រដូវប្រមូលផល សណ្ដែកកួរបានតម្លៃខ្ពស់គ្រាន់បើនៅលើទីផ្សារ

នៅរដូវប្រាំងនេះ ដំណាំសណ្ដែកកួរត្រូវបានប្រជាពលរដ្ឋដាំស្ទើរគ្រប់ទីកន្លែង ព្រោះដំណាំនេះមិនត្រូវការទឹកជោកជាំប៉ុន្មាននោះទេ ដែលសំខាន់ គឺត្រូវការស្រោចទឹកដំបូងដែលដំណាំនេះទើបលូតលាស់ប៉ុណ្ណោះ ហើយម្យ៉ាងវិញទៀតក៏វាមិនចេះរើសដីនោះដែរ ចង់ប្រភេទដីអ្វីក៏ប្រជាកសិករអាចដាំដុះបានទាំងអស់។

លោក រុន សម្បត្តិ ជាប្រជាការពារផង និងជាប្រជាកសិកររស់នៅស្រុកបាណន់ ខេត្តបាត់ដំបង បានរៀបរាប់ថា សព្វថ្ងៃលោកមានដីបន្តិចបន្តួចល្មមដាំដុះដំណាំរួមផ្សំដើម្បីទ្រទ្រង់ក្នុងជីវភាពគ្រួសារ ដោយមិនថាដំណាំអ្វីនោះឡើយ សំខាន់គឺដល់រដូវអ្វីលោកតែងតែព្យាយាម ដាំដុះដំណាំនោះដើម្បីបានផលលក់យកកម្រៃចិញ្ចឹមគ្រួសារ។

លោក សម្បត្តិ បានបន្តថា នៅរដូវនេះ គឺលោកកំពុងដាំសណ្ដែកកួរដោយបច្ចុប្បន្នដល់ពេលដែលត្រូវប្រមូលផលហើយ ប៉ុន្តែលោកមិនចាំបាច់បេះដឹកជញ្ជូនមកដល់ផ្សារក្នុងក្រុងបាត់ដំបងនោះទេ គឺមានម៉ូយទៅយកដល់ផ្ទះដោយគ្រាន់តែយើងបេះ និងវេចខ្ចប់ឲ្យស្អាតរួចទូរសព្ទប្រាប់ទៅម៉ូយ គេនឹងមកដឹកយកផ្ទាល់តែម្ដង។

សព្វថ្ងៃបើទោះបីជាផលសណ្ដែកកួរមិនបានថ្លៃខ្ពស់ប៉ុន្មាន ក៏ប៉ុន្តែវាអាចទប់ទល់បានជាមួយនឹងការចំណាយកម្លាំងពលកម្ម ហើយក៏អាចបានសល់ខ្លះដើម្បីចិញ្ចឹមគ្រួសារ វាជាជាងមិនធ្វើអ្វីសោះ ដោយទុកដីឲ្យទំនេរចោល។ ការដាំដុះនៅលើដីរបស់លោក បើដំណាំអ្វីដែលមានតម្លៃនៅលើទីផ្សារ គឺលោកតែងតែដាំផ្លាស់ប្ដូរគ្នា ដូចជាត្រប់វែង ត្រប់ស្រួយ ម្រះ សណ្ដែកកួរ ននោង ៘ គឺលោកតែងដាំដុះដើម្បីបានលក់នៅលើទីផ្សារ ដោយមិនប្រកាន់ថា ដំណាំអ្វីនោះឡើយ។

អ្នកស្រី សំអាន ជាអាជីវករលក់បន្លែគ្រប់មុខនៅក្នុងផ្សារបឹងឈូកកណ្ដាល ក្រុងបាត់ដំបង បានលើកឡើងថា សព្វថ្ងៃបន្លែស្ទើរគ្រប់មុខ គឺមានម៉ូយយកមកដាក់ឲ្យ ដោយឡែកសណ្ដែកកួរក៏មានគេយកមកឲ្យដូចគ្នា រីឯតម្លៃក្រោយពី​លើកយកមកលក់ គឺសណ្ដែកកួរអាចលក់បានក្នុងតម្លៃ ៣.០០០ រៀលក្នុងមួយគីឡូក្រាម បើទោះបីជាចំណេញតិច ប៉ុន្តែយើងលក់ច្រើនមុខដូច្នេះអាចគួបផ្សំគ្នា និងទប់ទល់ទៅលើបន្លែដែលរលួយចោលបាន ព្រោះកន្លែងអ្នកស្រីភាគច្រើនសម្បូរម៉ូយធ្វើម្ហូបការមកទិញយកទៅច្រើនៗដោយសារទីតាំងអ្នកស្រីមានបន្លែសឹងគ្រប់មុខដោយមិនចាំបាច់ដើររកទិញកន្លែងផ្សេងឡើយ៕

អត្ថបទ៖ សោ និយមរ័ត្ន