ព័ត៌មានជាតិ

សម្តេចតេជោ ហ៊ុន សែន កោតសរសើរចំពោះតួនាទីឈានមុខរបស់អង្គការសុខភាពពិភពលោក ក្នុងការប្រយុទ្ធប្រឆាំងជំងឺកូវីដ-១៩

បានផុស

៤ years មុន

នៅ

ថ្ងៃអង្គារ ១៣ មេសា ២០២១

ដោយ

ការលើកឡើងរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា នៅក្នុងលិខិតផ្ញើជូនលោកវេជ្ជបណ្ឌិត តាខេហ្សី កាសៃ (Takeshi Kasai) នាយកប្រចាំតំបន់នៃអង្គការសុខភាពពិភពលោក (WHO) កាលពីម្សិលមិញ (ថ្ងៃទី១២ ខែមេសា ឆ្នាំ២០២១)។

សម្តេចតេជោ ហ៊ុន សែន បានលើកឡើងយ៉ាងនេះថា “ខ្ញុំមានសេចក្តីរីរាយ និងត្រូវបានលើកទឹកចិត្ត ដោយបានទទួលសារលិខិតរបស់លោកវេជ្ជបណ្ឌិត ចុះថ្ងៃទី០៩ ខែមេសា ឆ្នាំ២០២១ ដែលបានលើកឡើងពីការប្តេជ្ញាចិត្តជាថ្មីរបស់អង្គការសុខភាពពិភពលោក គាំទ្រដល់កិច្ចខិតខំប្រឹងប្រែងប្រកបដោយចីរភាពរបស់កម្ពុជាក្នុងការទប់ស្កាត់ការរីក រាលដាលជំងឺកូវីដ-១៩។ ខណៈពេល ដែលប្រទេសកម្ពុជាបានរួចផុតពីការរីករាលដាលនៃជំងឺកូវីដ-១៩ កាលពីឆ្នាំមុន នៅក្នុងឆ្នាំនេះ យើងខ្ញុំមិនមានភ័ព្វសំណាងណាស់នោះទេ ដោយបច្ចុប្បន្ននេះ យើងខ្ញុំកំពុងប្រឈម នឹងការឆ្លងរីករាលដាល នៃវីរុសកូរ៉ូណានាំចូលប្រភេទថ្មី ក្នុងសហគមន៍ ដែលជាអកុសលបានធ្វើឱ្យចំនួន នៃការបាត់បង់អាយុជីវិតមនុស្សមានការកើនឡើង”។

បើតាមសម្តេចតេជោ ហ៊ុន សែន នៅចំពោះមុខ អាសន្នដ៏ធ្ងន់ធ្ងរ នៃសុខភាពសាធារណៈនាពេលបច្ចុប្បន្ននេះ រាជរដ្ឋាភិបាលកម្ពុជា ត្រូវបង្ខំចិត្តជ្រើសយកការសម្រេចចិត្តដ៏លំបាកក្នុងការបិទតំបន់ ដែលទទួលរងផលប៉ះពាល់ និងដាក់វិធានការរឹតត្បិតការធ្វើដំណើរដ៏តឹងរ៉ឹង រួមជាមួយនឹងវិធានការផ្សេងៗទៀត ដើម្បីទប់ស្កាត់ការ រីករាលដាលនៃការផ្ទុះជំងឺនេះ។ វិធានការណ៍អស់ទាំងនេះ មានភាពចាំបាច់ ក្នុងការធានាសង្គ្រោះជីវិត សុវត្ថិភាពសុខភាពសាធារណៈ សុខុមាលភាពរបស់ប្រជាជន និងការវិលត្រឡប់ទៅរកភាពធម្មតាវិញ នៃជីវិតរស់នៅ ឲ្យបានឆាប់។ សម្តេចបន្តថា កម្ពុជាគឺជាប្រទេសដែលគាំទ្រយ៉ាងខ្លាំងក្លាចំពោះពហុភាគីនិយម ហើយសម្តេចបានកោតសរសើរចំពោះតួនាទីឈានមុខរបស់អង្គការសុខភាពពិភពលោក ក្នុងការប្រយុទ្ធប្រឆាំង និងជំងឺរាតត្បាត ជាសកលនាពេលបច្ចុប្បន្ននេះ។

សូមបញ្ជាក់ថា លោក Takeshi Kasai នាយកអង្គការសុខភាពពិភពលោក ប្រចាំតំបន់អាស៊ីប៉ាស៊ីហ្វិក កាលពីថ្មីៗនេះ ផ្ញើលិខិតជូនសម្តេចតេជោ ហ៊ុន សែន ដោយសម្តែងនូវការសោកស្តាយ និងរំលែកការលំបាកជាមួយកម្ពុជា ដែលកំពុងរាតត្បាតដោយជំងឺកូវីដ១៩ និងបានប្រកាសពីការប្តេជ្ញាចិត្តរបស់លោកក្នុងការឈរជាមួយកម្ពុជា ដើម្បីប្រយុទ្ធនឹងជំងឺកូវីដ-១៩៕

ដោយ ៖ កោះកែវ

Related Topics: