លោក កឹង ឃន បើកកិច្ចប្រជុំផ្សព្វផ្សាយ «ផែនការរួមឆ្ពោះទៅកាន់ការបោះឆ្នោតជ្រើសរើសក្រុមប្រឹក្សាឃុំ អាណត្តិទី៦ ឆ្នាំ២០២៧» នៅស្រុកកំពង់រោទិ៍

ក្នុងស្មារតីពង្រឹងកម្លាំងនយោបាយ និងត្រៀមលក្ខណៈសម្បត្តិគ្រប់បែបយ៉ាងឆ្ពោះទៅដណ្តើមជ័យជម្នះក្នុងការបោះឆ្នោតនាពេលខាងមុខ នៅព្រឹកថ្ងៃអាទិត្យ ទី១៤ ខែមិថុនា ឆ្នាំ២០២៦ នេះ គណបក្សប្រជាជនកម្ពុជាស្រុកកំពង់រោទិ៍ បានរៀបចំកិច្ចប្រជុំផ្សព្វផ្សាយសេចក្តីសម្រេចស្តីពី «ផែនការរួមឆ្ពោះទៅកាន់ការបោះឆ្នោតជ្រើសរើសក្រុមប្រឹក្សាឃុំ អាណត្តិទី៦ ឆ្នាំ២០២៧» ព្រមទាំង «បូកសរុបលទ្ធផលនៃការអនុវត្តការងាររបស់ក្រុមការងារគណបក្សចុះមូលដ្ឋានស្រុកកំពង់រោទិ៍ ប្រចាំឆមាសទី១ និងទិសដៅសម្រាប់អនុវត្តបន្តប្រចាំឆមាសទី២ ឆ្នាំ២០២៦»។

កិច្ចប្រជុំដ៏មានសារៈសំខាន់នេះ បានប្រារព្ធធ្វើឡើង នៅសាលប្រជុំគណបក្សស្រុកកំពង់រោទិ៍ ខេត្តស្វាយរៀង ក្រោមអធិបតីភាពដ៏ខ្ពង់ខ្ពស់របស់លោក កឹង ឃន សមាជិកគណៈកម្មាធិការកណ្តាល អនុប្រធានក្រុមការងារគណបក្សចុះមូលដ្ឋានខេត្តស្វាយរៀង និងជាប្រធានក្រុមការងារគណបក្សចុះមូលដ្ឋានស្រុកកំពង់រោទិ៍ និងលោក ម៉ែន ស៉ីផាន់ អនុប្រធានក្រុមការងារគណបក្សចុះមូលដ្ឋានស្រុកកំពង់រោទិ៍។

សមាសភាពចូលរួមយ៉ាងច្រើនកុះករ និងបង្ហាញពីសាមគ្គីភាពផ្ទៃក្នុងដ៏រឹងមាំអង្គពិធីទាំងមូលមានការអញ្ជើញចូលរួមពីសំណាក់ថ្នាក់ដឹកនាំ និងសមាជិក សមាជិកាបក្សគ្រប់លំដាប់ថ្នាក់សរុបចំនួន៣៤៩ នាក់ (ស្រី ២៦ នាក់)។

កិច្ចប្រជុំពេញអង្គនេះបានផ្តោតសំខាន់លើរបៀបវារៈធំៗចំនួនពីរ ដែលជាត្រីវិស័យសម្រាប់តម្រង់ទិសដៅនយោបាយរបស់ស្រុក៖ ទី១. ការផ្សព្វផ្សាយផែនការយុទ្ធសាស្ត្រឆ្ពោះទៅឆ្នាំ២០២៧ លោក កឹង ឃន បានធ្វើការផ្សព្វផ្សាយយ៉ាងលម្អិតនូវសេចក្តីសម្រេចស្តីពី ផែនការរួមឆ្ពោះទៅកាន់ការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៦ ឆ្នាំ២០២៧។ ផែនការនេះគឺជាយុទ្ធសាស្ត្រគន្លឹះក្នុងការអនុវត្តសិទ្ធិនយោបាយ ពង្រឹងមូលដ្ឋានគ្រឹះលទ្ធិប្រជាធិបតេយ្យនៅថ្នាក់ក្រោមជាតិ និងធានាឱ្យបាននូវការគាំទ្រដ៏លើសលប់ពីប្រជាពលរដ្ឋតាមរយៈការបម្រើសេវាសាធារណៈឱ្យបានល្អប្រសើរ។ ទី២. ការបូកសរុបការងារឆមាសទី១ និងលើកទិសដៅឆមាសទី២ ឆ្នាំ២០២៦  អង្គប្រជុំបានធ្វើការវាយតម្លៃខ្ពស់ចំពោះសមិទ្ធផលដែលក្រុមការងារគណបក្សចុះមូលដ្ឋានស្រុកកំពង់រោទិ៍សម្រេចបានក្នុងរយៈពេល ៦ខែដើមឆ្នាំកន្លងទៅ ទាំងលើការងារសង្គមកិច្ច ការអភិវឌ្ឍន៍ហេដ្ឋារចនាសម្ព័ន្ធមូលដ្ឋាន និងការដោះស្រាយបញ្ហាប្រឈមនានាជូនពលរដ្ឋ។ ទន្ទឹមនឹងនោះ លោក កឹង ឃន ក៏បានដាក់ចេញនូវទិសដៅការងារយ៉ាងម៉ឺងម៉ាត់សម្រាប់ឆមាសទី២ ដើម្បីបន្តសកម្មភាពចុះមូលដ្ឋានឱ្យកាន់តែរស់រវើក និងមានប្រសិទ្ធភាពទ្វេដង។

កិច្ចប្រជុំបានបញ្ចប់ទៅក្នុងបរិយាកាសស្និទ្ធស្នាល យោគយល់ និងពោរពេញដោយភាពជឿជាក់ខ្ពស់លើការដឹកនាំរបស់គណបក្សប្រជាជនកម្ពុជា ក្នុងការបន្តដឹកនាំនាវាកម្ពុជា ជាពិសេសស្រុកកំពង់រោទិ៍ ឱ្យកាន់តែអភិវឌ្ឍន៍ និងរីកចម្រើនលើគ្រប់វិស័យ៕
ដោយ: ភក្ដី