KPT+

ការស្លាប់ដោយសារថ្នាំបំពុល ៥ ករណី ប្រចាំប្រវត្តិសាស្ត្រពិភពលោក

បានផុស

៤ ខែ មុន

នៅ

ថ្ងៃពុធ ៣១ ឧសភា ២០២៣

ដោយ

ការបំពុលជាវិធីសម្លាប់មនុស្សមួយក្នុងចំណោមវិធីជាច្រើន ហើយក៏ធ្លាប់កើតឡើងជាច្រើនករណីផងដែរ ។ ប៉ុន្តែថ្ងៃនេះ មកដឹងពីការស្លាប់ដោយសារថ្នាំពុល ៥ ករណីសំខាន់ៗប្រចាំប្រវត្តិសាស្ត្រពិភពលោកវិញម្ដង ៖

១. សូក្រាត

កាលពីឆ្នាំ ៣៩៩ មុនគ្រិស្តសករាជ រដ្ឋាភិបាលអាថែនបានកាត់ទោសសូក្រាតពីបទបង្ខូចយុវជន និងមិនគោរពព្រះនៃទីក្រុង-រដ្ឋក្រិក ។ សូក្រាតសុខចិត្តស្លាប់ ក៏មិនបោះបង់ជំនឿរបស់គាត់ដែរ ដូច្នេះគាត់សម្រេចចិត្តផឹកថ្នាំបំពុលខ្លួនឯងតែម្ដង អ្នកប្រវត្តិសាស្ត្រសន្និដ្ឋានថាថ្នាំពុលដែលទស្សនវិទូវ័យ ៧០ ឆ្នាំផឹក គឺធ្វើពីដើមខ្ញែរ ។ ២០០ ឆ្នាំក្រោយមក មានវិចិត្រករបារាំងម្នាក់ឈ្មោះ Jacques-Louis David បានគូររូបមួយផ្ទាំងហៅថា “ការស្លាប់របស់សូក្រាត (The Death of Socrates)” ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

២. Juan Ponce de León

នៅឆ្នាំ ១៥២១ អ្នកផ្សងព្រេងជនជាតិអេស្ប៉ាញ Juan Ponce de León ត្រូវជនជាតិដើមភាគតិច Calusa សម្លាប់ដោយប្រើព្រួញជ្រលក់ជ័រដើម manchineel tree ដែលជារុក្ខជាតិពុល ។

៣. Charles Francis Hall

លោក Charles Francis Hall ជនជាតិអាមេរិក គឺជាអ្នកស្រាវជ្រាវអាកទិច និងជាមេបញ្ជាការបេសកកម្មប៉ូឡារីស ដែលទទួលបរាជ័យក្នុងការទៅរុករកប៉ូលខាងជើង។ ដល់ចុងខែតុលា ឆ្នាំ ១៨៧១ Hall ចាប់ផ្ដើមមានបញ្ហាសុខភាព ហើយចោទប្រកាន់សមាជិកថាលួចបំពុលគាត់។ ពីរសប្ដាហ៍ក្រោយលោកពិតជាបាត់បង់ជីវិតមែន បើយោងតាមកោសលវិច័យក្នុងអំឡុងឆ្នាំ ១៩៦០ គេរកឃើញថា Hall ត្រូវថ្នាំពុលប្រភេទអាសេនិចរយៈពេល ២ សប្ដាហ៍មុនស្លាប់ ដូច្នេះការសង្ស័យរបស់គាត់គឺត្រឹមត្រូវ ប៉ុន្តែឃាតកនៅតែជាមនុស្សអាថ៌កំបាំងរហូតមកដល់សព្វថ្ងៃ ។

៤. Guangxu

ឆ្នាំ ១៨៧៥ Guangxu ក្លាយជាស្ដេចនៃរជ្ជកាលឈីងទាំងទ្រង់ទើបមានព្រះជន្ម ៤ វស្សាប៉ុណ្ណោះ ក្រោយការសុគតរបស់ទ្រង់នៅព្រះជន្ម ៣៧ ឆ្នាំ គេសង្ស័យទ្រង់ត្រូវថ្នាំបំពុល ប៉ុន្តែកំណត់ត្រារបស់អធិរាជបានបង្ហាញថាទ្រង់សុគតដោយមូលហេតុធម្មជាតិទេ ។ រហូតដល់ឆ្នាំ ២០០៨ ទើបអ្នកស្រាវជ្រាវសម័យទំនើបច្បាស់ពីពាក្យចចាមអារ៉ាមថ្នាំបំពុលគឺជាការពិត វាជាប្រភេទថ្នាំពុលអាសេនិច ចំណែកឃាតកនៅតែមិនទាន់រកឃើញដូចគ្នា ។

៥. Grigori Rasputin

លោក Rasputin ជាមនុស្សមិនចេះអក្សរម្នាក់ល្បីខាងមានអាកប្បកិរិយាអសីលធម៌ យ៉ាងណាគាត់អាចមានទំនាក់ទំនងជិតស្និទ្ធគួរសមជាមួយព្រះអង្គម្ចាស់ Tsar Nicholas II និងខ្សែរាជវង្សដែលត្រួតត្រាសូវៀតមុនការបដិវត្តន៍ ឆ្នាំ ១៩១៧ ។ ក្នុងខែធ្នូ ឆ្នាំ១៩១៦ ព្រះអង្គម្ចាស់ Felix Yusupov និងគ្នីគ្នាបានរួមគំនិតសម្លាប់ Rasputin ដោយលាយថ្នាំពុល ប៉ូតាស្យូម cyanide ជាមួយម្ហូបអាហាររបស់គាត់ ។ ពេលនោះថ្នាំពុលហាក់បីមិនអាចផ្ដួល Rasputin បានឡើយ ទើប Yusupov និងអ្នកសមគំនិតបាញ់ហើយចាប់ច្រមុជទឹកឲ្យដាច់ខ្យល់ស្លាប់វិញ ៕

ប្រែសម្រួល ៖ វារី

ចុចអាន ៖ ដឹងកាន់តែច្បាស់ពីសួនច្បារពុលនៅ អង់គ្លេស អាចឲ្យមនុស្សដួលសន្លប់