ព័ត៌មានជាតិ

នេះជាសហគ្រាសខ្មែរជំនាញផលិតសាប៊ូកក់សក់ សាប៊ូបោកគក់ សាប៊ូលាងចាន គុណភាពខ្ពស់ជំនួសផលិតផលនាំចូល

បានផុស

៨ ខែ មុន

នៅ

ថ្ងៃអង្គារ ២១ តុលា ២០២៥

ដោយ

ផលិតផលខ្មែរកាន់តែសំបូរបែប ស្របការគាំទ្រពីពលរដ្ឋមានកំណើនពីមួយថ្ងៃទៅមួយថ្ងៃ ខណៈដែលផលិតផលខ្លះជាទំនិញយុទ្ធសាស្រ្តមានតម្រូវការចាំបាច់ សម្រាប់បម្រើជីវភាពរស់នៅប្រចាំថ្ងៃរបស់ពលរដ្ឋ។

ពាក់ព័ន្ធផលិតផលប្រើប្រាស់ក្នុងផ្ទះ ឃើញថាមានផលិតផលជាច្រើនត្រូវបានសហគ្រាសខ្មែរខិតខំកែច្នៃផលិតហើយដែលមានគុណភាពខ្ពស់អាចប្រជែងផលិតផលនាំចូលបាន។

កម្ពុជាថ្មីណែនាំសហគ្រាសខ្មែរដែលមានផលិតសាប៊ូសម្អាតផ្សេងៗមានដូចជា សាប៊ូបោកគក់សំលៀកបំពាក់ សាប៊ូលាងចាន សាប៊ូកក់សក់ និងផលិតផលសម្អាតផ្សេងៗទៀត ដែលមានគុណភាពអាចជំនួសផលិតផលនាំចូលពីប្រទេសជិតខាង។

សហគ្រាស LSV

សហគ្រាស LSV ដែលពលរដ្ឋស្គាល់ជាទូទៅតាមរយៈការផលិតសាប៊ូទឹកបោកសំលៀកបំពាក់ (អូកា)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សហគ្រាសបង្កើតឡើងនៅឆ្នាំ ២០១៣ មានចេញលក់ផលិតផលសម្អាត និងផលិតផលគ្រឿងសំអាងផ្សេងៗជាច្រើនប្រភេទ។ សហគ្រាសមានចេញម៉ាកផលិតផលផ្ទាល់ខ្លួនចំនួន ៤ ម៉ាក មាន អូកា (Oka) អ៊ិមប្រេស (Empress) ណេតឆ័រផ្លាស់ (Nature PLus) និងរីន (Rins)។

សហគ្រាសបានអនុវត្តបច្ចេកវិទ្យាផលិតតាមស្តង់ដាជប៉ុន ដែលជួយឲ្យផលិតផលមានគុណភាព មិនចាញ់ផលិតផលនាំចូល។ ផលិតផលសហគ្រាសមានដូចជា សាប៊ូបោកសំលៀកំពាក់ ទឹកក្រអូបបន្ទន់សំលៀកបំពាក់ សាប៊ូលាងចាន ខណៈផ្នែកថែរក្សារាងកាយមានដូចជាសាប៊ូកក់សក់ សាប៊ូដុសខ្លួន និងសាប៊ូដុសមុខជាដើម។ ថ្មីៗនេះសហគ្រាសក៏បានកែច្នៃបន្លែស្ពៃដាំដុះដោយកសិករក្នុងស្រុក ផលិតធ្វើជាសាប៊ូកក់សក់ផងដែរ។

សហគ្រាសខ្មែរហៅហូល និងហ៊ែលឃែរ (KHH)

សហគ្រាស ខ្មែរហៅហូល និងហ៊ែលឃែរ ហៅកាត់ (KHH) ជាក្រុមហ៊ុនក្នុងស្រុកមួយទៀត ដែលកំពុងទទួលបានការគាំទ្រច្រើនតាមរយៈការចេញលក់សាប៊ូកក់សក់ម៉ាក (KLEN) ដែលកំពុងទទួលប្រជាប្រិយភាពលើទីផ្សារ។ បន្ថែមនេះសហគ្រាសមានចេញផលិតផ្សេងទៀតមានសាប៊ូបោកគក់ម៉ាក (LoR) សាប៊ូលាងសម្អាតម៉ាក (SAART) សរុបមានច្រើនជាង ៣០ មុខមិនថាប្រភេទ សាប៊ូបោកគក់ សាប៊ូលាងខ្លួន សាប៊ូលាងដៃ សាប៊ូលាងចាន ទឹកក្រអូប ព្រមទាំងផលិតផលលាងសម្អាតទូទៅផ្សេងទៀត។

សហគ្រាសដែលចាប់ផ្តើមដំណើរការក្នុងអំឡុងឆ្នាំ២០១៦ បានយករូបមន្តផលិតពីប្រទេសកូរ៉េខាងត្បូងលើផលិតផលរបស់ខ្លួន ដោយទទួលបានវិញ្ញាបនបត្របញ្ជាក់ពីប្រព័ន្ធគ្រប់គ្រងគុណភាពស្ដង់ដាអន្តរជាតិ ISO 9001:2015 (UKAS)។

សហគ្រាស Cambolap

Cambolap ជាសហគ្រាសផ្គត់ផ្គង់ផលិតផលសម្អាត ដែលមានប្រភពមកពីខេត្តសៀមរាប។ សហគ្រាសមានផ្គត់ផ្គង់ផលិតផលសម្អាតជាច្រើនសុទ្ធតែមានគុណភាពខ្ពស់មានដូចជា សាប៊ូទឹកបោកគក់ CL580 សាប៊ូទឹកបោកគក់ម៉ាស៊ីន CL590 សាប៊ូលាងចាន Extra Clean ទឹកក្រអូបបន្ទន់សាច់ក្រណាត់ EcoSoft ទឹកក្រអូបបន្ទន់ក្រណាត់ CL591 ទឹកជូតការ៉ូ Floor Cleaner និងទឹកជូតកញ្ចក់ Windows cleaner។

សហគ្រាសផលិតសាប៊ូសំណាងល្អ (SNL)

ជាសហគ្រាសនៅក្នុងស្រុក ដែលបានចុះបញ្ជីទទួលស្គាល់ដោយក្រសួងឧស្សាហកម្ម បច្ចេកវិទ្យានិងនវានុវត្ត។ ផលិតផលរបស់សហគ្រាស សុទ្ធតែបានឆ្លងកាត់ការតេស្តគុណភាពពីវិទ្យាស្ថានស្ដង់ដារកម្ពុជា។

សហគ្រាសមានផលិតសាប៊ូប្រើប្រាស់ជាច្រើនដូចជា សាប៊ូបោកគក់ សាប៊ូលាងចាន សាប៊ូលាងការ៉ូ សាប៊ូលាងបន្ទប់ទឹក សាប៊ូលាងដៃ សាប៊ូលាងកញ្ចក់ សាប៊ូលាងឡាន-ម៉ូតូ សាប៊ូដុះខ្លួន និងកក់សក់ ទឹកអូសាវែល ទឹកក្រអូប ទឹកអប់បាញ់បន្ទប់ ហ្វូមលាងឡាន សារាកង់ឡាន សារាតាប់ឡូឡាន។

សហគ្រាសផលិតសាប៊ូ សៀវ លី

សហគ្រាសខ្មែរនេះក៏មានផលិតសាប៊ូសម្រាប់បម្រើការប្រើប្រាស់ក្នុងគេហដ្ឋានមានដូចជា សាប៊ូបោកសំលៀកបំពាក់ សាប៊ូលាងចាន ទឹកជូតការ៉ូ និងបន្ទប់ជាដើម។

សិប្បកម្មផលិតសាប៊ូ អាឡាដាំង

សិប្បកម្មផលិតសាប៊ូ អាឡាដាំង ខេមបូឌា ចាប់ផ្តើមដំណើរការនៅអំឡុងឆ្នាំ ២០២០ ផ្តើមដោយស្រ្តីខ្មែរអ្នកស្រី គ្រួច ចន្នី។ បច្ចុប្បន្នសហគ្រាសមានផលិតសាប៊ូទឹកបោកសម្លៀកបំពាក់ និងសាប៊ូលាងចាន ដែលមួយថ្ងៃអាចផលិតបានបរិមាណ ១ ពាន់លីត្រ។

អ្នកស្រី គ្រួច ចន្នី ម្ចាស់សិប្បកម្មផលិតសាប៊ូ អាឡាដាំង បានប្រាប់កម្ពុជាថ្មីថា នៅថ្ងៃខាងមុខសហគ្រាសរបស់អ្នកស្រីក៏គ្រោងផលិតសាប៊ូប្រភេទផ្សេងទៀតដើម្បីបំពេញតម្រូវការប្រើប្រាស់ ស្របកំណើនការគាំទ្រពីពលរដ្ឋខ្មែរមានស្ទុះកើនឡើងខ្លាំង៕

ព័ត៌មានអន្ដរជាតិ១ ថ្ងៃ ago

អស់សង្ឃឹមហើយ ក្នុងការសង្គ្រោះជីវិត បុរស ២នាក់ទៀត ដែលជាប់ក្នុងរូងភ្នំ នៅឡាវ

សេចក្ដីជូនដំណឹង៣ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា