ព័ត៌មានជាតិ

ព្រឹទ្ធសភាបានឯកភាពទាំងស្រុងលើសេចក្តីព្រាងច្បាប់ស្តីពីការប្រឆាំងការឆបោកតាមបច្ចេកវិទ្យា

បានផុស

៤ ខែ មុន

នៅ

ថ្ងៃសុក្រ ៣ មេសា ២០២៦

ដោយ

ព្រឹទ្ធសភា នាព្រឹកថ្ងៃទី៣ ខែមេសា ឆ្នាំ២០២៦ បានឯកភាពទាំងស្រុងលើសេចក្តីព្រាងច្បាប់ស្តីពីការប្រឆាំងការឆបោកតាមបច្ចេកវិទ្យា។ ការឯកភាពរបស់ព្រឹទ្ធសភា បានធ្វើឡើងក្នុងសម័យប្រជុំព្រឹទ្ធសភាជាវិសាមញ្ញ ដែលមានលោក អ៊ុច បូររិទ្ធ ប្រធានស្ដីទីព្រឹទ្ធសភា ជាអ្នកដឹកនាំសម័យប្រជុំ ក្រោមវត្តមានសមាជិកព្រឹទ្ធសភាចូលរួមចំនួន៥៨រូប។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អង្គប្រជុំព្រឹទ្ធសភា បានពិនិត្យ ហើយឱ្យយោបល់ឯកភាពទាំងស្រុងនឹងការអនុម័តរបស់រដ្ឋសភាលើសេចក្តីព្រាងច្បាប់នេះដោយឥតកែប្រែក្នុងចំនួន៥៨សំឡេង។ កាលពីថ្ងៃទី៣០ ខែមីនា រដ្ឋសភាអនុម័តលើសេចក្តីព្រាងច្បាប់ស្តីពីការប្រឆាំងការឆបោកតាមប្រព័ន្ធបច្ចេកវិទ្យា ក្នុងសំឡេង១១២សំឡេងនៃសមាជិករដ្ឋសភាទាំង១១២រូបដែលមានវត្តមានក្នុងសម័យប្រជុំពេញអង្គរដ្ឋសភា កាលពីព្រឹកថ្ងៃចន្ទ ទី៣០ ខែមីនា ឆ្នាំ២០២៦។

ច្បាប់ពាក់ព័ន្ធនឹងការប្រឆាំងការឆបោកតាមប្រព័ន្ធបច្ចេកវិទ្យា គឺត្រូវបានតាក់តែងឡើងដោយរាជរដ្ឋាភិបាលកម្ពុជា ដែលមាន៥ជំពូក និង២៤មាត្រា គឺធ្វើឡើងក្នុងពេលដែលរាជរដ្ឋាភិបាលកម្ពុជាបាននិងកំពុងខិតខំយ៉ាងខ្លាំងក្លាក្នុងការបង្ក្រាបសកម្មភាព Online Scam ដោយកម្ពុជាបានបង្ហាញការប្ដេជ្ញាចិត្តធ្វើយ៉ាងណាបោសសម្អាត និងលុបបំបាត់នូវបញ្ហានេះឱ្យអស់ពីប្រទេសកម្ពុជា។

រដ្ឋមន្ត្រីក្រសួងយុត្តិធម៌ លោក កើត រិទ្ធ បានបញ្ជាក់ថា ច្បាប់ពាក់ព័ន្ធនឹងការប្រឆាំងការឆបោកតាមប្រព័ន្ធបច្ចេកវិទ្យា គឺត្រូវបានរៀបចំឡើងក្នុងគោលបំណងដោះស្រាយបញ្ហាប្រឈម តាមរយៈការបង្កើតវិធានព្រហ្មទណ្ឌដែលមានភាពចន្លោះប្រហោងនៃច្បាប់បច្ចុប្បន្ន ដើម្បីលើកកម្ពស់ប្រសិទ្ធភាពនៃការប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា សំដៅចូលរួមថែរក្សាការពារសន្តិសុខនិងសណ្ដាប់ធ្នាប់សាធារណៈ ព្រមទាំងជំរុញប្រសិទ្ធភាពនៃកិច្ចសហប្រតិបត្តិការក្នុងការប្រយុទ្ធប្រឆាំងនឹងឧក្រិដ្ឋកម្មនេះ។

តាមរយៈច្បាប់ថ្មីនេះ បទល្មើសព្រហ្មទណ្ឌថ្មីចំនួន៥ត្រូវបានបង្កើតឡើង ដើម្បីធានាប្រសិទ្ធភាពក្នុងការអនុវត្ត នោះគឺមាន ១.បទឆបោកតាមប្រព័ន្ធបច្ចេកវិទ្យា ២.បទរៀបចំឬដឹកនាំមជ្ឈមណ្ឌលឆបោកតាមប្រព័ន្ធបច្ចេកវិទ្យា ៣.បទជ្រើសរើស ឬបណ្ដុះបណ្ដាលអ្នកដទៃឱ្យចូលរួមប្រព្រឹត្តអំពើឆបោកតាមប្រព័ន្ធបច្ចេកវិទ្យា ៤.បទប្រមូលក្នុងចេតនាទុច្ចរិតនូវឯកសារសម្គាល់អត្តសញ្ញាណឬឯកសារព័ត៌មានផ្ទាល់ខ្លួននានារបស់អ្នកដទៃ និង៥.ការបង្កើតទម្រង់ពិសេសនៃបទល្មើសសម្អាតប្រាក់។

បទល្មើសទាំងនេះ បានកំណត់ដាក់ទោសជនល្មើសត្រូវប្រឈមនឹងការជាប់ពន្ធនាគារខ្ពស់បំផុតដល់១ជីវិត និងពិន័យជាប្រាក់ដល់ទៅ១០០០លានរៀល ថែមទាំងរឹបអូសទ្រព្យសម្បត្តិរបស់ជនល្មើសផងដែរ៕

ដោយ៖ ធឿន វ៉ាន់សុង