ស.ស.យ.ក. រៀបចំយុទ្ធនាការដ៏មានន័យមួយ រយៈពេល ២០ថ្ងៃ ដើម្បីរំលឹកដឹងគុណវីរកងកម្លាំងជួរមុខ

សហភាពសហព័ន្ធយុវជនកម្ពុជា (ស.ស.យ.ក.) បានរៀបចំយុទ្ធនាការសង្គមដ៏មានន័យមួយ ក្រោមប្រធានបទ «១ម៉ឺនក្រមា និងបណ្ណជូនពរ ដើម្បីវីរកងកម្លាំងជួរមុខ» រយៈពេល ២០ថ្ងៃ ដោយចាប់ធ្វើពីរសៀលថ្ងៃទី១៩ មីនានេះ រហូតដល់ថ្ងៃទី០៧ មេសា ដើម្បីរំលឹក និងគោរពដឹងគុណចំពោះវីរកងកម្លាំងជួរមុខ ដែលបានលះបង់ជីវិតក្នុងការពារជាតិ។

បើតាមការបញ្ជាក់ យុទ្ធនាការនេះ ធ្វើឡើងក្នុងគោលបំណងដើម្បីបង្កើតជាវេទិកាជូនសាធារណជន ក្នុងការបង្ហាញនូវក្ដីនឹករលឹក និងការចងចាំជានិច្ចនូវគុណបំណាច់ដ៏ធំធេងរបស់វីរកងកម្លាំងទាំងអស់ ដែលបាននិងហ៊ានលះបង់ជីវិត សាច់ស្រស់ឈាមស្រស់ និងបន្តឈរជើងយ៉ាងរឹងមាំ ក្នុងបុព្វហេតុការពារជាតិមាតុភូមិដោយអង់អាចក្លាហានបំផុត។

នេះចាត់ទុកជាការផ្តល់ឱកាសមួយដល់សាធារណជន ក្នុងការបង្ហាញ ក្ដីនឹករលឹក, ក្តីស្រលាញ់ និងការដឹងគុណ ចំពោះវីរកងកម្លាំងជួរមុខ។ អាស្រ័យហេតុនេះ ស.ស.យ.ក. អំពាវនាវឱ្យសាធារណជន និងយុវជន ចូលរួមយ៉ាងសកម្ម ដើម្បីបញ្ចេញក្ដីគោរព និងចងចាំវីរភាពរបស់កងកម្លាំងជួរមុខ។

សម្រាប់ដំណើរការនៃការរៀបចំវិញ គឺនឹងប្រព្រឹត្តធ្វើនៅទីតាំង “សិល្បៈដើម្បីសន្តិភាព” បរិវេណសួនវត្តបទុមវត្តី វេលាម៉ោង ៤:០០ល្ងាច ដល់ ៨:៣០យប់ ចាប់ពីរសៀលថ្ងៃនេះទៅ៕