មជ្ឈមណ្ឌលបណ្តុះបណ្តាលខេត្តរតនគិរី ផ្តល់អាហាររូបករណ៍រៀនជំនាញបច្ចេកទេស ១២៤០ កន្លែង

មជ្ឈមណ្ឌលបណ្ដុះបណ្ដាលវិជ្ជាជីវៈខេត្តរតនគិរី ជាគ្រឹះស្ថានរដ្ឋដែលស្ថិតនៅក្រោមក្រសួងការងារ និងបណ្តុះបណ្តាលវិជ្ជាជីវៈ ប្រកាសផ្តល់អាហារូបករណ៍សិក្សាឥតបង់ថ្លៃដល់សិក្ខាកាម សិស្សានុសិស្ស និងយុវជនឱ្យចូលរៀនជំនាញបច្ចេកទេសចំនួន ១ ២៤០ កន្លែង សម្រាប់ឆ្នាំសិក្សា ២០២៥-២០២៦។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

វគ្គបណ្តុះបណ្តាលនេះមានចំនួន ១២ជំនាញ ក្នុងនោះរួមមាន ការងារកំបោរ(ជាងសំណង់)៤០នាក់ ដំឡើងបណ្តាញបំពង់ទឹក ៣០នាក់  ដំឡើងបណ្តាញអគ្គិសនីក្នុងអគារ ១២០នាក់, រចនាក្រាហ្វិកដោយកុំព្យូទ័រ ៦០នាក់, សេវាកម្មកុំព្យូទ័រ ៣០នាក់, ការដាំ ការថែទាំ និងប្រមូលផលដំណាំស្វាយចន្ទី ៣០០នាក់ , ការចិញ្ចឹម និងថែទាំត្រីប្រា ២៤០នាក់ ការថែទាំ និងជួសជុលទោចក្រយានយន្ត ៦០ នាក់ ការផលិតនំ ១២០នាក់ ធុរកិច្ចភេសជ្ជៈ ៦០នាក់, សេវាកម្មសំអាងកាយ ៩០នាក់ និងសេវាកម្មកាត់សក់បុរស ៩០នាក់។

លើសពីនេះ យុវជនយុវនារីដែលមកពីគ្រួសារក្រីក្រ និងងាយរងហានិភ័យមានឱកាសទទួលបានប្រាក់ឧបត្ថម្ភបន្ថែលក្នុងអំឡុងពេលសិក្សា  ២៨០ ០០០ រៀលក្នុងមួយខែ។ យុវជនជាស្រ្តី ជនពិការ ជនជាតិដើមភាគតិចត្រូវបានផ្តល់អាទិភាពក្នុងការចុះឈ្មោះចូលរៀន។ សម្រាប់សិក្ខាកាមទាំងអស់ដែលមានចំណាប់អារម្មណ៍ អាចទៅដាក់ពាក្យចូលរៀនតាមរយៈអាសយដ្ឋាន អាសយដ្ឋាន ភូមិទេសអន្លុង សង្កាត់បឹងកន្សែង ក្រុងបានលុង ខេត្តរតនគិរី ទូរសព្ទទំនាក់ទំនង ០៩៧ ៤៧០ ៦១៨៤/០១២ ៦១៤ ១៤៥។

លោកស្រី ភារ៉ា  ប្រធានរដ្ឋបាលមជ្ឈមណ្ឌលបណ្ដុះបណ្ដាលវិជ្ជាជីវៈខេត្តរតនគិរី បានឱ្យដឹងថាការចុះឈ្មោះចូលរៀនចាប់ពីដើមខែតុលាតទៅ ហើយចាប់ផ្តើមចូលរៀននៅថ្ងៃទី ០២ ខែមករា ឆ្នាំ ២០២៦ ដែលគិតមកដល់ពេលនេះ មានអ្នកចុះឈ្មោះចូលរៀន ២០០នាក់ហើយ។ លោកស្រីបន្តថា ចំពោះសិស្សដែលមិនមានបណ្ណសមធម៌ និងបណ្ណរង​មហានិភ័យ មជ្ឈមណ្ឌលក៏នឹងផ្តល់តែកន្លែងស្នាក់នៅដូចគ្នា ប៉ុន្តែសម្រាប់បាយទឹក ម្ហូបអាហារ ត្រូវផ្គត់ផ្គង់ខ្លួនឯង និងមិនទទួលបានថវិកាឧបត្ថម្ភជាប្រចាំខែដូចអ្នកមានបណ្ណក្រីក្រ និងបណ្ណរងហានិភ័យឡើយ។

គួរជម្រាបថា ក្រោយបញ្ចប់ការសិក្សាសិក្ខាកាមទាំងអស់នឹងទទួលបានសញ្ញាបត្របច្ចេកទេសជំនាញវិជ្ជាជីវៈ ១ (C1-1.5M)។ សញ្ញាបត្រដ៏មានតម្លៃនេះ បញ្ជាក់ពីការសិក្សាជំនាញបច្ចេកទេសដែលបានទៅអនុវត្តដោយផ្ទាល់ជាមួយក្រុមហ៊ុន និងសហគ្រាសនៅក្នុងខេត្តរតនគិរី។ លើសនេះ បេក្ខជនអាចដាក់ពាក្យបម្រើកាងារនៅទីនោះបាន បើសិនជាពួកគេចាប់អារម្មណ៍ ពីព្រោះថាក្រុមហ៊ុននិងសហគ្រាសមួយចំនួនកំពុងត្រូវការកម្លាំងពលកម្ម ដែលជាឱកាសសម្រាប់យុវជន យុវនារី ដែលមានជំនាញស្រាប់៕

អត្ថបទ៖ ខៀវ ចាប