អភិបាលខេត្តកែប៖ ការរៀបចំសង្ក្រាន្តឆ្នាំនេះ គឺផ្តោតសំខាន់លើការលែងល្បែងប្រជាប្រិយខ្មែរ

លោក សោម ពពិសិដ្ឋ អភិបាលនៃគណៈអភិបាលខេត្តកែប បានលើកឡើងថា ការរៀបចំសង្ក្រាន្តឆ្នាំនេះ គឺផ្តោតសំខាន់លើការលែងល្បែងប្រជាប្រិយខ្មែរ សំដៅរួមគ្នារក្សាមរតកប្រពៃណីឱ្យកាន់តែមានភាពរស់រវើក និងគង់វង្សដល់កូនចៅគ្រប់ជំនាន់ក្រោយៗទៀត។

មានប្រសាសន៍នៅក្នុងកិច្ចប្រជុំជាមួយក្រុមការងារនៃគណៈកម្មការរៀបចំសង្គ្រាន្តខេត្តកែប កាលពីថ្ងៃទី៣ ខែមេសា ឆ្នាំ២០២៦ លោក សោម ពពិសិដ្ឋ ក៏បានលើកឡើងបន្ថែមថា ដើម្បីរៀបចំសង្ក្រាន្តឆ្នាំថ្មីនាពេលខាងមុខនេះឱ្យដំណើរការបានដោយរលូន អនុគណៈកម្មការទាំងអស់ត្រូវទទួលអនុវត្តលើភារកិច្ចដែលបានប្រគល់ជូនតាមសេចក្តីសម្រេចលេខ ០១៣/២៦ សសរ ស្តីពីការបង្កើតគណៈកម្មការរៀបចំសង្ក្រាន្តខេត្តកែប ជាពិសេសត្រូវយកចិត្តទុកដាក់ខ្ពស់លើការរៀបចំសោភណភាព អនាម័យបរិស្ថាន សណ្តាប់ធ្នាប់តាមចំណោតរថយន្ត ការរក្សាសន្តិសុខតាមទីតាំងប្រារព្ធពិធី រួមទាំងទប់ស្កាត់បទល្មើសផ្សេងៗអោយបានល្អប្រសើរ។ 

កិច្ចប្រជុំនេះ គឺដេីម្បីត្រួតពិនិត្យ និងពិភាក្សា លើការរៀបចំលេងល្បែងប្រជាប្រិយ៍ខ្មែរ និងមានការរៀបសណ្តាប់ធ្នាប់ ឱ្យមានរបៀបរៀបរយនៅតាមសាធារណៈនិង សោភណភាព បរិស្ថាន និងបច្ចេកទេសក្នុង និងក្រៅទីតាំងត្រូវបង្កើនឱ្យមានភាពរីករាយ នៅក្នុងពិធីសង្រ្តាន្តចូលឆ្នាំថ្មីប្រពៃណីជាតិខ្មែរខាងមុខនេះ និងធានាឱ្យបាននូវសុខសុវត្ថិភាពជូនភ្ញៀវទេសចរជាតិ និងភ្ញៀវទេសចរអន្តរជាតិដែលបានមកលេងកម្សាន្តក្នុងខេត្តកែប នាឱកាសបុណ្យចូលឆ្នាំថ្មីប្រពៃណីជាតិខ្មែរ នាពេលខាងមុខ។ 

សូមជម្រាបថា សង្គ្រាន្តនៅខេត្តកែបប្រារព្ធធ្វើ៣ទីតាំង មានសួនច្បារខ្ញុំស្រលាញ់ខេត្តកែប ឆ្នេរអង្គោល និងវត្តភ្នំសរសៀរ  សង្គ្រាន្តឆ្នាំនេះក៏មានការប្រគុំតន្ត្រីសម្រាប់រាំលេងកម្សាន្ត និងការរៀបចំជាស្តង់ម្ហូបអាហារ (ជំនួឱ្យមានការលេងបាញ់ទឹកផងដែរ៕

អត្ថបទ៖ សឹង រ៉ាត់