បច្ចុប្បន្នមានរថយន្ដក្រុងសាធារណៈជាង​២៥០​គ្រឿងរត់លើផ្លូវ១៤ខ្សែក្នុងរាជធានីភ្នំពេញ ខណៈមនុស្សមួយចំនួនមិនតម្រូវឲ្យបង់ប្រាក់នោះទេ

ចាប់តាំងពីឆ្នាំ២០១៤ រហូតមកដល់បច្ចុប្បន្ន រដ្ឋាករស្វយ័តដឹកជញ្ជូនសាធារណៈរថយន្តក្រុង (City Bus) រដ្ឋបាលរាជធានីភ្នំពេញ បាននិងកំពុងបម្រើសេវាដឹកជញ្ជូនសាធារណៈជូនប្រជាពលរដ្ឋក្នុងរាជធានីភ្នំពេញចំនួន១៤ខ្សែរត់ ដោយប្រើប្រាស់រថយន្តក្រុងសរុបចំនួន ២៥៧គ្រឿង ជាមួយនឹងតម្លៃសំបុត្រត្រឹមតែ ១.៥០០រៀល ខណៈព្រះសង្ឃ មនុស្សចាស់ (អាយុចាប់ពី៧០ឆ្នាំឡើង) ជនពិការ សិស្ស-និស្សិត គ្រូបង្រៀន កម្មករ-កម្មការី កុមារ(កម្ពស់ក្រោម១ម៉ែត្រ) និងកីឡាករ-កីឡាការីនីអាជីព គឺមិនតម្រូវឱ្យបង់ថ្លៃឡើយ។

តាមសេចក្តីជូនដំណឹងស្តីពីការបម្រើសេវាដឹកជញ្ជូនសាធារណៈរថយន្តក្រុង (City Bus) រដ្ឋបាលរាជធានីភ្នំពេញបានឲ្យដឹងថា ចាប់តាំងពីឆ្នាំ២០១៤ រហូតមកដល់បច្ចុប្បន្ន រដ្ឋាករស្វយ័តដឹកជញ្ជូនសាធារណៈរថយន្តក្រុង (City Bus) រាជធានីភ្នំពេញ ហៅកាត់ថា (រ.ដ.ស) បាននិងកំពុងបម្រើសេវាដឹកជញ្ជូនសាធារណៈជូនប្រជាពលរដ្ឋក្នុងរាជធានីភ្នំពេញចំនួន១៤ខ្សែរត់ ដោយប្រើប្រាស់រថយន្តក្រុងសរុបចំនួន ២៥៧គ្រឿង និងធ្វើប្រតិបត្តិការចាប់ពីម៉ោង ០៥:៣០នាទី ដល់ម៉ោង ២០:៣០នាទី។ ដោយឡែក សម្រាប់ខ្សែរត់ទៅអាកាសយានដ្ឋានអន្តរជាតិតេជោ (Airport Express Bus) គឺចាប់ពីម៉ោង ០៥:៣០នាទី ដល់ម៉ោង ២៣:៣០នាទី។

ការគាំទ្ររបស់ប្រជាពលរដ្ឋចំពោះសេវាដឹកជញ្ជូនសាធារណៈរថយន្តក្រុង មានការកើនឡើងជាបន្តបន្ទាប់ និងបានជួយកាត់បន្ថយការកកស្ទះចរាចរណ៍ គ្រោះថ្នាក់ចរាចរណ៍ ការបំពុលបរិស្ថាន ជាពិសេសគឺបានជួយសន្សំសំចៃការចំណាយប្រចាំថ្ងៃផងដែរ។ ជាក់ស្តែងតម្លៃសំបុត្ររថយន្តក្រុងសាធារណៈគឺត្រឹម ១.៥០០រៀល ក្នុងការធ្វើដំណើរមួយជើង ក្នុងម្នាក់។ ជាមួយគ្នានេះ ព្រះសង្ឃ មនុស្សចាស់ (អាយុចាប់ពី៧០ឆ្នាំឡើង) ជនពិការ សិស្ស-និស្សិត គ្រូបង្រៀន កម្មករ- កម្មការី កុមារ(កម្ពស់ក្រោម១ម៉ែត្រ) និងកីឡាករ-កីឡាការីនីអាជីព គឺមិនតម្រូវឱ្យបង់ថ្លៃឡើយ៕

អត្ថបទ៖ ស្រីរ័ត្ន