KPT+

បែកគ្នាជិត៤ឆ្នាំ អតីតភរិយា Bill Gates ទើបទម្លាយមូលហេតុលែងលះប្ដីសេដ្ឋី

បានផុស

១ ថ្ងៃ មុន

នៅ

ថ្ងៃព្រហស្បតិ៍ ១៧ មេសា ២០២៥

ដោយ

លោកស្រី Melinda French Gates កាលពីពេលថ្មីៗនេះបានទម្លាយពីអារម្មណ៍ពិតថា គាត់បានសម្រេចចិត្តលែង លះអតីតស្វាមីដែលជាមហាសេដ្ឋីក្នុងវិស័យបច្ចេកវិទ្យា គឺលោក Bill Gates ដោយសារតែអាពាហ៍ពិពាហ៍មិនស្មោះត្រង់ ដែលធ្វើឲ្យអ្នកទាំងពីរមិនអាចបន្តចំណងស្នេហាក្នុងវ័យចំណាស់ តទៅមុខទៀតបាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងកម្មវិធីជជែក The Late Show របស់ទូរទស្សន៍អាមេរិក ជាមួយលោក Stephen Colbert ចាក់ផ្សាយកាលពីថ្ងៃទី១៤ខែមេសា បានទាក់ទាញការចាប់អារម្មណ៍យ៉ាងច្រើន នៅពេលដែលវត្តមានលោកស្រី Melinda អតីតភរិយារបស់មហាសេដ្ឋី Bill Gates ជាភ្ញៀវកិត្តិយសដ៏សំខាន់នោះ។ គាត់បានបង្ហាញខ្លួននៅក្នុងកម្មវិធីដើម្បីផ្សព្វផ្សាយសៀវភៅថ្មីក្រោមចំណងជើងថា «The Next Day» ដែលបានចេញផ្សាយនៅថ្ងៃទី១៥ខែមេសា។

ក្នុងកំឡុងពេលសន្ទនាគ្នានោះ ស្រ្តីវ័យ៦០ឆ្នាំរូបនេះបានចែករំលែកនូវអ្វីដែលគាត់បានរៀនអំពីអាពាហ៍ពិពាហ៍ បន្ទាប់ពីការលែងលះជិត៤ឆ្នាំពីចំណងអាពាហ៍ពិពាហ៍ជាមួយមហាសេដ្ឋី Bill Gates។

លោកស្រី បាននិយាយថា៖«ខ្ញុំបានរៀនថា ដើម្បីឲ្យមានទំនាក់ទំនងដ៏គួរឲ្យទុកចិត្ត ភាគីទាំងពីរត្រូវតែស្មោះត្រង់នឹងគ្នាទៅវិញទៅមក។ នោះជាអ្វីដែលខ្ញុំចង់បានក្នុងអាពាហ៍ពិពាហ៍។ ប្រសិនបើអ្នកមិនអាចធ្វើបានទេ អ្នកមិនមានភាពស្និទ្ធស្នាល និងទំនុកចិត្ត។ ដូច្នេះនៅទីបញ្ចប់ ខ្ញុំត្រូវតែចាកចេញ»។

ថ្វីដ្បិតតែលោកស្រីមិនបានបញ្ជាក់ពីមូលហេតុនៃការបាត់បង់ជំនឿលើអាពាហ៍ពិពាហ៍ក៏ដោយ ក៏អ្នកស្រី Melinda ធ្លាប់បានសារភាពថា មិត្តភាពរបស់អតីតស្វាមីជាមួយ Jeffrey Epstein (ជាជនល្មើសផ្លូវភេទដែលត្រូវបានកាត់ទោសខ្លួនឯងដោយារធ្វើអត្តឃាត ខណៈពេលដែលកំពុងរង់ចាំការកាត់ទោសពីបទជួញដូរផ្លូវភេទក្នុងឆ្នាំ២០១៩) គឺជាកត្តាជំរុញដ៏សំខាន់នៅពីក្រោយការបញ្ចប់នៃអាពាហ៍ពិពាហ៍ជិត៣០ឆ្នាំរបស់ពួកគេ បន្ទាប់ពីការរៀបការតាំងពីឆ្នាំ ១៩៩៤។

មិនតែប៉ុណ្ណោះអតីតភរិយាសេដ្ធីបច្ចេកវិទ្យាក៏និយាយអំពីបញ្ហាមួយទៀតថា ចំណងអាពាហ៍ពិពាហ៍របស់គាត់ជាមួយ Bill Gates បានជួបបញ្ហាធ្ងន់ធ្ងរក្នុងឆ្នាំ ២០១៩ នៅពេលដែលទំនាក់ទំនងគាត់ជាមួយ Jeffrey Epstein ត្រូវបានបង្ហាញជាសាធារណៈ។

ទោះជាយ៉ាងណាក៏ដោយ ការលែងលះគ្នាដំបូងគឺពិបាកព្រោះBill Gates ត្រូវបានគេស្គាល់ថាជាអ្នកចរចាដ៏តឹងតែងបំផុតមួយនៅក្នុងពិភពលោក។ ពួកគេបានបែកគ្នាមួយឆ្នាំ ហើយនៅខែឧសភា ឆ្នាំ ២០២១ អ្នកទាំងពីរបានបញ្ជាក់ពីការលែងលះរបស់ពួកគេ នៅក្នុងសេចក្តីថ្លែងការណ៍រួមមួយ។

យ៉ាងណាមិញ នៅក្នុងបទសម្ភាសន៍ជាមួយកាសែត Times of London កាលពីថ្ងៃទី ២៥ ខែមករា លោក Bill Gates បាននិយាយថា ជីវិតបច្ចុប្បន្នរបស់គាត់ធ្វើឲ្យគាត់សប្បាយចិត្តជាង ប៉ុន្តែអាពាហ៍ពិពាហ៍ដែលបែកបាក់គឺជាកំហុសដែលគាត់សោកស្តាយបំផុតក្នុងជីវិត៕