សពវីរកងទ័ព ប៊ុង តុងធៀន ដែលបានពលីក្នុងសមរភូមិ បានបញ្ជូនមកដល់ផ្ទះហើយ

សពវីរកងទ័ពវ័យក្មេង ប៊ុង តុងធៀន ដែលបានប្រយុទ្ធតតាំងជាមួយយោធាថៃឈ្លានពានលើទឹកដីកម្ពុជា ហើយត្រូវបានពលីជីវិតនៅក្នុងសមរភូមិអូរស្មាច់ ត្រូវបានដឹកយកមកប្រគល់ឱ្យគ្រួសារនៃសពហើយ ដើម្បីរៀបចំធ្វើបុណ្យតាមប្រពៃណីនៅគេហដ្ឋាន ក្នុងក្រុងបាត់ដំបង។

គួរឱ្យដឹងថា វីរកងទ័ព ប៊ុន តុងធៀន បានពលីជីវិតនៅក្នុងសមរភូមិដោយសារផ្សែងពុល គឺនៅចំណុចភ្នំប៉ោយ ស្ថិតក្នុងភូមិសាស្រ្តសង្កាត់អូរស្មាច់ ក្រុងសំរោង ខេត្តឧត្តរមានជ័យ។ សពត្រូវបានដឹកមកដល់គេហដ្ឋាននៅយប់ថ្ងៃទី១៩ ខែមករា ឆ្នាំ២០២៦។

បើតាមការបញ្ជាក់ពីលោក តុង ឃីម ដែលជាឪពុករបស់សព បានបញ្ជាក់ថា កាលពីយប់ម្សិលមិញនេះ សពបានបញ្ជូនមកដល់លំនៅដ្ឋានហើយ ដើម្បីរៀបចំធ្វើបុណ្យ ហើយរាងកាយសពមិនប្រក្រតីនោះទេ ដោយសារស្លាប់យូរថ្ងៃមកហើយទម្រាំត្រូវបានកងទ័ពជួរមុខចូលទៅយកបាន។

ប្រជាពលរដ្ឋជាច្រើនបានឱនគោរពដឹងគុណវីរកងទ័ព ប៊ុន តុងធៀន ដែលបានលះបង់ជីវិតដោយភាពអង់អាចក្លាហាន ដើម្បីការពារទឹកដីខ្មែរ ដែលការស្លាប់នេះគឺទទួលរងអំពីផ្សែងពុលដែលភាគីថៃបានបាញ់មកលើតំបន់កងទ័ពជួរមុខរបស់កម្ពុជា។ ពេលនេះសពកំពុងរៀបចំធ្វើបុណ្យនៅក្នុងគេហដ្ឋាន៕ អត្ថបទ៖ សោ និយមរ័ត្ន