស្គូនាពេលនោះ លោកពូទីនចង្អុលបង្ហាញថា រុស្ស៊ី បានបោះជំហានដ៏ធំមួយ ឆ្ពោះទៅរកការប្រឆាំងនិងព្យាបាលជំងឺមហារីកនៅដំណាក់កាលដំបូង ដោយនាំឲ្យអត្រារស់រានមានជីវិតកាន់តែខ្ពស់។ នោះគឺជាវ៉ាក់សាំងប្រឆាំងជំងឺមហារីក onco-vaccine និងថ្នាំ immunomodulatory ជំនាន់ថ្មី។

យោងតាមលោកប្រធានាធិបតី, ជាងពាក់កណ្តាលនៃករណីមហារីកទាំងអស់នៅក្នុងប្រទេសរុស្ស៊ី គឺត្រូវបានរកឃើញនៅដំណាក់កាលដំបូង ហើយលោកក៏សន្យាបន្តផ្តល់មូលនិធិដល់ការស្រាវជ្រាវ និងអភិវឌ្ឍផ្នែកវេជ្ជសាស្រ្ត ក្នុងកម្រិតចាំបាច់ផងដែរ៕

អត្ថបទ៖ សុខ សុវណ្ណ

ចុចអាន៖ រុស្ស៊ី ជិតផលិតបាន វ៉ាក់សាំងប្រឆាំង ជំងឺមហារីក