KPT+

ជាងកាត់សក់ជប៉ុន វ័យ១០៨ឆ្នាំ នៅតែមាំមួន ដោយសារប្រកាន់ខ្ជាប់នូវទស្សនវិជ្ជានៃជីវិត

បានផុស

១ year មុន

នៅ

ថ្ងៃសៅរ៍ ១៥ មីនា ២០២៥

ដោយ

ស្ត្រីវ័យ១០៨ឆ្នាំរូបនេះនៅតែមានសុខភាពល្អ ប្រុងប្រយ័ត្ន និងបម្រើអតិថិជនដែលមកកាត់សក់បានយ៉ាងល្អប្រសើរ។ គាត់តែងតែប្រកាន់ខ្ជាប់នូវទស្សនវិជ្ជានៃជីវិត ដោយមិនមានការអន់ចិត្ត គ្មានការច្រណែន មិនឈ្លោះប្រកែកជាមួយនរណានាំឲ្យជីវិតជួបទុក្ខសោកឡើយ។

លោកយាយ Shitsui Hakoishi កើតនៅថ្ងៃទី ១០ ខែវិច្ឆិកា ឆ្នាំ ១៩១៦ ក្នុងគ្រួសារកសិករនៅ Nakagawa ប្រទេសជប៉ុន។ កាលនៅក្មេង គាត់បានចាកចេញពីស្រុកកំណើតទៅទីក្រុងតូក្យូ ដើម្បីរៀនពាណិជ្ជកម្ម។ គាត់បានចាប់ផ្តើមធ្វើការជាជាងកាត់សក់នៅឆ្នាំ ១៩៣១។ នៅអាយុ ២០ឆ្នាំ គាត់បានទទួលវិញ្ញាបនបត្រកាត់សក់ ដែលជាចំណុចរបត់ដ៏សំខាន់មួយនៅក្នុងជីវិតរបស់គាត់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បន្ទាប់ពីរៀបការរួច គាត់និងប្តីបានបើកហាងមួយនៅទីក្រុងតូក្យូក្នុងឆ្នាំ ១៩៣៩។ ទោះជាយ៉ាងណាក៏ដោយ សង្គ្រាមលោកលើកទី២ បានយកអ្វីៗទាំងអស់ចេញពីគាត់។ ក្រោយមក ស្វាមីបានទទួលមរណភាព ហាងកាត់សក់ត្រូវបំផ្លាញដោយការវាយឆ្មក់តាមអាកាស។ នៅឆ្នាំ ១៩៥៣ គាត់បានត្រឡប់ទៅស្រុកកំណើតនៅ Nakagawa ដើម្បីចាប់ផ្តើមអាជីពឡើងវិញ និងបើកហាងកាត់សក់ផ្ទាល់ខ្លួនផងដែរ។

នៅឆ្នាំ ២០២០ គាត់មានកិត្តិយសដែលត្រូវបានជ្រើសរើសជាអ្នកកាន់ភ្លើងសម្រាប់កីឡាអូឡាំពិកទីក្រុងតូក្យូ។ ដើម្បីត្រៀមខ្លួនសម្រាប់ព្រឹត្តិការណ៍ដ៏សំខាន់នេះ គាត់បានហាត់ដើរជារៀងរាល់ថ្ងៃ។ គាត់កាន់ដំបងធ្ងន់ដូចពិលអូឡាំពិក ពេលដើរប្រហែល ១០០០ ជំហាន។ ទោះបីជាមានអាយុ ១០៨ ឆ្នាំក៏ដោយ លោក Hakoishi នៅតែបម្រើអតិថិជនរបស់គាត់ជាប្រចាំ។ គាត់បានចែករំលែកថា គាត់មិនមានគម្រោងចូលនិវត្តន៍ ហើយបន្តធ្វើការងារដែលគាត់ស្រឡាញ់អស់រយៈពេលជិតមួយសតវត្ស។

យ៉ាងណា កាលពីពេលថ្មីៗនេះ គាត់ត្រូវបានផ្តល់កិត្តិយសដោយអង្គការ Guinness World Records ថា ជាអ្នកកាត់សក់ស្ត្រីដែលមានវ័យចំណាស់ជាងគេបំផុតនៅលើពិភពលោកក្នុងវ័យ ១០៨ ឆ្នាំ។ នៅពេលសួរអំពីទស្សនវិជ្ជាដែលជួយឲ្យគាត់មានអាយុវែង និងយកឈ្នះលើគ្រប់បញ្ហាទាំងអស់ក្នុងជីវិត គាត់បានចែករំលែកថា សូមអរគុណចំពោះការថែរក្សារបបអាហារដែលមានសុខភាពល្អ ដោយរួមបញ្ចូលគ្នានូវលំហាត់សាមញ្ញៗដូចជាការដើរ និងស្មារតីសុទិដ្ឋិនិយម ដោយមិនមានការច្រណែន ឬស្អប់នរណាម្នាក់ឡើយ។

ជាចុងក្រោយលោកយាយបានមានប្រសាសន៍ថែមទៀតថា «គ្មានការអន់ចិត្ត គ្មានការស្អប់ គ្មានការប្រច័ណ្ឌ គ្មានការប្រកែក គឺជាទស្សនៈជីវិតដែលម្តាយរបស់ខ្ញុំបានបង្រៀនខ្ញុំតាំងពីតូច។ នេះជួយឲ្យខ្ញុំរក្សាស្មារតីវិជ្ជមាន និងសុទិដ្ឋិនិយមគ្រប់កាលៈទេសៈទាំងអស់»៕