សម្តេចតេជោ ហ៊ុន សែន ថា កម្ពុជាសុំតែសុខ និងមិនត្រូវការឈ្លានពានប្រទេសណានោះទេ

សម្តេចតេជោ ហ៊ុន សែន ប្រធានព្រឹទ្ធសភា បានថ្លែងថា កម្ពុជាសុំតែសេចក្តីសុខ និងមិនត្រូវការឈ្លានពានប្រទេសណានោះទេ តែបែរជាថៃចោទប្រកាន់មកលើកម្ពុជាថា យកដីគេ។ ការចោទប្រកាន់មួយនេះ សម្ដេចតេជោ ថា មិនមែនជាការពិត ព្រោះអតីតកាល គឺកម្ពុជាបានបាត់បង់អស់ច្រើនទៅហើយ ទើបចង់ការពារអ្វីដែលមានស្រាប់តែប៉ុណ្ណោះ។

សម្ដេចតេជោ បានបន្ថែមថា អ្វីដែលអតីតកាលបានបន្សល់ទុកដោយមានក្បួនខ្នាតត្រឹមត្រូវអំពីអធិបតេយ្យទឹកដីកម្ពុជា គឺកម្ពុជារក្សាតែប៉ុណ្ណឹង មិនត្រូវការពង្រីកទឹកដីបន្ថែមនោះទេ។ សម្ដេចតេជោ បានថ្លែងយ៉ាងដូច្នេះនាព្រឹកថ្ងៃទី១៧ ខែវិច្ឆិកា ឆ្នាំ២០២៥ ក្នុងឱកាសអញ្ជើញជាព្រះរាជតំណាងព្រះមហាក្សត្រ បើកអនុសំវច្ចរមហាសន្និបាតមន្ដ្រីសង្ឃទូទាំងប្រទេសលើកទី៣៣។

ពាក់ព័ន្ធនឹងទឹកដីនេះ សម្តេចតេជោ ហ៊ុន សែន លើកឡើងថា គឺមានក្រុមជ្រុលនិយមមួយចំនួនបានស្រែកពីក្រៅប្រទេស ថា ឱ្យរាជរដ្ឋាភិបាលទៅវាយដណ្តើមយកកោះត្រល់ ទៅវាយយកកម្ពុជាក្រោម និងអ្នកខ្លះ គឺចង់ឱ្យទៅវាយដណ្តើមយកតាមបណ្តាខេត្តនៅឯប្រទេសថៃ និងចង់ឱ្យទៅវាយយកទឹកដីពីប្រទេសឡាវមកវិញទៀត។

សម្តេចតេជោ ហ៊ុន សែន បានបញ្ជាក់ថា អ្វីដែលជាសេចក្តីត្រូវការរបស់រាជរដ្ឋាភិបាលកម្ពុជា គឺកិច្ចការពារជាតិឱ្យខានតែបាន និងមិនធ្វើការដោះដូរទឹកដីជាមួយសន្តិភាពជាដាច់ខាត៕