ព័ត៌មានអន្ដរជាតិ

កាដូកាំភ្លើងខ្លីរបស់ប្រធានាធិបតីតួកគី ជូនមេដឹកនាំណាតូ គឺចង់បង្ហាញពីឥទ្ធិពលនៃវិស័យការពារជាតិតួកគី

បានផុស

៤៣ វិនាទី មុន

នៅ

ថ្ងៃសុក្រ ១០ កក្កដា ២០២៦

ដោយ

នាយករដ្ឋមន្ត្រីបែលហ្ស៊ិកមានការភ្ញាក់ផ្អើល ក្រោយត្រឡប់មកពីកិច្ចប្រជុំកំពូលណាតូកាលពីថ្ងៃពុធនៅប្រទេសតួកគី ពេលលោកឃើញ មានកាំភ្លើងខ្លី និងគ្រាប់រំសេវក្នុងវ៉ាលី។

ទីភ្នាក់ងារសារព័ត៌មានរ៉យទ័រ ផ្សាយនៅថ្ងៃទី៩ ខែកក្កដា ឆ្នាំ២០២៦ ថា បន្ទាប់ពីមេដឹកនាំណាតូបានជួបជុំគ្នាសម្រាប់កិច្ចប្រជុំកំពូលដ៏ចម្រូងចម្រាសកាលពីថ្ងៃពុធនៅទីក្រុងអង់ការ៉ា ប្រធានាធិបតីតួកគី លោក Recep Tayyip Erdogan បានប្រគល់អំណោយមិនធម្មតាមួយដល់មេដឹកនាំម្នាក់ៗ នោះគឺ កាំភ្លើងខ្លីបុរាណមួយដើម រួមជាមួយនឹងគ្រាប់រំសេវពិត ដែលបង្ហាញថាកាំភ្លើងនេះមិនគ្រាន់តែសម្រាប់តែបង្ហាញនោះទេ។

ប្រធានាធិបតីតួកគី លោក Recep Tayyip Erdogan ។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Erdogan ចង់បង្ហាញឧស្សាហកម្មការពារជាតិរបស់ប្រទេសតួកគី ថាបានក្លាយជាឧបករណ៍នាំចេញ និងគោលនយោបាយការបរទេសដ៏សំខាន់មួយ។

រូបភាពដែលបានចែករំលែកពីការិយាល័យរបស់ប្រធានាធិបតីលីទុយអានី លោក Gitanas Nauseda បង្ហាញពីកាំភ្លើងខ្លី Gumusay .357 Magnum ជាកាំភ្លើងខ្លី ៦ដើមដ៏កម្រ ផលិតដោយក្រុមហ៊ុនផលិតអាវុធតួកគី MKE ក្នុងទសវត្សរ៍ឆ្នាំ១៩៩០ ។

កាំភ្លើងនោះត្រូវបានដាក់ក្នុងប្រអប់តាំងបង្ហាញឈើមួយ មានទង់ជាតិតួកគី និងឡូហ្គោណាតូ ក៏ដូចជាមានចារឹកអក្សរថា « Gumusay» ជាប្រភេទកាំភ្លើងខ្លីដំបូងគេ ផលិតក្នុងប្រទេសតួកគី»។

កាំភ្លើងខ្លីដែលមេដឹកនាំតួកគីជូនជាកាដូសម្រាប់សមាជិកណាតូ។ រូបភាព៖ Reuters

ការជូនជាកាដូនេះ ក្នុងគោលបំណងបង្ហាញពីតួនាទីរបស់ប្រទេសតួកគីក្នុងនាមជាប្រទេសនាំចេញអាវុធធុនតូចដ៏សំខាន់មួយ និងដើម្បីបញ្ជាក់ពីមោទនភាពជាតិក្នុងការអាចផលិតអាវុធបែបនេះក្នុងស្រុក។ គួរបញ្ជាក់ថា ប្រទេសតួកគីគឺជាប្រទេសនាំចេញអាវុធធុនតូចធំជាងគេទីបីរបស់ពិភពលោករវាងឆ្នាំ ២០១៩ និង ២០២៤ ដោយនៅពីក្រោយសហរដ្ឋអាមេរិក និងអ៊ីតាលី៕

សម្រួល៖ ណឺ មិនា