ព័ត៌មានជាតិ

ឧប. ទៀ សីហា៖ សូមជនរួមជាតិកម្ពុជាទាំងអស់ កុំមានការរើសអើង ពូជសាសន៍ ដូចពូជសាសន៍មួយចំនួន

បានផុស

៧ ខែ មុន

នៅ

ថ្ងៃសៅរ៍ ១៨ តុលា ២០២៥

ដោយ

ឧបនាយករដ្ឋមន្ត្រីការពារជាតិ ទៀ សីហា អំពាវនាវដល់ប្រជាពលរដ្ឋរក្សានូវសេចក្ដីថ្លៃថ្នូរ កុំមានការរើសអើងជាតិសាសន៍ដូចប្រទេសមួយចំនួន ត្រូវខិតខំសិក្សា បង្កើនចំណេះដឹង ចូលរួមជួយដល់ប្រទេសជាតិឱ្យបានខ្លាំងក្លា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងពិធីសំណេះសំណាលជាមួយមាតាបិតា អាណាព្យាបាល សិស្សប្រឡងជាប់និទ្ទេសA និងB នៅខេត្តសៀមរាបថ្ងៃទី១៨ ខែតុលា ឆ្នាំ២០២៥នេះ លោកឧបនាយករដ្ឋមន្ត្រី ទៀ សីហា បានលើកឡើងថាកម្ពុជាពិតជាត្រូវការធនធានមនុស្សដែលមានទាំងចំណេះដឹង សីលធម៌ ឆ្លើយតបទៅនឹងការរីកចម្រើនដែលកម្ពុជាត្រូវឈរលើសក្តានុពលដែលខ្លួនមាន និងប្រឹងរស់ងើបឈរឡើង ដើម្បីការពារឯករាជ្យ អធិបតេយ្យ និងសន្តិភាពរបស់ប្រទេសដោយខ្លួនឯង។

លោកបានលើកឡើងថា ក្នុងស្ថានភាពជម្លោះព្រំដែនកម្ពុជានិងថៃ ពលរដ្ឋកម្ពុជាបានឃើញពីអត្ថចរិតនៃការរើសអើងពូជសាសន៍របស់ជនជាតិថៃរួចហើយ ដូច្នេះសូមពលរដ្ឋខ្មែរកុំបង្ហាញអត្ថចរិតដូចគ្នានេះ។

លោកថា៖ «សូមជនរួមជាតិកម្ពុជាទាំងអស់កុំមានការរើសអើងពូជសាសន៍ ដូចពូជសាសន៍មួយចំនួន»។

លោកឧបនាយករដ្ឋមន្ត្រីបានផ្ដាំផ្ញើដល់សិស្សានុសិស្សទាំងអស់ខិតខំរៀនសូត្របន្តដើម្បីឲ្យមានសមត្ថភាពពិតប្រាកដ ត្រូវប្រកាន់យកចំណុចវិជ្ជមាននោះ នឹងខិតខំសម្រេចឲ្យបានលទ្ធផលល្អនាពេលអនាគត ព្រមទាំង ធ្វើការចែករំលែកនូវបទពិសោធន៍ ក្នុងការសិក្សាដល់សិស្សប្អូនជំនាន់ក្រោយ ក្នុងការចូលរួមបណ្តុះបណ្តាលធនធានមនុស្ស និង ត្រូវគោរពវិន័យសាលា និង ជៀសឲ្យឆ្ងាយពីគ្រឿងញៀន និង គោរពច្បាប់ចរាចរណ៍ នៅពេលបើកបរត្រូវពាក់មួកសុវត្ថិភាព និង ដាក់ខ្សែក្រវ៉ាត់សុវត្ថិភាព ។

គួរឱ្យដឹងផងដែរថាលទ្ធផលប្រឡងសញ្ញបត្រមធ្យមសិក្សាទុតិយភូមិនៅឆ្នាំ២០២៥នេះ នៅខេត្តសៀមរាបមានសិស្សប្រឡងជាប់ជាង៩ពាននាក់ ក្នុងនោះសិស្សនិទ្ទេស A មានចំនួន ២៤៧នាក់។

ដោយ៖ គឿនវេត